كم مرة حسيت انك محتاج تشتري حاجات محتاجها ليك او لبيتك ومقدرتش تشتريها بسبب ان المرتب مش مكفي المصروفات ، واضطريت تاجل حاجات محتاجها مره ورا مره بسبب ان الدخل مش متناسب مع المصروفات ، في المقالة دي هنقولك بعض الطرق اللي هتساعدك انك تزود من دخلك .
ابدء مشروع جمب وظيفتك
حاول تجيب ورقة وقلم وتكتب المهارات اللي عندك سواء الكتابة او السواقة او بتعرف نوع معين من الرياضة وفكر في طريقة تقدر بيها تستغل مهاراتك وتزود من دخلك عن طريق مشروع جانبي صغير زي انك تعلم ناس السواقة مقابل مبلغ من المال او تكتب مع مواقع معينة او تتعلم ازاي تكتب كتاب وتسوقه او تدرب ناس علي اي رياضة انت مهتم بيها مقابل اشتراك شهري الخ …
في البداية هتبقي محتاج جهد اكبر عشان تقدر تستمر علي الشغل مع مشروعك الجانبي ،ومش هتحس بفرق كبير لكن مع الوقت هتقدر تتعلم من اخطائك وتحسن من طريقة شغلك وتكون كونت قاعدة من العملاء او الزباين اللي بتساعدك يكون عندك زباين اكتر .
اشتري اسهم في البورصة
شراء الاسهم بيعني بشكل ما انك شريك بحصة او بجزء معين من الشركة ، حاول تتعلم عن طريق الانترنت او عن طريق كورس في مجال البورصة علي الاقل الاساسيات اللي تساعدك انك تستثمر فلوسك في البورصة .
ابدء اشتري اسهم صغيرة بمبلغ صغير سعر الحصة فيها بيكون قليل وزوده مره مع مره او اشتري سهم واحده بمبلغ معين في شركة كبيرة بالطريقة دي هتعتبر شريك في شركة ما وليك حصة منها وحق في مكاسبها وبكدة هتبقي بدات الخطوة الاولي في انك تستثمر فلوسك حتي لو كانت البداية بمبلغ صغير مع الاستثمار هتقدر تكبره وتكون راس مال .
حاول تعمل سيرش علي النت قبل ما تاخد قرار انك تشتري اي سهم وتجمع المعلومات اللازمة عنه لان البورصة فيها نوع من المخاطرة علي حسب عوامل كتير زي الاقتصاد وسعر العمله الخ .. حاول تعمل بحث ودراسة تخلي قرارك صائب بنسبة كبيرة ، متخافش من قرار المجازفة لان البعد عن المجازفة بشكل عام في الحياة بيبعد عنك انك تتعلم وتكسب وهيخليك معظم حياتك عايش في حدود الوظيفة وبس.
اتعلم تصلح حاجتك بنفسك
اتعلم بعض المهارات البسيطة اللي ممكن تخليك توفر جزء كبير من مصروفاتك علي سبيل المثال تدهن شقتك بنفسك او تصلح الحاجات البسيطة اللي بتبوظ باستمرار في البيت ، ابحث علي النت علي طرق تصليحها وهتلاقي شرح كل حاجة عن اي حاجة هتحتاجها اتعلمها خطوة بخطوة ، مع الوقت هتلاقي نفسك بقيت بتعرف تعمل حاجات كتير بنفسك .
لو بنت حاولي تتعلمي الحاجات الخاصة بالتجميل او العناية بالبشرة والشعر بنفسك اللي بتحتاجيها باستمرار زي صبغات الشعر وماسكات العناية بالبشرة والضوافر الخ.. اتعلميها بالتدريج هتوفرلك جزء كبير من مصروفاتك .
استثمر في العقارات
العقارات بشكل عام من الحاجات اللي سعرها بيتزايد طول الوقت ، حاول تحوش مبلغ وتشترك وليكن مع 10 او 20 حد من اصحابك وقرايبك وتشتروا عقار مناسب للمبلغ اللي معاكوا ويفضل لو في منطقة لسه بتتبني او المدن الجديدة لان المناطق دي بمجرد ما تتبني بيزيد تمنها للضعف ، بعد ما سعرها يزيد وتبيعها وكل حد من الشركاء ياخد نصيبه من الفلوس ، اشتري عقار جديد مع شركا اقل وهكذا لغاية لما تقدر تشتري عقارات خاصة بيك لوحدك .
اشتري محلات
المحلات في المدن الجديدة من الحاجات اللي بيكون سعرها رخيص مقارنة باسعرها بعد كده ، اشتري محل ليك للاستثمار في المستقبل مع شركاء او لوحدك لو كان معاك المبلغ الكافي وابتدي استاجرها بمجرد ما يزيد عدد السكان في المنطقة مقابل مبلغ شهري زائد ان راس المال نفسه بيكون في زيادة او تبيعه وتشتري حاجة تانية ممكن تستثمرها وهكذا ، التجارة بشكل عام بتزود راس المال بشكل كبير لو كانت مدروسة الي حد ما.
نصائــــح
حاول تدرس العلوم الخاصة بالبيزنس سواء عن طريق الكتب او الفيديوهات علي النت او المواقع المشهوره ، وابدء تجارتك بالحاجه اللي عندك شغف فيها او بتحبها .
عشان تقدر تزود من دخلك لازم تستثمر جزء من دخلك بعيدا عن الوظيفة وده بيتطلب منك انك تتعلم وتعرف ان التجارة مكسب وخسارة .
احيانا لازم تتحمل الخسارة عشان تقدر توصل للمكسب ، خلي عندك صبر ونوع من الدراسة مع المغامرة .
تعليقات
إرسال تعليق