ازاي اتغلب علي الشعور بالخوف

من أقوى العوامل النفسية اللي ممكن تمنعك انك تعمل حاجة انت عايزها هي الخوف بأشكاله المختلفة “الخوف من الفشل، الخوف من فقدان شخص عزيز عليك، الخوف من المستقبل ،الخوف من كلام الناس ،الخوف من الحسد ،الخوف من المرض ،الخوف من العقاب ، الخوف من الفقر ….الخ “

محمد علي كلاي الملاكم المشهور لما اتسأل عن سبب نجاحه كان بيقول أن 50% منها كانت عوامل داخلية ونفسية ولأن الخوف من اقوى الاسباب النفسية اللي بتأثر على الإنسان بشكل عام في حياته وقراراته ونجاحه وفشله وممكن تؤدي الى مرضه وبتتحكم فيه بنسبة كبيرة جدا ،لازم يبدا يتغلب عليها عشان يبدا يمارس حياته بشكل أفضل من خلال بعض الطرق اللي ممكن تساعده في التغلب عليه كالاتي:-

1 مواجهة الخوف
الخوف نوعين خوف حقيقي وخوف خيالي

والخوف الحقيقي هو اللي بيكون نابع من مشكلة موجودة بالفعل زي الخوف من مواجهة ابن لابوه بنتيجة الامتحان أو مواجهة زوجة لزوجها بوجود مشكلة معينة .. وهكذا ، والشخصية الضعيفة بتلجأ في الوضع ده للهروب باكتر من طريقة ، اما انها بتسافر أو بتتجاهل وجود المشكلة من الأساس وأحيانا يلجأ الشخص لشرب السجائر أو المخدرات بسبب خوفه من حلها

وغالبا لما بنغمض عينينا على مشكلة موجودة بالفعل بنشوفها اكبر من حجمها الحقيقي بالظبط ده اللي بيحصل لما بنهرب من الحل اما ان خوفنا بيخلينا نتصورها اكبر من حجمها الحقيقي أو انها بتكبر بالفعل والحل الوحيد هو المواجهة

اما الخوف الخيالي وهو النوع الثاني من الخوف بيكون مش موجود من الاساس بيكون مجرد شعور داخلي في خيال الإنسان مثل ” الخوف من الفشل “و ده بيتسبب لكتير من الناس انها متبداش في اي حاجه عايزه تعملها ، أو تخاف تبدأ حوار مع شخص لمجرد انها خايفة من عدم التفاهم أو الخوف من المستقبل أو الخوف من المرض وده بيكون الفشل في حد ذاته ،وعشان تتخلص منه لازم تعرف ان خوفك الوهمي هو المشكلة في حد ذاتها

2 اعرف حجم مخاوفك
لحاجة الوحيدة اللي تستحق الخوف هي الخوف في حد ذاته لان طبيعة العقل البشري انه بيكبر اللي بتفكر فيه والفكرة هتتسع وتنتشر من نفس نوعها ، فلو فكرت في الخوف فالطبيعي جدا ان عقلك هيكبرها ولو فكرت في الحلول برده بنفس الطريقة هيكبرها ويديك حلول اكتر وهكذا

فالحل انك لو خايف من المستقبل تكون ايجابي وتفكر ازاي يكون مستقبلك أأمن وافضل بالنسبه ليك وتبدا تمشي على خطوات ثابته للوصول لهدفك ودايما تكون واثق انك على قد ماهتتعب عشان توصل لهدف على قد نجاحك في تحقيقه ولو خايف من الفقر تشوف حلول عشان تتجنب الفقر ولو خايف من المرض تفكر ازاي تتجنب المرض بدون مبالغة في خوفك عشان متحصدش نتائج عكسية

3 خلي من خوفك محفز
في فرق كبير بين الخوف المرضي والخوف الطبيعي

وفي دراسة اتعملت بعنوان: الخوف ومفهومه السيكولوجي وأنواعه ودور الأسرة والثقافة في إنشائه. للاستاذ الدكتور محمد جاسم ولي بيعرف فيه الخوف انه “ظاهرة طبيعية وسوية ولا تنم على أي مرض نفسي أو على أي انحراف في الشخصية طالما أن هناك أسباباً معقولة لما يبديه الشخص من مخاوف وطالما أن القدر الذي يبديه من الخوف يتناسب مع حجم المثير للخوف والخوف في حد ذاته ليس شيئاً رديئاً يجب القضاء عليه أو يجب الاستغناء عنه تماماً “

فالطبيعي أن الخوف يكون موجود ولما بتديله حجمه الطبيعي بدون مبالغه بيكون حافز لتخطية وليس للغرق فيه والعكس

idea نصائــــح
تفائل بالخير تجده ، قانون الانجذاب بيخلي افكارك تنجذب ليك ولما بتخاف من شئ معين وتفضل تفكر فيه كتير بيحصلك بالفعل عشان كده الإنسان المتفائل دايما تلاقيه مبيعرفش الخوف ودايما عنده حلول وإيمان بالله بيخليه يخرج من أي مشكلة وفي الأغلب يتجنبها من الاساس