لو انتي من الشخصيات اللي دايما مهتمه بالفاشون والازياء واللبس وبتحبي تتفرجي علي التصاميم ودايما مهتمه تتابعي وتدوري علي اللبس والالوان والموضة وشايفه انك عندك الملكة تتخيلي موديل معين وتصمميه بنفسك ونفسك يكون عندك لبس من صنعك انتي بس عمرك ما فكرتي تحولي الفكرة دي لشغل حقيقي في المقالة دي هنقولك ازاي تاسسي اتيليه ناجح ومشهور خاص بيكي من الصفر .
اتعلمي تفصيل كويس
اتعلمي تفصيل كويس باي طريقة تناسبك ، في طرق كتير جدا ومختلفة تتعلمي عن طريقها في اماكن بتعلمك التفصيل بطريقة احترافية خطوة بخطوة وبطريقة مدروسة وبتاخدها كدراسة كاملة لمدة سنتين او 4 سنين الاماكن دي زي المعهد الفني للموضة بالهرم والمريوطية ITM ، ومعهد career gates بشارع المساحة بالدقي ، و fashion design center ، والاكاديمية الايطالية للموضة بشارع يثرب بالدقي ، وart square academy بشارع الحجاز بهليوبوليس ، ودي تعتبر من اكبر 5 معاهد او اكاديميات في التفصيل والديزين والموضة ، الدراسة في المعاهد دي بمبالغ ثانوية بس هتخرجك حد متخصص ومحترف وهتقدري تعملي تصاميم مختلفة وتعملي شغل احترافي يساعدك انك تنجحي في وقت قصير .
اتعلمي عن طريق اي مكان تفصيل قريب منك من حد متخصص ، مش شرط تتعلمي عن طريق المعاهد او الاكاديميات ، تقدري كمان تروحي تطلبي من اي حد متخصص عنده اتيليه قريب منك انك تتعلمي وتدربي عنده مقابل انك بتساعديه .
اتعلمي عن طريق النت في مواقع كبيرة زي coursera و udemy بتقدم كورسات كاملة عن التفصيل لو عندك ماكينة الخياطة بالبيت وخامات تتطبقي عليها ، استعيني بالمواقع دي واتفرجي وابدئي تطبقي ، في الاخر هتختلف الطرق اللي بيتعلم بيها الشخص ، المهم انك توصلي للنتيجة اللي تبقي راضية فيها عن المنتج اللي بتطلعيه للسوق .
جيبي خامات لنفسك
من المهم في البداية انك تجيبي خامات(اقمشة) وتجربي فيها لنفسك في الفترة الاولي عشان تتعلمي وتتحسني وتعدلي من الاخطاء اللي بتقابليها في التفصيل ، وده بعد كده هيفيدك انك تعملي حاجات احترافيه اكتر وكمان هيساعدك تعملي تسويق لنفسك لان لبسك هيبقي دايما مميز عن اللي حواليكي وهيخلي الناس تسالك عن لبسك وتطلب منك تصمي لبس ليهم ودي هتكون اول خطوة حقيقة ليكي ناحية البيزنيس الخاص بيكي .
ابدئي شغل من علي النت
ابدئي صوري الديزاينز اللي نفذتيها وطلعت كويسة بجودة صورة عالية ، وابدئي اعملي جروب او بيدج خاص بيكي يكون كبداية مبدئيا الناس تعرفك من خلالها وتبدا تتابعك وتبدئي تعملي شغل علي خفيف وتتعلمي اكتر منه وتصوريه وتنزليه وهكذا ، بكده هتبدئي تعملي الخطوة الاولي لزباين ومتابعين خاصين بيكي وكمان تقدري تكوني راس مال ولو بسيط تبدئي تفتحي بيه الاتيليه الخاص بيكي .
أجري مكان صغير
في البداية اجري مكان صغير بس وضبيه كويس وخلي في ديزاينز تشد العين ، لان في مجال الموضة والازياء شكل المكان بيعكس جزء كبير من شغلك ومن افكارك وتصاميمك اهتمي بالجزئية دي كويس ، حاولي تهمي جدا بشكل المكان وتصميمه حتي لو صغير ، لان ده هيخلي العملاء تدخل المكان وترجعله مره تانية .
اختاري مكان في موقع حيوي عشان الناس تبدا تعرفك لان موقع المشروع من الحاجات المؤثرة علي المشاريع عموما ، بعد ما تكوني حد محترف وكونتي قاعدة من الزباين فهتكون خطوة افتتاح مكان خطوة هتساعدك تتقدمي اكتر وتكوني قاعدة زباين اكبر حتي لو كانت البداية بسيطة .
اتعلمي اساسيات تسويق
التسويق من الحاجات المهمه اللي هتحتاجيها في مشروعك واللي هتساعدك علي نجاح مشروعك بنسبة كبيرة جدا ، حاولي تتعلمي اساسيات تسويق سواء اونلاين او اوفلاين وازاي تختاري اسم المكان وازاي تسعري المنتج ازاي تعملي خطة تسويقية لمشروعك ، وازاي تطوريه ، التسويق هيساعدك تتجنبي اخطاء كتير في الشغل وهيساعدك انك تبني سمعة قوية واسم خاص بيكي كبير في السوق .
استعيني بحد شغال في التسويق ، لو شايفه ان معندكيش الوقت الكافي عشان تقدري تعلمي تسويق وتسوقي للمنتج فخصصي جزء شهري للتسويق تستعيني بيه بمتخصص تسويق يقدر يحطلك خطة تسويقة ويقدر يعملك الدعايا المناسبة .
اتخصصي في حاجة
اتخصصي في حاجة معينة بتحبيها ، التفصيل ليه فروع كتير في تفصيل السواريه وفي تفصيل اللبس الكاجول وفيه تفصيل للبنات وفيه للسيدات وفيه للرجال ، من المهم انك تحددي عايزه تكملي فيه عشان تقدري تركزي فيه وتبقي من احسن الناس في الحاجة اللي اتخصصتي فيها دي ، وعشان تقدري تعرفي هتتعاملي مع اي شريحة وتقدري تطلعيلهم المنتج بافضل شكل .
شغلي ناس معاكي
في الفتره اللي هتكوني فيها كونتي سمعة ومكان بيجيله زباين اكتر من تحملك ، مترفضيش الزباين وترجعيهم لان ده هيخسرك جزء كبير من الزباين المحتملين ، شغلي ناس معاكي تساعدك وتقدر تنجزلك الشغل بشكل اسرع وبالتالي تقدري تطلعي كميات اكبر ، زي انك ممكن تستعيني بشخص تكوني انتي بتقصي التصميم وهو يقفله وهكذا ، وكل ما يزيد الشغل زودي عدد الناس اللي بتشتغل معاكي وكبري المكان بحيث انه يستوعب الزيادة والزباين .
نصائــــح
اتعلمي ومتياسيش ، واعرفي ان اي حاجة في بدايتها صعبة لكن بالممارسة هتبقي سهله .
امشي خطوة خطوة واصبري في التعليم وبعد كده من السهل تبني اسم قوي طول ما المنتج بيطلع بشكل قوي .
تعليقات
إرسال تعليق