ازاي تبيع اي حاجة لاي حد ؟

لو لاحظنا الفتره الاخيره بقى فيه اقبال كبير جدا على منتجات في الاساس ممكن منستخدمش كل امكانيتها او بمعنى اصح مش كل الناس محتاجاها ورغم كده بتشتريها وبنبقي متلهفين عليها زي الايفون اوالسامسونج جلاكسي او غيره كتير .

ليه بقىنا نحب نروح نخرج او ناكل في اماكن غاليه معينة مع ان ممكن نعمل نفس الحاجه وناكل نفس الاكل في اماكن تانيه ارخص و بنفس الجوده ، زي ان الناس بقت الفتره الاخيره بتروح تشرب قهوه في اماكن معينه ب 30 او 50 جنيه مع انهم ممكن يشربوا نفس القهوه في مكان تاني ب 5 او 10 جنيه .

ايه اللي ممكن يخلي منتج معين او خدمه معينه تنتشر بشكل رهيب جدا زي العدوي في المجتمع مع انه ممكن الخدمه دي او المنتج ده يبقى في زيه كتير جدا و كمان ارخص منه و تلاقيها متبعتش او الناس مش مقبله عليها .

اجوبة الاسئله دي كلها متلخصه في حاجه واحده عامل واحد لو توافر او موجود هو اللي بيفرق اي منتج عن التاني هو اللي ممكن يبقى سبب ان خدمه معينه تبقى ناجحه جدا و مشهوره جدا عن خدمه تانيه بنفس الجوده ارخص منها و مش عليها اقبال كبير .

عامل التسويق
التسويق ممكن يتم لاي حاجه التسويق لخدمه او لمنتج او حتي لفكرة ، التسويق هو اللي بيخلي منتج معين او خدمه معينه تبيع بكم كبير جدا وتحقق مبيعات كبيره جدا برغم ان ممكن يكون نفس الخدمه دي موجوده لكن مش محققه نفس النجاح ده ، التسويق هو اللي ممكن يخلي بوست على الفيسبوك يعمل ارقام وهميه الف شير ، 500 الف كومنت و مليون لايك ممكن يكون البوست ده تافه او مأضفش قيمه كبيره لكنه اتعمله تسويق باسلوب صح .

النقاط اللي جايه دي هي ملخص كتاب مشهور جدا اسمه كونتيجيس contagious معناه المعدي الكتاب حقق نجاح كبير جدا هو بيتكلم عن 5 نظريات في التسويق ، لو ركزت على الخمس حاجات دول هتلاقي المنتج او الحاجه اللي انت بتسوق له بقت حاجه معديه .

شكلك قدام الناس
هو اتكلم هنا عن حاجه اسمها القيمه الاجتماعيه معناها بالاصح شكلك قدام الناس ، الناس هيشوفوني ازاي ؟ ، وهنا شرح ان المحرك الاساسي لاي حد عشان يجيب اي حاجه هو في الأساس شكله قدام الناس ، الناس شايفني ازاي ، او شكلي هيبقى عامل ازاي لما اجيب الحاجه دي او اعملها .

وهنا شرح فكره انك مثلا ممكن تبقي عايز تركب عربيه معينه فخمه او شكلها حلو وتتخيل انك لما تجيبها الناس هتشوفك ازاي او تجيب بيت كبير وفي مكان حلو عشان شكلك قدام الناس او زي مثلا لما تبقي عايز تعمل حاجه معينه او تحقق حاجه معينه عشان بردو شكلك قدام الناس انك تكون حد قادر تجيب الحاجه دي او تحقق حاجه معينه مش كل اللي حواليك قادرين يحققوها .

زي انك تروح مكان معين وتتصور مع فنجان قهوه معين او كتاب عشان شكلك قدام الناس يبقي ان انت حد بيروح اماكن غاليه او مثقف.

