ازاي تخلي طفلك يسمع الكلام

من أصعب المشاكل اللي ممكن تواجهكك كأم أنك تنصدمي بأبنك أنه مبيسمعش الكلام ومهما تحاولي معاه بدون اي أستجابه منه ، وطبعا الموضوع بيتخطي معاه كدا ويفضل يعاند معاكي ومبيردش عليكي كتير أو يعمل عكس اللي طلبتيه منه ، ودا طبعا بيفقدك أعصابك وبتبدأي بتضربه ، بس أكيد دا مش الحل الصح ، علشان كدا لازم تتبعي الخطوات الآتيه وهتحسني كتير من سلوكه وهتخليه مطيع ليكي ..

 متناديش عليه كتير


من أكتر الحاجات اللي ممكن تتضايق ابنك ، انك تنادي علي اسمه كل شويه وتتطلبي منه حاجه ، في البدايه هيسمع ليكي وهينفذ طلباتك بس بعد كدا هيسمع اسمه ومش هيرد اطلاقا ، فأنتي نادي عليه بس وقت الضروره وحاولي أنك تحسبي كام مره ناديتي عليه في اليوم علشان متعصبهوش ..

 أطلبي منه عمل حاجه واحده


لو طلبتي منه عمل أكتر من حاجه في المره الواحده هيعاندك ومش هيعمل ولا حاجه فيهم ، فخليكي ذكيه في تعاملك معاه وقوليله أعمل كذا وأنا هساعدك فيه ودا اول مره وتاني مره اعملي كذا وهجبلك الحاجه اللي بتحبها وتالت مره اعمل كذا وساعدني علشان انا تعبانه حاليا وابعدي اطلاقا عن أمره بأنه يعمل كذا حاجه في وقت واخد ..

 بصي في وشه عند طلب الحاجه


حاولي متناديش عليه من مسافه بعيده وتتطلبي منه يعمل حاجه أو يسمعك كلامك في حاجه معينه ، قربي منه وبصي في عنيه وقوليله يا حبيبي محتاجه منك تعمل حاجه مهمه دلوقتي أو العبي في شعره وقوليله لو عملت الحاجه دي وسمعت كلامي هتبقي أحسن وأعظم طفل في الدنيا ..

كلمات تشجيع


دايما حسسي طفلك أن الحاجه الصغيره اللي بيعملها محدش تاني يقدر يعملها غيره عن طريق الكلمات التشجيعيه زي ” أنت البطل بتاعي اللي هتقدر تعمل دا ومحدش تاني هيقدر يعمله ” ، أو ” أنتي بنوتي الجميله اللي مبعتمدش غير عليها فاكيد هتساعدني ” ، وبعد ما يسمعوا الكلام وينفذوا الحاجه اللي عملتيها قوليلهم برافو وكفاءيهم بالكارتون اللي بيحبوه ..

نصائــــح
روحي الجيم او العبي رياضه وطلعي فيها الطاقه السلبيه وعصبيتك مش فيهم .
أحضني ابنك كتير وحسسيه ان أقل حاجه بيعملها دي حاجه كبيره من وجهه نظرك
أتفرجي معاهم علي الكارتون اللي بيحبوه وقوليله شوفت الشخصيه اللي هو بيحبها بتسمع الكلام ازاي ؟
سمعيه ميوزك هاديه علشان ترخي أعصابه ويكون هادئ ويسمع الكلام