لما الأم بيكون عندها أكتر من طفل بتبدأ تلاحظ تكرر حصول مشاكل بينهم وخناقات. وبيبقي حل المشاكل دي في كتير من الأحيان أن الأطفال تتعلم تحب بعضها. لو عاوزة تعلمي ولادك يحبوا بعض اتبعي الخطوات التالية:
تجنبي المنافسات
أول وأهم شئ تبدائي بيه كأم عشان تخلي ولادك يحبوا بعض هو خلق مناخ تعاوني وتجنب المناخ التنافسي في البيت. حاولي دايما تعلميهم يفكروا مع بعض مش ضد بعض بلاش تشجعي التنافس بينهم زي “مين هيلبس الأول” أو “مين هيخلص طبقه الأول” وهكذا بالعكس شجعيهم يساعدوا بعض ويلعبوا ألعاب مفيهاش واحد بس الي يكسب والباقي يخسر زي مثلا يلعبوا بالصلصال أو بالمكعبات.
خليهم يشتروا هدايا لبعض
علميهم يشتروا هدايا لبعض في المناسبات زي مثلا التفوق لو طفل من الأطفال تفوق علمي اخواته يشتروله هدايا ويفرحوا لفرح أخوهم أو أختهم.
اعدلي بينهم
أكتر حاجة بتسبب المشاكل بين الأخوات هي عدم عدل الأهل. حبيهم كلهم زي بعض واعدلي بينهم في العطية لو جيبتي لطفل حاجة يبقي لازم تجيبي للباقي زيه وده الأصل في الشرع أن الأب أو الأم طول ما هما عايشين يعدلوا في العطاء بين أولادهم. تجنبي أنك تهتمي بطفل حتي لو بالقبلة والحضن وتهملي البقية لازم ولادك يعرفوا أنك بتحبيهم كلهم زي بعض حتي لو في منهم واحد متعب أكتر من الباقيين.
علميهم الحضن
علميهم وعوديهم يحضنوا بعض ويقولوا لبعض أنهم بيحبوا بعض. ولازم انتي كمان تكوني قدوة في التصرفات دي اهتمي أنك تحضنيهم كلهم وتبوسيهم كلهم كل يوم.
تجنبي المقارانات
من الحاجات الي بتفسد بين الأخوات وتسبب ضغينة وحقد المقارنة المستمرة. تجنبي المقارنة بين الأخوات لأنهم مش بس هتتسبب في أنهم يكرهوا بعض بل كمان هتؤدي لتدمير نفسيتهم. الطفل الي بيتقارن بأخوه الأكبر أو الأصغر منه “بص أخوك مؤدب ازاي” أو “أخوك أشطر منك” هيتكون عنده مشاعر سلبية تجاه أخواته وكمان ممكن يشعر بالفشل واستحالة أنه يتغلب علي أخوه وبالتالي ممكن كمان يستمر في الفشل.
تعليقات
إرسال تعليق