التسنين مرحلة مهمة بيمر بيها الطفل بعض الأطفال بتبدأ رحلة التسنين من عمر شهور وبعضهم بيتأخر شواية. بعض الناس بتقول أنه في علاقة عكسية بين تعلم الطفل المشي وبين التسنين وأن الأطفال الي بيمشوا بدري بيسننوا متأخر والعكس صحيح.
في أوقات بتلاحظ الأم تغير عام في مزاج الطفل بيصدر منه أصوات وحركات تدل علي الإنزعاج وعشان تعرفي هل ده له علاقة بالتسنين اتبعي الخطوات التالية
اللثة واللعاب
لو لاحظتي أن في لعاب كتير بيخرج من فم طفلك أو أنه بيدلك لثته بأصابعه كتير دي علامة مهمة علي بدخول الطفل مرحلة التسنين.
فقدان الشهية
لو لاحظتي أن طفلك مش عاوز يرضع سواء لو كان بيرضع لبن طبيعي أو لبن صناعي فده ممكن جدا يكون بسبب التسنين لأن عملية الرضاعة بتثير وتزعج لتثه. استمري في محاولة ارضاعه ولو حاسيتي أن طفلك مش بيرضع كفاية يبقي لازم تستشيري دكتور.
قلة النوم
بعض الأطفال بتبقي طبيعتهم قلة النوم أو النوم غير المنتظم لكن لو دي مش طبيعة ابنك وفاجأة بقي مش عاوز ينام أو بيصحي يعيط في أثناء الليل ده وارد جدا يكون بسبب التسنين.
تغير المزاج العام
بعض الأطفال في مرحلة التسنين بيحصل عندهم تغير في مزاجهم بعد ما كانوا أطفال هاديين ولطاف أصبحوا بيعيطوا كتير وبيزنوا كتير وعاوزين يتشالوا باستمرار. ده برضو من العلامات الي تدل أن ممكن طفل يكون بيسنن.
بروز سن من اللثة
لو الأم لحظت بروز جزء صغير آبيض من اللثة ده معناه أنه الطفل بيسنن وكمان ممكن لو الآم دققت في لثته تلاقي لونها يميل للأبيض شواية في المنطقة الي الطفل بيسنن فيها والسنة علي وشك أنها تشق اللثة.
نصائــــح
بعض الناس بتربط بين التسنين وارتفاع الحرارة أو حدوث إسهال والكلام ده غير علمي
من وسائل تهدئة الطفل الي بيسنن أنه يعضعض في فوطة مبلولة بمية ساقعة
استشيري الطبيب قبل استخدام أي جيل مهدئ للثة لأن بعضهم يحتوي علي الكحول
تعليقات
إرسال تعليق