القائمة الرئيسية

الصفحات

ازاي أخلي ابني يبطل يمص اصبعه






بعض الأطفال بتظهر عندهم عادة مص الأصابع في وقت ما في مرحلة الرضاعة وفي بعض الأحيان كمان بتظهر العادة دي علي الطفل في عمر الثلاث سنوات. مص الأصابع هو شئ طبيعي جدا للأطفال الرضع كوسيلة مساعدة علي النوم أو الاسترخاء. من عمر سنتين ل ٤ سنوات الطفل بيكون ظهر عنده مهارات أخري بديلة للاسترخاء زي الكلام لأنه بيساعده يعبر عن نفسه. للأسف العادة دي اتضح أنها ممكن تأثر علي أسنان الطفل والأفضل محاولة مساعدة التطفل للتخلص من مص الأصبع قبل ما يتحول لعادة. لو عاوزة تعرفي ازاي تخلي ابنك يبطل مص اصبعه اتبعي الخطوات دي:

 اشغلي ايد الطفل


حاولي تشغلي دايما أيد الطفل بأنشطة وألعاب بيحتاج يستخدم فيها ايده الاتنين. قدميله بدائل مسلية ينشغل فيها بيها مص اصبعه. ولو الطفل سنه مناسب ممكن تديله قطعة فاكهة أو خيار مثلا ياكلها علي مدار اليوم مع مراقبة الطفل عشان ميتعرضش للاختناق عن طريق بلع قطعة من الخضار أو الفاكهة عن طريق الخطأ.

 ممارسة الرياضة


وجهي اهتمامات الطفل للرياضة زي السباحة أو الجمباز. الجمباز مناسب للأطفل من سن سنتين ونص وفي بعض مراكز السباحة الي بتبدأ تمرن الأطفال من سن صغير. ممكن انشغاله بممارسة الرياضة ساعة أكتر من مرة في الأسبوع يساعد الطفل في التغلب العادة دي.

 اتكلمي معاه


اشرحي لطفلك بطريقة مبسطة وهادية انتي ليه عاوزاه يبطل يمص صباعه. بلاش تنتقديه أو تهينيه أو تزعقيله عشان يبطل ومتسمحيش لحد أنه يعلق علي طفلك بسبب العادة دي.

 الفيديوهات


بعض الأمهات بتقول أنها لما أتفرجت مع بنتها علي فيديوهات علي اليوتيوب بتكلم عن مص الأصابع وأضرار العادة دي بنتها توقفت عن مص الأصابع بالفعل.

 التجاهل


بعض الخبراء بيقول أنها عادة وهتاخد وقتها وتروح وممكن تتجاهليها أفضل عشان الممنوع مرغوب وممكن الطفل يتعلق بالعادة أكتر لما تطلبي منه يبطلها.


هل اعجبك الموضوع :

تعليقات