ازاي أحافظ علي وزني أثناء الحمل

التغذية السلمية أثناء الحمل ممكن تبقي صعبة لو أنتي علي طول حاسة بالجوع! الوحم علي الأكل الغير صحي ونظرية أنك بتاكلي عشان اتنين مش بتساعد! لكن في أكلات كتير صحية ممكن تساعد علي تهدئة الوحم وتساعدك تسيطري علي زيادة الوزن أثناء الحمل. المحافظة علي غذاء صحي وأنك تبقي عارفة ايه الي المفروض تاكليه والي مش المفروض تاكليه مهم جدا مش بس عشان متتخنيش لكن كمان عشان الي بتاكليه بيأثر بشكل عام علي صحتك وصحة الجنين.

الدراسات بتقول أن الزيادة في الوزن المبالغ فيها أثناء الحمل ممكن تبقي معناها أنك هتستمري في محاولة التخلص من الوزن ده لفترة أطول من مرحلة “أنا لسه والده”.

زيادة الوزن في الحمل بتختلف من أم للتانية. لكن المعتاد أن الزيادة الصحية للأمهات بتكون حوالي من ١٢ ل ١٦ كيلو. لو الأم بدأت الحمل وهي وزنها أقل من الطبيعي الزيادة ممكن تبقي أكبر ولو هي بدأت الحمل بوزن زائد الزيادة ممكن تبقي أقل.

من الأخطاء الشائعة الاعتقاد أن الأم بتاكل لشخصين وهي حامل. الحقيقة أن الحامل مش محتاجة ضعف عدد الكالوريز أو صعف كمية الأكل. كل الي الأم بتحتاجه حوالي ٢٠٠ ل ٣٠٠ سعر زيادة في اليوم وده بيكون فقط في وسط واخر الحمل.

الزيادة الطبيعية في الوزن أثناء الحمل معناها نمو طبيعي للطفل. الزيادة المبالغ فيها في الوزن ممكن يزود احتمالية الإصابة بمشاكل صحية زي ضغط الدم ومشاكل كمان أثناء الولادة. لو عاوزة تعرفي ازاي تحافظي علي زيادة وزن طبيعية أثناء الحمل وتاكلي بشكل صحي اتبعي الخطوات دي:

 سيطري علي الوحم!


الوحم علي الحلويات من الحاجات الشائعة أثناء الحمل بسبب تغير الهرمونات. حاولي تسيطري علي كمية السكريات بشكل عام ويفضل الابتعاد عن السكر الأبيض تماما.

 الكافيين


حوالي ٢٠٠ ملي جرام أو أقل من الكافيين بيعتبروا امنين للاستخدام بشكل يومي. الكمية دي من الكافيين كافية قوي عشان يظبطولك مزاجك أثناء اليوم بس تجنبي شرب الكافيين بالليل عشان ميسببش أرق.

 ممارسة الرياضة


من الحاجات التانية المهمة عشان تحافظي علي صحتك ووزنك أثناء الحمل هي ممارسة الرياضة. الهدف الطبيعي للشخص البالغ هو ١٥٠ دقيقة أسبوعيا من التمرينات المتوسطة الجهد. أهم حاجة تفتكريها عشان تكملي عادي نفس مستوي حركتك ومجهودك زي قبل الحمل آنك تركزي مع احتياجات جسمك. أي وجع، شد عضلي، دوخة أو احساس بالقئ ممكن يكون معناه أنك محتاجة تريحي شواية. راجعي طبيبتك قبل ما تقرري تلعبي رياضة مع الحمل وممكن تشتركي في جيم بيقدم تمرينات مخصوصة للحوامل.

 السي فود أثناء الحمل


من المعتقدات الغلط أن الحامل مينفعش تاكل سمك وسي فود لأن فيهم زئبق – معدن بيتراكم جوة الأسماك بسبب التلوث – لكن بعض الخبراء شايفين أنه لازن تهتمي بتناول الأسماك. السمك بيوفرلك دهون الأوميجا ٣ الي مهمة جدا لنمو المخ والعيون للأجنة وكمان بيحسن صحة القلب ويقلل التوتر والاكتئاب للأمهات.

الخبراء بيوصوا أن الأمهات الحوامل والي بيرضعوا ياكلوا بين ٢٢٦ جرام ل ٣٥٠ جرام من الأسماك أسبوعيا علي الأقل. آفضل نوع من السمك والسي فود هو السلمون والجمبري وفي طبعا غيرهم كتير زي التونة المعلبة اللايت. يوصي الخبراء أيضا الحوامل والمرضعات بتجنب ٤ أنواع من الأسماك وهي القرش، والماكريل، والتلفيش وسياف البحر (swordfish) لأن الأنواع دي بيبقي فيها نسب أعلي من الزئبق.

 تجنبي الأطعمة الضارة أثناء الحمل


بعض الأطعمة بتمثل خطورة علي الحامل زي السي فود الني (الغير مطهو) وبعض أنواع الألبان الغير مبسترة مثل جبنة البري وبعض أنواع الجبن المكسيكي. تأكدي أن منتجات الألبان خاصة لو كانت مستوردة أنها مبسترة. بعض أنواع اللحوم آيضا قد تكون ملوثة بباكتريا ضارة مثل الهوت دوج واللحوم الباردة مثل اللانشون. تناول الأطعمة الصحية أثناء الحمل هيساعدك علي فقدان الوزن بسهولة بعد الولادة. كمان الحفاظ علي الأكل الصحي المفروض يستمر بعد الولادة كمان.