في المقال ده هنقولك علي خطوات تخلي ابنك او ابنتك يحكولك مشاكلهم بدون ما تضغطي عليهم ،كتير من الاهل بيقي نفسهم يبقوا قريبين من اولادهم ويبقي في نوع من الصحوبية والود ما بينهم ، بس دايما بيحسوا ان اولادهم مش بيحكوا لهم مشاكلهم او العقبات اللي بتواجهم ويبقوا دايما جمبهم ويقدموا لهم النصيحة .
تقبلي الاختلافات
اول خطوة عشان ابنك او بنتك يقرروا يحكولك مشاكلهم لازم يبقوا حاسين من جواهم انك هتقدري تتفهمي اللي هيحكوه وهيبقي في نوع من النقاش والحل او علي الاقل الدعم …
متبقيش دايما في جبهة المعارضة ليه ولتصرفاته ودايما في حالة من الصراعات وعدم تقبل للاختلافات اللي بين الاجيال لان ده هيعمل نوع من المسافة وحاجز صعب يتكسر لانه دايما حاطط في دماغه ان بمجرد اما يحاول يحكيلك اي حاجة هيحصل مشاكل كبيرة اكبر من اللي هو بيواجهها ومش هيقدر يوصل لحل لمشكلته.
خدي قرار دايما ان مهما يكون في اختلاف تحاولي تتقبليه ومتخديش قرار باي تصرف قبل ما تفكري لفترة ان ايه التصرف المناسب والصحيح للموقف .
احكيله مشاكلك
من الحاجات اللي ممكن تخلي اولادك يبقوا قريبين منك وحابين يتكلموا معاكي ان هما كمان يحسوا انك بتحكيلهم مشاكلك وبتاخدي رايهم وبيساعدوكي في الحل وان هما جزء مهم من حياتك وانك بتعامليهم كحد كبير وبتحترمي وجهة نظرهم ، اتكلمي معاهم باستمرار واطلبي منهم رايهم .
اسمعيه
في حالة ان ابنك يقرر يحكيلك مشكلة او موقف بيمر بيه في حياته من المهم انك تكوني مستمع جيد جدا ليه ، متبادريش بكم من الحلول ومن رايك وتقيمك للموضوع من وجهة نظرك ، اسمعيه للاخر لحد ما يقول كل حاجه حاسس بيها ومتحاوليش تقاطعيه تماما .
حاولي متقوليش الحلول من وجهة نظرك ،فكري معاه بتفكيره ، حاولي تشوفي الصورة من وجهة نظره وتبدائي تناقشي معاه الحلول اللي هو بيفكر فيها عشان ميحسش انك بتقوليله وجهة نظرك وبتفرضيها عليه فيبدا ينفر ويبعد ، ناقشي معاه حلوله والحاجات اللي بيفكر فيها بعدين ابدئي قوليله رايك في الموضوع بشكل انه يقدر ياخد بيه ويقدر مينفزوش ، قوليله من وجهة نظري ان الحل كذا وكذا لو انت شايف ان ده صح اعمله .
متفرضيش رايك عليه
اكتر سبب بيخلي اي ابن ميحكيش لاهله علي مشاكله او افكاره ان هما دايما بيحاولوا يفرضوا رايهم ووجهة نظرهم عليه ، او يجبروه علي اختيارات معينة ويفضلوا طول الوقت يضغطوا عليه عشان ينفذلهم كلامهم .
اعرفي انك لو اتبعتي اسلوب الاجبار انه هيبدا يبعد عنك ويخبي معظم تفاصيل حياته ، لكن لو قدرتي تتفهمي ان دورك في حياته النصح والتوجيه وان القرار الاخير ليه حتي لو كان غلط من وجهة نظرك هيحب يتكلم معاكي ويحكيلك وياخد رايك ويستشيرك .
احترميه
الابن دايما لو حاسس انك بتستهزئي بيه وبارائه ، او بتعامليه عموما انه غبي او مستهتر او ان ارائه ساذجة او غلط مش هيحب اطلاقا انه يحكيلك اي حاجه خاصة بيه وهيحاول ينعزل عن الاسرة عموما ويتجنبهم علي قد ما يقدر ، احترمي ارائه وافكاره وتقبليه بشخصيته .
اهتمي بيه
الشخص دايما بيحب يحكي للشخص اللي بيهتم لامره ، خلي ابنك يحس دايما انك مهتمه براحته وصحته واهتمي عموما بتفاصيله لكن بدون مبالغة ، عدم الاهتمام عموما او المبالغة في الاهتمام هيخلي ابنك يبعد عنك ، حاولي تهتمي بيه بالمعدل الطبيعي اللي ميتسببش في خنقة ليه …
اهتمي كمان انك تعرفي دايما الحاجات اللي بيحبها والحاجات اللي مش بيحبها وحاولي تشجعيه دايما وتسانديه يحقق اللي بيحبه ، ده هيخليه دايما حاسس انك حاسه بيه وعاوز يتكلم معاكي ويعرفك اخباره وياخد رايك .
تعليقات
إرسال تعليق