التفاح من أجمل الفواكه و قيمته الغذائية عالية بس كل اللي نعرفه عنه إننا نقطعه و ناكله أو نعمله فطيرة تفاح بالقرفة ، النهاردة هنقدمه بشكل جديد يفتح النفس و هيبقي حلو قوي في ليالي الخريف و هيملا مطبخك بريحة حلوة هتجمع كل اسرتك ، و ممكن تقدميه لضيوفك أكيد هيعجبهم و أولادك لو مش بيحبوا التفاح ، أكيد هيحبوه بالطريقة دي . و طبعاً علشان مفيش أجمل من الحاجات الحلوة اللي ممكن تتعمل في وقت قصير وقت ما يكون نفسك تاكلي حاجة حلوة ، أجمل حاجة في وصفة النهارده إنها بتتعمل في 10 دقايق بس ، يلا مع بعض نعمل شرايح التفاح المقرمش بصوص الكراميل .
جهزي المقادير
4 تفاح أخضر أو أحمر حسب المتوفر ، فنجان زبدة ، فنجان سكر ، ½ فنجان دقيق ، زيت للقلية ، معلقة كبيرة قرفة ، معلقة سكر.
مقادير الديبنج
فنجان جبن كريمي ، فنجان لبن ، كيس كريم جانتيه ، فنجان صوص الكراميل .
حضري التفاح
قشري التفاح و قطعيه شرايح أو مكعبات .
جهزي الزبدة و السكر
في طبق صغير ضيفي فنجان زبدة و فنجان سكر و إمزجيهم كويس ، و ضيفي ليهم قطع التفاح ، و ده هيمنع التفاح من إنه يتحرق .
غطي الشرايح بالدقيق
خرجي قطع التفاح من مزيج السكر و الزبدة و قلبيها كويس في الدقيق بحيث تتغطي كلها بيه .
إقلي شرايح التفاح
حطي زيت القلية في طاسة و سخنيه و حطي فيها شرايح التفاح المتغطية بالدقيق ، و قلبي الشرايح علي الجانبين لحد ما تبقي لونها ذهبي ، خرجي شرايح التفاح علي مناديل مطبخ علشان تمتص الزيت .
رشي السكر و القرفة
حطي شرايح التفاح في طبق التقديم و رشي عليه معلقة سكر و معلقة قرفة .
جهزي الديبنج
إضربي كيس الكريم جانتيه و فنجان لبن كويس بالمضرب ، ضيفي بعد كده الجبنة الكريمي ، و صوص الكراميل و قلبي ، كده عملنا الديبنج اللي هنقدمه مع شرايح التفاح المقرمش .
نصائــــح
علشان النتيجة تكون حلوة و إنتي بتقلي شرايح التفاح خلي مسافة بين كل شريحتين .
ممكن تشتري صوص الكراميل لكن ممكن برضوا تعمليه و بكده هيكون أحلي و أرخص ، و هنقولك إزاي في خطوات بسيطة تعملي صوص الكراميل . حطي كوباية سكر مع معلقة قرفة علي نار هادية جدا لحد ما يتكرمل ، ضيفي 2 كوباية لبن و معلقة زبدة علي الكراميل و هو ساخن و قلبي كويس قو
ممكن تبدلي أو تغيري في المقادير زي ما تحبي و استمتعي بشرايح التفاح المقرمش بصوص الكراميل .
#تفاح مكرمل بالسكر, #طريقة التفاح بالكراميل, #طريقة عمل التفاح المكرمل, #طريقة عمل التفاح بالعسل الاسود, #طريقة عمل تفاح الفريسكا, #طريقة عمل تفاح بالكراميل فتكات, #طريقة عمل حلاوة التفاح
تعليقات
إرسال تعليق