الرضاعة الطبيعية مهمة جدا للطفل وهي أكبر هدية ممكن الأم تقدمها لطفلها حديث الولادة لأن لبن الأم هو الأفضل علي الإطلاق للطفل المولود مش بس لأنه بيوفر احتياجات الطفل الأساسية من الغذاء أول ٦ شهور بل وعشان كمان يوفر مواد تحمي الرضيع من الإصابة ببعض الأمراض. لو حاسة ان لبنك قليل وعاوزة تعرفي ازاي تزودي لبن الأم اتبعي الخطوات دي:
شرب المياة
بالرغم من بديهية النصيحة دي الا أن كتير من الأمهات مش بيشربوا مية كفاية أو فاكرين أنهم بيشربوا مية كفاية. شرب المياة مهم جدا للصحة بشكل عام وبالنسبة للبن الأم فاللبن آغلبه مصنوع من المياة وهي المكون الرئيسي فيه لو مش بتشربي مية كويس وكفاية جسمك مش هينتج لبن كفاية لطفلك.
الغذاء
عدم الاهتمام بالتغذية الكافية هيسبب أنه اللبن يبقي خفيف وغير مشبع أو أنه كميته تقل وفي كلا الحالتين الطفل مش هيشبع وهيدخل في بكاء وللأسف لما الطفل بيدخل في نوبة البكاء بيبقي من الصعب تهدئته عشان يرضع وبالتالي بيعيط أكتر! اهتمي بالوجبات الرئيسية كأنك بتعدي طعام لطفلك. بعض الأمهات بترضع من دون تناول إفطار وده مش كويس لأن اللبتن هيبقي خفيف وغير مشبع للطفل.
نوعية الغذاء
كمان في بعض الأطعمة والمشروبات الي بتساعد علي ادرار اللبن زي القصب والشوفان والسبانخ والجزر والعصاير بشكل عام والخوخ والسلمون والبطاطا واللوز واللبن.
الرضاعة الصحيحة
اتأكدي أن طفلك بيرضع كويس من الثديين ووضع الفم مظبوط علي مكان الرضاعة. ممكن طبيبة الأطفال أو الممرضات في المستشفي بعد الولادة يساعدوكي في تعليم الطفل كيفية التقام الثدي بالشكل الصحيح والي هيساعد الطفل يرضع بشكل صحيح. مع انتظام وتحسن قدرة الطفل في الرضاعة بيزيد انتاج اللبن.
تجنبي استخدام التيتينة
بعض الخبراء بيقول أن استخدام التيتينة بيلخبط الطفل الرضيع وكمان ممكن يقلل من عدد مرات الرضاعة وبالتالي اللبن يقل.
تعليقات
إرسال تعليق