ازاي تبطل سجاير نهائيا ؟

مفيش شخص مدخن الا لما مر بفترة وكان عايز فعلا يبطل سجاير وبياخد القرار وبيمنع فتره او بيقلل ويرجع يشرب تاني ،فئه كبيره جدا نفسها تبطل سجاير بس مش عارفه ازاي ، او جربت كذا مره وفشلت لسبب ما ، او من غير ما يعرفوا الاسباب اساسا اللي فشلوا بسببوا او مش عارفه تعمل ايه ؟ في المقال ده هنقولك علي خطوات لو طبقتها بنسبة كبيرة احتمالية انك تبطل سجاير هتبقي عالية

متبطلش تحاول
في الغالب مش هتبطل سجاير من اول محاولة وده في الغالب اللي بيحصل مع معظم الناس لانها نوع من انواع الادمان اللي بتبقي مسيطره عليك واللي بيبقي ليها اعراض انسحاب اللي ممكن ترجع اثنائها للسجاير

هيجيلك احساس باليأس كبير جدا بسبب انك حاولت كذا مره تبطل وعديت كل المراحل الصعبه ، وفي الاخر النتيجة واحدة رجعت تشربها تاني وكل مجهودك راح علي الفاضي ، ودي حاجه طبيعيه جدا لان معظم المدخنيين اللي بطلوا سجاير بطلوها بعد محاولات كتير جدا ثبتت معظم الابحاث ان معظم المدخنين اللي اقلعوا عن التدخين اخدوا محاولات كتير جدا عشان يقلعوا عن التدخين بالفعل في اللي اخد اكتر من 10محاولات وفي منهم اللي بطلها بعد المحاوله ال30 محاوله يعني ده شئ طبيعي جدا يخلي عندك ارادة اكبر انك تحاول لغاية لما تبطل متيأسش

فكتر عدد مرات التبطيل مش سبب يخليك تحبط او تحكم انك خلاص مش هتبطل بالعكس كل ما بتحاول كل ما بتعرف ايه السبب اللي خلاك ترجع تاني تشرب وتعرف ازاي تعالجه او تتعامل معاه؟

خد ادوية النيكوتين
بسبب ان الجسم بيبطل يفرز النيكوتين وبيتعود ياخده من مصدر خارجي والمصدر ده اللي هو السجاير ، فبيقل افراز الجسم للنيكوتين بشكل طبيعي من الجسم ، فلما بتبطل السجاير بيبدا تحس باعراض انسحابيه علي ما يرجع الجسم من تاني تدريجيا يفرزه فخلال الفترة دي تقدر تستخدم بعض الوسايل المساعدة اللي تقلل من الاعراض دي وتساعدك انك تبطل ، الحاجات دي زي (لصقات النيكوتين، اللبان،واقراص النيكوتين الخ .. ) والادوية الخاصة بعلاج التدخين بشكل عام ،العلاج ده بيكون بمثابة تعويض او بديل للنيكوتين بيقلل من حدة اعراض الانسحاب في الفتره الاولي لكن من غير اضرار السجائر ،الادوية دي بنسبه كبيره بتزود من فرص نجاح الاقلاع عن السجاير ، بتبدا تقل جرعتها تدريجيا اثناء فترة تبطيل السجاير

بطلها تدريجيا
برنامج ال27 يوم برنامج مشهور لتبطيل السجاير وهو انك يوميا تقلل استخدامك سجاره يوميا يعني لو بتشرب علبه يوميا فيها 20 سجارة ، تاني يوم هيبقي 19 ، اليوم اللي بعده 18 ، وهكذا مش هتحس بالم التبطيل المفاجئ لانه هيبقي تدريجي ، لحد لما توصل انها بقت سيجاره واحده في اليوم ثبتها لمدة اسبوع ، وبالتدريج بعد الاسبوع استنغي عنها تماما و لكن لازم تلزم نفسك بالبرنامج بالظبط وبعدد السجاير يوميا ، متقولش واحده زياده مش هتفرق الخ.. لان ده هيخليك مره في مره متلتزمش بالخطة علي الاطلاق وتبقي سبب فشل المحاولة .

بطلها فجأة
مفيش طريقة واحدة تنفع للناس كلها ، في ناس مبتقدرش تبطل السجاير تدريجيا وكل ما بتحاول تقللها بترجع تشربها من تاني بشراهه اكتر من الاول ،فدي انسب طريقه للتبطيل للاشخاص اللي مبيقدروش يبطلوا بطريقة تدريجية ،انو تبتعد عنها نهائيا بقرار وباصرار بدون راجعة.

ابعد عن صاحبك
لو في اصحاب بتقف معاهم ودايما بتشربوا سجاير مع بعض ، حاول الفتره الاولي علي الاقل تقلل مقابلتك بيهم ، لانك بتبقي في اكتر وقت ممكن ترجع فيه سواء لو شوفت حد قدامك بيشرب سجاير او عزم عليك او اتكلم معاك فانك متبطلش سجاير هتكون ارادتك ضعيفة جدا ومحتاج اللي يشجعك علي قرارك ويقف جمبك مش اللي يرجعلك ليها من تاني .

