في البداية خلينا نتفق اننا كلنا بنلغط وبيحصل مشاكل كبيره من حاجات في الاساس كانت تافهه او صغيره وكبرت بسبب تعاملنا مع المشكله وتصرفتنا اثناء وجود المشكله وده في الغالب اللي بيسبب مشاكل اكبر من المشكله الاصلية ، في المقال ده هنقولك ازاي تصالحي جوزك بطرق وحيل بسيطة عشان تقدروا تتغلبوا علي الخلافات ما بينكوا .
علاقتكوا اهم من المشكلة نفسها
اهم حاجه في وقت وجود اي مشكله انكوا لما تيجوا تتناقشوا مع بعض وقتها ،ان دايما في وسط الكلام تقوليله ان بغض النظر عن مين غلطان وبغض النظر عن المشكله في الاصل هي ايه ان علاقتنا ببعض مش هتتاثر وانها اهم من اي حاجة وتحالوا انكوا بعد اي مشكله تكونوا احسن من الاول ،وان الاختلاف ده حاجه طبيعيه بين اي اتنين ،واننا في الاخر بنختلف عشان نفهم بعض ونعرف نتعامل مع بعض ازاي بعد كده ونقدر نفهم دماغ بعض ونوصل لحل للمشكلة .
اتدلعي عليه
في الاخر الراجل مبيحبش يحس انو بيتعامل مع راجل زيه وان في نديه و خشونه في التعامل ، علي سبيل المثال انت عملت كذا فانا لازم اردلك الموقف اللي انت عملته ولازم اعاقبك علي اللي عملته حتي لو بطريقه مش مباشره الخ ..الطريقه دي في الغالب بتزود المشكله تعقيد و في بعض المشاكل بسيطه مش محتاجه اننا نقف عندها محتاجة اننا نعديها ومنكبرهاش .
متنسيش في الاخر انك كونك انثي دي نقطه في حد ذاتها لصالحك مش ضدك ومش نقطه ضعف بالعكس دي نقطة قوة حاولي تستخدميها ،كلميه برقه وعامليه بوود ، ناديه باسم دلع هو بيبحبه ، روحي اقعدي جمبه وحاولي تتكلمي معاه او اقعدي جمبه في نفس المكان عموما، حسسيه انك مهتمه لزعله مش متجاهلاه وان زعله فارق معاكي .
هزري معاه
حاولي تعملي اي حاجه تفرحكوا و تخرجكوا بره جو الزعل والحزن ،روحي قوليله حاجه تضحكه ، علقي علي حاجه بيعملها بهزار ،روحي قوليله بصراحه وانتي بتضحكي مبحبش نكون متخانقين وفي مشاكل ما بينا ، في طرق بسيطة بس تقدري بيها تصلحي الوضع للاحسن .
اتعاملي معاه بتلقائية
خلي الامور تمشي بطبيعيه علي قد ما تقدري ،حاولي تصحي مبتسمه او علي الاقل مش مكشره ومكتئبه لان عشان حتي لو حابب يتكلم معاكي او يصالحك ميحسشانك هتصديه وهيحصل مشكله كبيره وخناقه .
اتعاملي بطبيعه في بعض النقط متحاوليش اثناء خصامكوا تتجاهليه تماما ، في كل حاجات لازم تسالي عليه فيها حتي لو متخانقين لازم تعرفي اكل او لا وتحطيله علي الاقل بهدوء وتمشي.
متتجاهلهوش لو لقتيه تعبان خلي خلافكوا علي جمب والاكل والتعب ووقت الشد حاجة تانية ،مينفعش يبقي تعبان او عنده مشكلة كبيرة وتسبيه روحي واتكلمي معاه وفهميه انك زعلانه وانكوا مختلفين بس ده مش معناه اننا منقفش جمب بعض وقت الظروف او التعب .
اعمليله حاجات بيحبها
اعمليله اكل بيحبه ،البسي كويس واستقبليه لما يرجع من الشغل او من بره عموما لو بيحب الكوره شغلي ماتش مثلا او قناة رياضه وقوليله يجي يتفرج عليها واتفرجي معاه ، حاولي تهيئ الجو للصلح عموما .
متتعودش علي الخصام
متخليش دايما فترات خصامكوا تتطول وكل واحد يفضل منعزل عن التاني فترات ،لان ده بيعمل حاله من الجفا والبعد والتعود علي ان الطبيعي انكوا تكونوا متخاصمين وان البيت في جو مشاحنات دايما وانكوا مش بتتكلموا .
حلو مشاكلكوا باستمرار ،لو كانت كبيره اتناقشوا فيها وحاولوا توصلوا لنقطه وسط ترضي الطرفين ،ولو مشكله صغيره عدوها ببساطه ،هيبقي الطبيعي ان كل ما بيحصل مشكلة مش بتطول .
اعترفي بخطئك
في بعض المواقف لما تبقي عارفه انك غلطتي او خلفتي اتفاق كنتوا متفقين عليه حاولي تعترفي بغلطك وان مكنش عندك نية انك تضايقيه ومتحاوليش تدخلي في جدل طويل ، لان من اكتر الحاجات اللي بتضايق الزوج من زوجته انها متعترفش بغلطتها وتجادل كتير .
اتناقشوا
في مشاكل بتبقي كبيره ومبنقدرش نعديها بسهوله ،في الحاله دي لازم تسيبوا وقت لما كل طرف يهدي ويبقي عنده استعداد يقعد يتكلم بهدوء مع الطرف التاني ،النوع من المشاكل الكبيرة لازم تقفوا عندها وتتناقشوا مع بعض وتعرفوا ايه الاسباب اللي خلقت المشكلة وتحاولوا تتقفو ازاي ممكن تحلوها .
نصائــــح
لو قدرتي زوجك بنسبه كبيره هو كمان هيقدرك وهيتعامل معاكي بنفس الطريقه وقت زعلكوا والمشاكل هتتحل بسهوله الا لو كان شخص عيندي كل ما تصالحيه مبيتصالحش او عنده كبر فدي حاله خاصه .
اكتبيله ورقه وحطيها جمبه انو ميزعلش واعملي نفسك مش واخده بالك ،هيفرح اووي .
بعض التفاصيل البسيطه اللي ممكن تطبق بسهوله هتفرق جدا في علاقتكوا .
الجواز مش معركه كل واحد بيحاول فيها بنتصر لنفسه .
الحياه مش ورديه طول الوقت بس احنا نقدر نقلل علي الأقل جزء من مشكالنا .
تعليقات
إرسال تعليق