هتلاقي في ناس كتير بتقولك انا مش بجيب الحاجات الغاليه دي او بعمل الحاجات دي عشان قيمتها الاجتماعيه قدام الناس ولكن انا بعمل كده عشان الحاجه دي تستاهل اني ادفع فيها الفلوس دي ، لكن افتكر اول مره جبت فيها موبايل معين او روحت عشان تاكل في مكان معين هل في اول مره دي كنت لسه عارف او علي يقين من جودة المنتج اللي المكان دا بيقدمهالك او المنتج اللي اشتريته ؟، ولا كنت رايح عشان شوفت الناس اللي حواليك راحوا المكان ده او اشتريت المنتج ده وشوفت ان القيمه الاجتماعيه بتاعت الناس اللي جربوها اتغيرت وانهم بيعملوا حاجات مختلفه وليهم جو وطريقه مختلفه ؟

القيمه الاجتماعيه هي اغلي سلعه موجوده الناس عندها استعداد تدفع ملايين لو معاها عشان قيمتها الاجتماعيه تزيد وشكلها قدام الناس ومظهرها يبقي كويس ، ودي من الاخر اسمها الحاجه الي التقدير ان كل الناس بتحب تحس بالتقدير من اللي حوليها حتي لو مش بشكل مباشر او بالطريقه دي

يبقي حاول لما تعمل منتج وتقدمه للناس تفكر ان فين القيمه الاجتماعيه والحاجه الانت بتضيفها للناس دي في اي مشروع او فكره بتعملها او بتطبقها ضروري جدا انها تكون بتضيف ايه الحاجه اللي هتعملها هتخلي الناس متميزين او مختلفين عن اللي حواليهم حتي لو كانت الحاجه دي علم ؟ ايه العلم اللي هتقدمهولهم هيضيفلوهم في حياتهم او هيفرق معاهم فعلا ؟

فكرة الجرس
من اكبر الغلطات اللي بتقع فيها الشركات انها تعتقد ان الناس هتفتكر المنتج بتاعك او الخدمة بتاعتك لوحدها من غير دعايا او اعلانات مستمره وان مجرد اما عرفوك او ان اسمك بقي معروف بالنسبه للناس خلاص مش محتاج اعمل دعايا تاني او ان هما خلاص بقوا عارفني فمش محتاج اعمل دعايا لازم طول الوقت تفكرهم بالمنتج او الخدمه الانت بتقدمها ، لازم تخلي حاجه ثابته في يوم الناس العادي تفكرهم بالمنتج او الخدمه بتاعتك .

كيت كات في سنه 2007 مبيعتها كانت بتقل جدا ، فابدت تربط كيت كات بالقهوه بعدين ابتدت تربطها بالهوت شوكليت وفي الاخر كيت كات ربطت نفسها بوقت الاستراحه (خدلك بريك خدلك كيت كات )في 2013 بدات مبيعات كيت كات تتضاعف 3 اضعاف دا لان اي حد كان بيفكر ياخد راحه كانت دايما بتيجي في دماغه فكرة ان الاستراحه مربوطه بالكيت كات بتدات تربط في عقولهمان هما مجرد اما يعملوا الحاجه دي اللي هي وقت الراحه يفتكروا المنتج ده اللي هو كيت كات .

كمان بيبسي ربطت المشروب بتاعها بالكوره وباللي بيشجعوا الكوره والرياضه بشكل عام ربطتها في اذهان الناس ان هما اول لما يلعبوا رياضه ويفتحوا التلاجه يشربوا بيبسي

خلي دايما في دعايا مستمره ليك متجيش في وقت وتوقفها ، لان الاعلان زي الجرس بيفكر الناس بيك كل شويه وبيخلي عدد مرات ان منتجك يجي في دماغهم اكبر

اربط منتجك بالمشاعر
اربطلهم دايما المنتج بتاعك بمشاعر حلوه زي كوكاكولا افرح ، بيبسي اللمه والعيله ، مولتو معاك علي الحلوه والحادقه .

