ازاي ابقي شخص اجتماعي

ازاي ابقي شخص اجتماعي
الشخصية الاجتماعية في الغالب شخصية محبوبة بسبب انها بتقدر تكون صدقات بسرعه لانه بتقدر تتعامل مع الناس بود وحب وبتقدر تستفيد من خبرات غيرها تساعد غيرها في حل مشاكلتهم وبيقدروا يخدموا الناس ويزرعوا حبهم في قلوب اللي حواليهم وفي اشخاص بيقوا خجولين ومش قادرين يكونو اصحاب او علاقات قوية بسهوله وبيقوا مفتقرين لده عشان كده هنقولك الخطوات اللي تمشي عليها عشان تقدر تكون شخص اجتماعي .

1 اتعلم فن الكلام
الكلام من اكتر الحاجات في الدنيا اللي محتاج تتعلم فنها لان عن طريق نفس الكلام تقدر توصل رسايل مختلفة ايجابية وسلبية ، عن طريق توقيت الكلام تقدر توصل لهدفك وتوصل رسالتك سليمة للمستمع او تخسر الحاجه اللي بتتناقش عشانها ، عن طريق نبرة صوتك ممكن تمنع مشكلة انها تحصل وممكن تخلق مشكلة مكنتش هتحصل ، عشان تكون شخص اجتماعي من المهم جدا انك تكتسب مهارة فن الكلام تعرف ازاي تقول و تصيغ الكلام اللي عاوز تقوله وامتي تقوله وتقوله لمين ؟

ومن المهم انك تكون بتعرف تتكلم كويس خاصة قدام عدد من الناس ، متبقاش شخص خجول بيخاف من الكلام قدام الناس لان ده هيخليك مش قادر تتواصل مع الناس وتتعامل معاهم بسهوله .

في مصادر كتير تقدر من خلالها تتعلم فن الكلام زي فيديوهات تيدكس اومصادر كتير متنوعه علي اليوتيوب ، او من خلال الشغل في الاعمال التطوعية او الشغل عامة اللي بيحتاج التعامل مع العملاء ده هيخليك مجبر تتعامل مع الناس وتتعرض لمواقف كتير مختلفة هتخليك تكتسب مهارة اوفن الكلام .
2 خليك خدوم
الشخص الجدع او الخدوم اللي بيقدر يقف جمب الناس في مشاكلهم ويخدمهم علي علي قد ما يقدر بيبقي شخص محبوب واجتماعي وعنده علاقات قويه بعدد كبير من الناس لان الناس بتعتبره شخص ودودو و يعتمد عليه ، شارك الناس افراحهم واحزانهم واقف جمبهم وقت شدتهم .

3 شارك الناس مناسبتهم
مشاركة الناس مناسباتهم سواء افراحهم او احزانهم ، من الحاجات اللي هتقوي علاقتك بالناس ، اذا كنت بتتجنب حضور المناسبات الاجتماعية بسبب تعرضك لبعض المواقف او الاسئله المحرجه فاتعلم (ازاي تتغلب علي المواقف المحرجه ، وازاي تخرج ، تنسحب من الموقف بذوق ) لكن متهربش من ده بعدم حضورك للمناسبات تماما .

اشترك في انشطه طلابيه او بعض الانشطه الخاصه بدفعتك او تحضر ايفنتات ليها علاقه بمجال بتحبه دي من الحاجات اللي هتساعدك تكون علاقات وصداقات كتير في مجالات مختلفه .
4 بين اهتمامك
انك تبين للناس اهتمامك بيهم ، لو غاب شخص في شغلك تتصل تسال عليه ، لو حد عنده مناسبه سعيده تقترح علي اصحابك وتشتركوا و تشتروا له هديه ، حصل لحد موقف صعب اسال عليه وزوره وهكذا ، ده هيخلي اللي حواليك كمان يهتموا بيك وتكون معاهم علاقات قوية طويلة .

5 شاركهم بعض احداث حياتك
عشان تكسر حتة ان الناس تخاف تتكلم معاك او تحكيلك حاول تتكلم معاهم وتحكيلهم حاجات عنك مش شرط تكون حاجات شخصية خاصة بسده هيحسسهم انك شخص منفتح ومعندكش نوع من الغموض وبالتالي هيخليهم يتكلموا ويحكوا معاك ويبقي في نوع من الود والصحوبية وكسر الحواجز .

6 حدد الاسباب
اول خطوة عشان تحل اي مشكله انك تدرك وجودها ، ثانيا لازم تحدد ايه هي اسبابها دا بيعتبر نص الحل ، فحاول تسال نفسك ايه هي الاسباب اللي بتخليني ابعد عن الناس ؟ او ابقي منغلق ؟هل بسبب خوفي من ان النا تنتقدني او اغلط الخ .. اول ما تعرف الاجابات حاول تتكلم مع نفسك وتصحح المفاهيم المغلوطه اللي ليها علاقه بالنقطه دي وتحاول تكتسب مهارات جديده تعرف تتعامل بيها في اي موقف وتخلط بالناس الاجتماعين بشكل كبير هتتعلم منهم في كل موقف .

7 خليك شخص متفائل
مش معني انك تكون شخص متفائل انك تكون شخص غير واقعي بالعكس الشخص المتفائل بيكون شخص عنده دراية وعلم بالواقع لكن عنده حسن ظن ان اللي جاي هيبقي افضل او انه قادر يغير من ظروفه او يحسن منها ، بيقدر يهون علي اللي حواليه ظروفهم الصعبه ، معظم الناس بتحب الشخص المتفائل وبتحبتتعامل معاه وبتتجنب وبتبتعد عن الاشخاص المتشائمين السلبين ، حاول تغير رؤيتك عن العالم حواليك وتتعامل بنظرة اكثر ايجابية .

8 اضحك مع الناس
مفيش شخص اجتماعي الا وكان عنده قدرة دايما انه يضحك الناس حواليه وعنده نوع من خفة الظل ، الشخص ده في الغالب اللي بيخلي في اي مجلس في هزار وضحك وسعاده الناس بتحب تقعد معاه ، حاول تتعلم ازاي تضحك وتضحك الناس اللي حواليك ، لو كنت شخص دايما مكتئب وكثير الشكوي فاستبعد انك تكون شخص اجتماعي .

خليك دايما صاحب ابتسامه ووش بشوش ، الناس بترتاح و بتحب الشخص المبتسم وبتحب تتعامل معاه ، حافظ علي ابتسامتك قدر الامكان .