وصفة النهارده هي أكلة محدش يختلف عليها ، كبير صغير بيعشقها ، أكلة سريعة تمشي ، أكلة عزومات و حفلات تنفع ، ياتري تعرفي حد مبيحبش البيتزا؟ منعتقدش . بس النهارده بقي مش هنعمل بيتزا عادية، هنعمل ميني بيتزا . يعني سناك سريع في البيت أو أكلة مناسبة للانش بوكس بتاع أولادك في المدرسة ، أو في الحفلات صنف حادق و لذيذ جنب الحلويات . الجميل كمان إنك ممكن تعملي كميات كبيرة ، تخزنيها في الفريزر وتسسخنيها في الميكرويف تطلعيها وقت الحاجة ، و كل ده مش هياخد منك أكتر من نص ساعة شغل بس ، يلا بينا نعرف المقادير و الخطوات .
جهزي مقادير البيتزا
2 كوباية دقيق ، 2 معلقة صغيرة باكينج باودر ، 2 معلقة كبيرة توابل بيتزا إيطالي (متوفرة عند أي عطار ) ، نص معلقة صغيرة شطة، كوباية جبنة بارميزان مبشورة ، معلقة صغيرة سكر ، 2 معلقة كبيرة زيت زيتون + ملعقة كبيرة لدهن الصواني ، كوباية و نص لبن ، بيضتين مضروبين ، كوبايتين جبنة شيدر مبشورة ، 2 فنجان بيبروني صغير .
إعملي خليط البيتزا
في طبق عميق ، إخلطي الدقيق، الباكينج بودر ، توابل البيتزا ، الشطة (حسب الرغبة ) ، الجبنة البارميزان، زيت الزيتون ، السكر ، اللبن ، و البيض . إستخدمي شوكة و قلبي بيها الخليط كويس جداً . بعد كده ضيفي الجبنة الشيدر و جزء من البيبروني .
جهزي الصينية
في صينية مخصوصة للكاب كيك ، إدهني الأماكن اللي هتحطي فيها عجينة بمعلقة زيت زيتون علشان تتجنبي ان البيتزا تلزق منك أو تتحرق .
ضيفي الخليط للصينية
إستخدمي معلقة ايس كريم كبيرة و ضيفي خليط البيتزا اللي عملتيه في الخطوة 2 للصينية اللي جهزتيها في الخطوة 3 . إستخدمي النص التاني من البيبروني و زيني بيه وش البيتزا .
سوي البيتزا
دخلي الصينية الفرن لحد ما يتحول لونها لدهبي جميل و ده هياخد منك حوالي 20 دقيقة .
طلعي البيتزا و استمتعي
طلعي البيتزا من الفرن بعد ال 20 دقيقة و سيبيها تبرد لمده 5 دقايق . بعد لما البيتزا تبرد ابدأي طلعيها من صينية المافنز و قدميها لعيلتك مع الكاتشب .
نصائــــح
أحلى حاجة في البيتزا هي المرونة يعني لومش عندك بيبروني ممكن تضيفي لانشون أو لحمة مفرومة. ممكن كمان تضيفي أي نوع خضار متوفر عندك في البيت زي المشروم ، البروكلي ، الطماطم ، الزيتون أو أي حاجة تاني.
زي المخبوزات كلها سخني الفرن قبل ما تحطي الصينية علشان متنشفش و تتمتعي بأحلي ميني بيتزا بالبيبروني و الجبنة
قدمي طبق النهاردة في وجبة العشاء أو الغذاء مع عصير و استمتعي
تعليقات
إرسال تعليق