الأم والأب بيلعبوا دور محوري وأساسي في تربية وتنمية مهارات الطفل. ساعات بعض الأطفال بتتأخر في الكلام عن الأطفال الي في نفس سنهم لعوامل كتير وبتبقي الأم عاوزة تعرف ايه الحاجات الي ممكن تعملها عشان تطور من مهارة ابنها أو بنتها في الكلام. لو عاوزة تعرفي ازاي تخلي ابنك يتكلم اتبعي الخطوات دي:
لغة واحدة
من أكبر الأخطاء الي أنتشرت في مجتمعاتنا العربية ومش هتلاقيها موجودة في أي دولة غربية هي أن الأم بتتكلم مع أولادهم لغة تانية وغالبا بتبقي الانجليزي. لو طفلك بيتعرض للغتين مع بعض العربي والانجليزي مثلا طبيعي جدا أنه يتأخر في الكلام. والأسوأ من استخدام الأم للغة تانية هو الخلط بين اللغتين زي “البس الشوز يا حبيبي” وده بيخلي الطفل لا يتقن العربي ولا يتقن الإنجليزي. كمان مهما كان مستوي طلاقة الأم في اللغة الإنجليزية لو دي مش لغتها الأم بتبقي الحصلية اللغوية عندها محصورة ومش هتبقي قادرة تعبر عن كل أفكارها بالانجليزي بشكل كامل وده برضو بيأثر علي قدرة الطفل اللغوية الي بيكتسبها من الأم.
كل دول العالم المتقدمة سواء في أوروبا أو غيرها الطفل مش بيتعلم لغة تانية غير لغته الأم قبل ما يتم ٤ سنوات علي أقل تقدير وفي دول كتير بتدخل اللغة التانية في سن أكبر. البعض بينصح أن لو الأب والأم لغتهم الأم مختلفة يبقي كل واحد فيهم يتكلم مع الطفل باللغة دي. لكن الأفضل دائما أن الطفل في السن الصغير يتم التركيز معاه في لغة واحدة.
اتكلمي مع طفلك
بعض الأمهات بتبقي مشغولة جدا في الأشغال المنزلية وبتنسي تتكلم مع ابنها كل يوم بشكل كافي. تأكدي أنك خصصتي وقت كافي للكلام مع ابنك وممكن كمان تتكلمي معاه وتحكيله أنتي بتعملي ايه وانتي بتأدي مهامك المنزلية.
الحدوته
القراءة كع الطفل الي حتي مش بيعرف يقرأ والمناقشة في الصور بتاعة القصة هتساعد الطفل أنه بتعلم يتكلم كويس. اهتمي بالقراءة مع ابنك وكمان اهتمي أنك تحافظي علي حدوتة قبل النوم.
غنوا مع بعض
ممكن كمان الأم تغني مع طفلها أغاني الأطفال وتساعده يحفظهم وتشرحله معناهم. ركزي مع طفلك علي نشيد محدد وكرريه لحد ما يتقنه كويس وتتكلموا في معناه وبعدين ممكن تنتقلي لوحد تاني وهكذا.
امنعي التلفزيون
الأكاديمية الأمريكية لطب الأطفال بتوصي أن الأطفال أقل من سنتين ميتفرجوش علي التلفزيون نهائيا وآكبر من سنتين ميتفرجوش أكتر من ساعتين يوميا علي برامج تعليمية ذات جودة عالية. علي الرغم من أن في برامج ممكن تبقي تعليمية للطفل الا أن الكارتون والتلفزيون مش بيتفاعل ولا بيتجاوب مع الطفل هو مجرد جهاز بيعرض محتوي للطفل والحاجتين دول من أهم المحفزات الي بيحتاجها الأطفال لتعلم اللغة.
نصائــــح
اللغة مش مجرد مهارة اللغة كمان بتأثر علي تفكير الطفل وقدرته في التعبير عن نفسه
تعليقات
إرسال تعليق