ازاي أعلم ولادي الإبداع

الإبداع هو المهارة الأهم في العصر الحديث. معظم وسائل التعليم المتطورة بتهتم أنها تنمي مهارة الإبداع عند الأطفال وعشان ابنك يتعلم يفكر كويس ويبقي مبدع اتبعي الخطوات التالية:

 اسمحي بالأخطاء


الأطفال الي بيتربوا في بيئة متقبلة للأخطاء وبيتعلم من وهو صغير أن الأخطاء هي فرص جديدة للتعلم بيكون عندهم شجاعة أكتر أنهم يجربوا حاجات جديدة. توقفي عن التأنيب والتركيز علي أخطاء طفلك وتقبلي أخطاؤه.

 أديله مساحة للعب


بعض الأمهات بتحب كل حاجة في مكانها بشكل مبالغ فيه وغير واقعي في بيت فيه أطفال. المشكلة أن ده مش بس بيتسبب في ضغط نفسي علي الأم لأن ده شئ غير واقعي لا ده كمان ممكن يأثر علي قدرة الإبداع عند الطفل. لازم تسيبي للطفل مساحة أنه يشخبط فيها ممكن نثلا تسمحيله أنه يشخبط علي الحيطة في أوضته بس.

 أمدحي المحاولة


للأسف احنا اتربينا علي التركيز علي النتايج فمثلا الطفل الي بيجيب نتيجة هايلة في الامتحانات مامته بتقوله “شاطر” لكن لو الطفل مجابش النتيجة دي حتي لو كان بيبذل مجهود فالأم مش بتمدحه في حين أن الصح أن الأم تركز علي المجهود وتمدح محاولة الطفل بغض النظر عن النتايج.

 لا تتدخلي


أمهات كتير متخيلة أنه جزء من دورها أنها تسلي الطفل وتخاليه مبسوط طول الوقت وتحلله كل مشكلة تواجه. سيبي ابنك يزهق ويشعر بالملل وسيبيه كمان يواجه ويحل مشاكله بنفسه لأن ده هيخاليه يضطر يتعلم يتصرف لوحده وينمي عنده قدرة استنتاج حلول مبتكرة.

 قللي من وقت التعرض للشاشات


لازم يكون في وقت محدد وقليل لمشاهدة الكارتون واللعب بالألعاب الإلكترونية الي كل الخبراء حذروا من المشاكل الي ممكن تنتج عن زيادة استخدامها وتأثيرها علي مخ الطفل.