ده بيبقي بمثابة شعار للمنتج بيحاولوا يرددوه كتير لدرجة انك بتحفظه وعقلك اوتوماتيك اول لما بيحصل حدث معين زي انك فرحان فتفتكر كوكا كولا ،لمة العيلة علي السفرة يبقي لازم يبقي في بيبسي .

عشان اعلانك يبقي مؤثر وليه قيمه عند الناس لازم تربطهلهم بالمشاعر زي انك تفرحهم او تضحكهم وتخلي مودهم حلو او تقولهم حاجه مؤثره فتاثر فيهم ، المشاعر من الحاجات اللي بتنقلها الناس لبعضها بسرعه جدا عامله زي العدوي

زي ما شركات الجبنه النستو ربطت منتجها بسعاة الاطفال لدرجة ان الاطفال فعلا بيحبوا الجبنه النستو وبيحسوا ان هي بتسببلهم السعاده .
يعني هتربط المنتج بتاعك بحاجه معينه فاكنك بتخلي المنتج بتاعك ده يبقي عامل زي العدوي بينتشر بسرعه جدا ، لو ربطت المنتج بتاعك مع المشاعر اللي ممكن يعملها هتلاقي المنتج بتاعك بدا ينتشر جدا

ركز علي قيمة او جودة منتجك
القيمه العملية للمنتج او الخدمه يعني لو الحاجه او المنتج الانت بتعمله ده اتوفر فيه انه قيمته كويسك وخامتها كويسه وسعرها مناسب هتلاقي ان العامل ده مع باقي العوامل التانيه اللي ذكرناها هتلاقي ان المنتج او الخدمه دي بتحقق مبيعات كبيره .

 احكي قصص وحكايات
الناس دايما بتحب تسمع قصه او حكايه اكتر من ان هي تتفرج علي اعلان منتج صريح ومباشر ، بدليل حب الناس للقصص ان من اكتر الحاجات اللي بتحقق اكبر نسب مشاهده عالميا هي المسلسلات والافلام .

دا في بعض الدعايا بتتعمل عن طريق قصص مفبركه مخصوص عشان تنشر او تشهر الحاجه دي زي لو طلعت اشاعه قبل فيلم في نزوله السينما ان حمد السقا وهو بيصور الفيلم دخلت شاظيه من الرصاص في جسمه واتنقل الرعايا واتنقل لدكاترة بره مصر الخ ..احيانا بتستخدم الطريقه دي او الاشاعات كنوع من الدعايا او الترويج او جذب الانتباه للحاجه دي

كل ما قدرت تربط المنتج بتاعك او الخدمه بتاعتك بقصه حتي لو القصه دي ملهاش علاقه مباشره مع المنتج ده كل ما هتلاقي المنتج بتاعك كمان انتشر زي القصه دي.

 ازاي تبني براند ؟
التلخيص
الناس دي قدرت تبني ليها قاعده في دماغ الناس عن طريق الدعايا طول الوقت بتبقي معاهم في كل حدث سار او محزن وبيحطوا بصمه فيه ، بيحسسوا الناس انهم جزء من حياتهم اليوميه ، بيلعبوا علي الاحتياجات النفسيه اللي جوه الناس مش مجرد عنده منتج عايز يبيعه ويكسب وخلاص ، لا هو بيحسسهم ان هما جزء من كيان كبيره اسمه كذا وبيحسسهم بالانتماء ليه فبيبدا الناس تتعامل مع الحاجه دي وترتبط بيها بشكل يومي بيبدؤا يتعاملوا ان المنتج او الخدمه دي بتاعتهم لدرجه ان لو حد قال حاجه قدامهم عن الحاجه دي بيبدؤا يدافعوا عنها ..الخ

نصائــــح
مش لازم تتوافر الخمس حاجات دول كلهم في المنتج بتاعك بس كل ما زادت العوامل دي او قدرت تخليه مووده كل ما المنتج بتاعك كان معدي .