غير عاداتك/نظام حياتك
غير روتينك اليومي وعاداتك ولو لفترة ، غالبا السجاير مرتبطه ارتباط نفسي او عقلي باحداث معينه واكل معين والمشروبات زي الشاي او القهوه والصحاب
فحاول تغير ان امكن نظام يومك وروتينه لفتره مؤقته عشان تفك الارتباط النفسي اللي بين السجاير والمشروبات او الاكلات الخ والافضل لو كانت دايما .

اعمل نظام غذائي سواء دايت عشان تخس او نظام لو عايز تتخن وحطه كتحدي قدامك ده هيغير من عاداتك اليوميه بشكل كبير وهيشتت جزء من تفكيرك عن السجاير وهيخليك بتفكر بشكل كبير في النظام الغذائي اللي ملتزم بيه ونوعية الاكل اللي هتاكله
اربط الاكل او المشروبات بحاجه غير السجاير سواء نوع من اللبان ،او المكسرات ، اي نوع من الحاجات دي ميكونش ليها علاقه اوارتباط بالسجاير يبقي بمثابة ارتباط بديل للسجاير
ابعد عن الحاجات اللي كانت دايما مرتبطه بالسجاير او بتفكرك بيها زي النعناع او اللبان بنكهة النعناع ..الخ

العب رياضة
في شريحه كبيره من المدخنين مبيحاولوش يبطلوا سجاير بسبب انها بتساعد علي تقليل الشهيه وباعتقاد انها بتساعد علي تقليلي الوزن ومع تبطيل السجاير الشهيه بتبدأ ترجع لوضعها الطبيعي فبيتسبب في زيادة بسيطة من الوزن من 1.5 ل 4 كيلو ،الرياضه هتساعدك بشكل كبير تحافظ علي وزنك ،وتفرغ فيها كل طاقتك من القلق والاكتئاب والصداع وتعمل زي حالة من الهدوء النفسي والسكينة

استخدم السواك
في حاجه اسمها الارتباط او التلازم اليدوي والشفوي ان المدخن بيبقي اتعود
يكون في حاجه دايما بتشغل ايده وفمه بسبب التعود علي مسك السجاير معظم الوقت ،خلي دايما في ايدك حاجه بديله زي السواك ، استخدمه باستمرار بعد الاكل واثناء اليوم او اي شئ بديل تاني زي انك تمسك قلم او عيدان قرفة او علبة ماية صغيره واي لعبة صغيره زي الكره المطاط او اعواد تنضيف الاسنان او اي لبان خالي من السكر او قطعة جزرة صغيره او تفاح او خيار .

حل مشاكلك
كتير من علماء النفس قالوا ان من اهم الاسباب اللي بتخلي الناس يفشلوا في ان هما يبطلوا سجاير او غيره من انواع الادمان المعاناة النفسيه اللي بيعانيها المدخن ، واللي كانت السبب الاساسي اللي خلاه يبدء في شرب السجاير مشكلات كتير زي الاكتئاب والقلق والاحباط والصدمات النفسية و العلاقات العاطفية و العائليه المضطربه والسمنه والحزن الشديد كلها من المشاكل اللي بتسبب ضغط علي الشخص وممكن تخليه عرضة للرجوع للتدخين مره تانيه .
حاول تشوف ايه اكتر المشاكل اللي في حياتك مسببالك ازمه او بتضايقك باستمرار وفكر في خطه لحلها ،وحاول تفرغ طاقتك او غضبك في الرياضة او الشغل وغيره من البدايل الأفضل ليك ، وتقدر تستعين بدكتور نفسي يعرفنك الخطوات السليمة اللي ممكن تاخدها عشان نقلل من تاثير المشاكل دي عليك بشكل مباشر .

اقتل الفراغ
متحاولش تخلي في اوقات فراغ علي قد ماتقدر حاول تشغل معظم وقتك في حاجات مفيدة ليها قيمة متخليش عندك وقت تفكر في احساسك بالاحتياج للسجاير وان امكن يكون الوقت كله يبقي افضل ، متسبش نفسك تبقي اثير الشعور ده عشان ارادتك تبقي قوية ، في حاجات كتير ممكن تشغل بيها وقتك زي انك تعمل بيزنس خاص بيك او تقرا في مجالات عندك شغف بيها او تشترك في نادي او جيم او تاخد كورس معين كل دي من الحاجات اللي ممكن تعملها تقتل بيها وقت فراغك وفي غيرها وسايل كتير

نصائــــح
تبطيل السجاير زي الادمان محتاج مجهود بدني ونفسي وصبر وتحمل .
زي ما اتعود علي وجود السجاير فانت تقدر بردو تتعود علي عدم وجودها .
السجاير مبتحلش المشاكل او بتقلل الضغط العصبي بالعكس بتزودها اكتر.
السجاير مش بس بتاذيك لوحدك بتاذي اقرب ناس ليك زي ولادك وكل الناس اللي حواليك .
في ناس كتير قدرت تبطل سجاير وعايشين ومكملين .
خلي الناس اللي حواليك بتحبك تشجعك مهما يئست .
متبطلش محاولات لحد ما تنجح .