ازاي تعيش مرتاح

الراحه من اكتر الحاجات اللي كلنا بنتمناها في الحياه ، وكتير مننا بيعيشوا كتير يدورا عليها ومبيكنوش محظوظين بشكل كافي انهم يلاقوها للأسف ، بس فيه كتير أكيد دورا عليها ولاقوها وحاليا عايشين مرتاحين وحابين حياتهم بشكل كبير وراضيين عنها ، وهنساعدك في المقال دا بأننا ندور عليها معاك وتلاقيها بمجموعه من الخطوات :

 الثقه بالنفس
من اكتر الحاجات اللي هتخليك مبسوط وعارف تتعامل كويس مع المجتمع ومرتاح نفسيا معاهم هي ثقتك بنفسك ، ودا تقدر تحققه عن طريق انك دايما تشوف نفسك شخص كويس ومسالم وبتقدم فايده للعالم المحيط بيك ، وتهتم بمظهرك ونظافتك الشخصيه جدا ، ولو عندك أي مشاكل نفسيه تشتغل عليها وتحاول تتخلص منها او تقولها للناس بشكل صريح وأنك مبتتكسفش من مشاكلك أو عيوبك ..

 الأرتباط بأصدقاء مريحين
راحتك النفسيه هتيجي من الأشخاص المريحين المحطين بيك ، كتير مننا بيعرف شخصيات متعبه نفسيا ويخليهم كل حياته وتبدأ الأشخاص دي تتضايقك في كل لحظه في حياتك وخناقات ومشاكل مستمره ودا هيحطك جوه ضغط نفسي مش هتقدر تتحمله في المستقبل وهتفكر تسيبهم ، فمتتأخرش في الفعل دا أول ما تقابل شخصيات نكديه ومرضيه نفسيه وبتتدخل في كل حاجه في حياتك أبعد عنهم بأقصي درجه ممكنه وأهرب بحياتك لأشخاص تسمعك تخفف عنك همومك يخرجوا معاك ويكونوا نفس هوايتك ..

 التركيز علي مستقبلك
مستقبلك من أهم الحاجات اللي هتساعدك فيما بعد انك تعيش مرتاح ، فلازم تركز فيه كويس وتبدأ ترسم خطه بكل أحلامك وأزاي تحققها وتبدأ تنفذها خطوه خطوه ، وكل فتره تقف وتشوف نفسك حققت فعلا اللي محتاجه ولا لا ، ودا طبعا هيريحك نفسيا جدا انك قدرت توصل لحلمك وتحققه ، ولو معرفتش توصل مره لازم تحاول مليون مره بعدها وترسم خطتك من جديد وتواكب حلمك بالكورسات والدورات التدريبيه المهمه وأول ما تحققه هتوصل لكل اللي محتاجه وهتحس أنك دايما مبسوط ..

 الحب
الحب من الحاجات اللي ميقدرش أي شخص يتخلي عنها في حياته او يعيش بدونها ، وهو من اكتر الحاجات اللي هتقويك وتتديك دافع أنك تكمل وتحسسك بالراحه والسعاده ، بس لازم تختار صح وتختار شخص يكملك ويشاركك كل تفاصيل حياتك الوحشه قبل الحلوه ، وتتقفوا مع بعض انكوا تسعدوا بعضكم بشكل كويس وتحطوا الراحه هدف قدامكم وأكيد هتتوصلوله بالتفاهم والحب والتعامل المحترم ..

 أسمع أكتر ما تتكلم
من أكتر الحاجات اللي هتريحك نفسيا وتخليك تفهم اللي قدامك كويس انك تسمع اكتر ما تتكلم وتحسس اللي قدامك بمدي اهميه كلامه ، وحاول بقدر الأمكان أن كلامك يكون موزون وتفكر فيه كويس قبل ما تقوله ، وتحاول تتعلم من كلام الأخرين وتتدرسه كويس وتفهم شخصيات البشر وتخليك مريح معاهم علشان يكونوا مريحين معاك ..

 قرب من ربنا
من اكتر العلاقات اللي لو عرفت تحققها كويس هترتاح نفسيا هي علاقتك بربك ، والدعاء الكتير ليه والصلاه ، هتحس دايما بعد الصلاه والدعاء انه دايما واقف جمبك وأنه عمره مهسيبك فهتحس أنك فعلا حابب الحياه وحابب تكمل علشان ربنا موجود معاك ..

نصائــــح
حسن علاقتك بأسرتك جدا ، لو ريحتهم بشكل كبير وسمعت كلامهم هيريحوك في حياتك
سافر بأستمرار وغير جو حتي ولو بفلوس بسيطه بس المهم تسافر وتشوف ناس جديده
خليك ودود في تعاملك مع الاخرين علشان تكون مجتمع كبير بيحبك ويدعمك نفسيا ويريحك في التعامل
اتفرج علي أفلام تتدعمك نفسيا وتساعدك تشوف نفسك بشكل أحسن
واجه مشاكلك ودايما خليك متاكد أن مفيش مشكله ملهاش حل بس لازم تواجهها وتفكر كويس قبل أي قرار
ألعب رياضه وأهتم بصحتك وأكلك كويس جدا وحدد الهوايات المفضله عندك وأبدا مارسها