طريقة عمل الكيكة الاسفنجية

الكيكة الاسفنجية من اكتر الحاجات اللي مينفعش تستغني عنها في بيتك ، لأنك هتقدري تقديمها كفطار لأولادك قبل ما يروحوا المدرسه مع اللبن ، وهتقديمها لزوجك مع الشاي قبل ما يذهب لعمله وتقدروا تأكلوها في اي وقت ، علشان كدا هنقدملك طريقه عملها في خطوات بسيطه وسهله :

المقادير
_ 9 بيضات ( علي حسب عدد الكيكه اللي محتاجه ، و9 بيضات هتوفرلك كيكة اسفنجية واحده بقوام متماسك جدا )

_ كوب ونص دقيق .

_ 2 معلقه نشا كبيره .

_ كوب ونص سكر .

_ معلقه خل صغيره .

_ فانيليا .

_ عصير ليمون ( عباره عن نص ليمونه واعصريها كويس )

_ رشه ملح .

افصلي بياض البيضه عن الصفار
اساس الكيكة الاسفنجية أنك تفصلي بياض البيضه عن الصفار وتبدأي تضيفي المكونات اللي هتتحط علي كل واحد منهم وتتضربي كويس جدا وهنعرفك في الخطوه الجايه المكونات اللي بتتحط علي كل واحده منهم .

ضيفي الخل ورشه الملح علي البياض
بعد ما تفصلي البياض في وعاء لوحده ، ضيفي عليه معلقه الخل ورشه الملح واضربيه لمده نص دقيقه ، وبعده زودي عليه نص السكر واضربيه كويس جدا لمده دقيقتين أو اكتر بحيث ان الخليط يمسك بقوه في بعضه وميتحركش اطلاقا .

ضيفي الليمون والفانيليا علي الصفار
بعد ما تفصلي صفار البيضه في وعاء لوحده ، أضربيه كويس بحيث يمتزج مع بعضه وبعده زودي عليه عصير الليمون والفانيليا ونص السكر الباقي واضربيه كويس بحيث لونه يتغير ويتقارب من لون الكيكة .

ضيفي الدقيق علي الصفار
_ حطي الدقيق مع النشا وقلبيهم كويس مع بعض ، وبعده أنخلي الدقيق بالنشا علي الوعاء اللي فيه الصفار بحيث ينزل ربع مقدار الدقيق بس .

_ قلبي الخليط اللي فوق بمعلقه صغيره من اسفل الخليط لاعلاها علشان الهواء ميطلعش من الكيكه وتنزل منك وقت التسويه .

_ وبعده انزلي علي الخليط بكميه صغيره من البياض وقلبي بنفس الطريقه السابقه ( من أسفل لأعلي ) وبعده أنزلي بربع الدقيق وأستمري في العمليه دي لـ 3 مرات علشان تسمحي للخليط بأنه يتهوي ويكون هش ويعلي معاكي في الفرن وبالتالي يكون اسفنجني .

سخني الفرن علي 180 درجه
لازم قبل ما تحطي اي نوع كيكه تعمليه تسخني الفرن قبلها بنص ساعه لا أكتر ولا اقل من كدا وتحسبي النص ساعه كويس جدا ، وبعده حطي الكيكه علي درجه حراره 180 واقفلي الفرن تماما ومتفتحيش عليها غير بعد 45 دقيقه بالظبط .

نصائــــح
استخدمي صنيه مقاسها 26 او بمعني تاني تكون غويطه وادهنيها بالزيت قبل ما تحطي فيها الخليط .
مينفعش تفتحي علي الكيكه وهي في الفرن لانك هتخليها تهبط . فسبيها تماما علي 180 درجه حراره او لو معندكيش بوتوجاز بدرجه حراره سبيها علي حراره مش عاليه .
علشان تعرفي انها استوت صح حطي سكنيه فيها من الجمب براحه ، ولو طلعت السكينه مفهاش اي خليط تبقي استوت .
بعد ما الكيكة الاسفنجية تستوي ، أطفي عليها النار وسبيها في الفرن لحد ما يبرد ، لانك لو طلعتيها مره واحده من درجه الحراراه هتهبط منك .