النهاردة هنقدم البطاطس بشكل جديد هيعجب كل أسرتك ، طاجن في الفرن شكله يفتح النفس و فيه كل العناصر الغذائية ، و مش هيحتاج منك اكتر من طبق سلطة خضراء كطبج حانبي ، طبق النهاردة ميزته إنك ممكن تقدميه في العزومات و كمان تحطيه في اللانش بوكس ليكي و لكل أسرتك ،يلا مع بعض نشوف الخطوات و نعمل طاجن البطاطس المهروسة باللحمة و الجبنة الشيدر .
شاهد الآن
جهزي المقادير
½ فنجان لبن ، 4 حبات بطاطس ، فنجان لحمة مقطعة قطع صغيرة جدا ، ½ فنجان بصل مقطع ، 2 معلقة صغيرة سكر بني ، معلقة صغيرة صويا صوص ، فنجان بقسماط مطحون ، فنجان جبنة شيدر ، معلقة صغيرة ملح ، معلقة صغيرة فلفل إسود ، معلقة صغيرة بهارات .
جهزي البطاطس
إسلقي البطاطس كويس و قشريها و إهرسيها و ضيفي عليها ½ فنجان لبن سخن و تبليها بنص معلقة صغيرة ملح و نص معلقة صغيرة بهارات و نص معلقة صغيرة فلفل إسود .
ضيفي بقية المكونات
في طبق كبير ضيفي اللحمة المقطعة و البصل و الصويا صوص و السكر البني و البيضة و البقسماط و تبليهم بنص معلقة صغيرة ملح و نص معلقة صغيرة فلفل إسود و نص معلقة صغيرة بهارات و إخلطيهم كويس مع بعض .
رصي أول طبقة في القالب
حضري قالب الفرن و رصي فيه الخليط اللي عملناه في الخطوة اللي فاتت و بكده تكوني حطيتي أول طبقة من طاجن البطاطس المهروسة باللحمة و الجبنة الشيدر .
رصي بقية القالب
بعد ما حطيتي أول طبقة من خليط اللحمة حطي طبقة من البطاطس المهروسة و أخيرا طبقة من الجبنة الشيدر .
سوي طاجن البطاطس
في فرن متوسط الحرارة حطي طاجن البطاطس المهروسة باللحمة و الجبنة الشيدر بعد ما تغطيه بورق ألومنيوم ، سوي الطاجن في الفرن لمدة 30 دقيقة ، و بعد كده شيلي ورق الألومنيوم و سيبي الطاجن في الفرن لمده 15 دقيقة كمان .
قدمي و استمتعي
بعد ما تخرجي الطاجن من الفرن سيبيه يبرد شوية و قطعيه و رصيه في طبق التقديم و استمتعي بطاجن البطاطس المهروسة باللحمة و الجبنة الشيدر .
نصائــــح
علشان اللحمة في الطاجن تستوي بسرعة قطعيها قطع صغيرة جدا .
ممكن تستبدلي الجبنة الشيدر بالجبنة الموتزاريلا .
زيني سطح قطع البطاطس المهروسة باللحمة و الجبنة الشيدر بالبقدونس أو الكزبرة المقطعة .
لو عاوزة الطبق حراق ممكن تضيفي فلفل أخضر مقطع مع خلطة اللحمة .
علشان تزودي الألوان في الطبق ضيفي فلفل ألوان مقطع مكعبات لخلطة اللحمة و للجبنة الشيدر قبل ما تضيفيها للسطح .
#بطاطس بالجبن السائل, #طريقة البطاطس بالجبن بالصور, #طريقة عمل البطاطس بالجبنة بالفرن
تعليقات
إرسال تعليق