دايما بنفكر ان وقت الاجازة وقت كبير و فاضي مفيهوش اي حاجة عشان نعملها ونبدا نقضية يااما علي الشات يااما نقابل نفس صحابنا اللي لسة سايبنهم علي الفيس بوك ، مع ان وقت الامتحانات والدراسة بنكون مأجلين حاجات كتير عشان مش عارفين نعملها لان مفيش وقت ، ولو عايز تستغل اجازتك صح قدامك اكتر من طريقة تخلي بيها الاجازة طريقة تظبط بيها نظام حياتك وتخليك مستعد تستقبل السنة الدراسية الجديدة بشكل افضل اتبع الخطوات التالية:-
العب رياضة
جربت تلعب يوجا؟ أو تصفي ذهنك قبل كده؟
غالبا في الدراسة الوقت كلة بيروح في المذاكرة والمدرسة او الجامعة والاكل والنوم وبيتحول اليوم لروتين قاتل صعب ندخل فيه عادة جديدة مش متعودين عليها او تكون مش جزء اساسي من يومنا ،وفي الاجازة تقدر تعود نفسك انك تلعب رياضه بشكل اساسي في يومك بحيث لما ترجع لدراستك تاني تقدر تخصص وقت من يومك للرياضة وغالبا هيكون بسهولة جدا لانها هتتحول لعادة هيكون صعب تتخلي عنها
نمي موهبتك
كلنا بدون استثناء عندنا مواهب مفيش انسان اتخلق بدون موهبة وفي ناس اتخلقت باكتر من موهبة، لكن الاغلبية مبيشتغلش عليها ولا يطورها بحجة الظروف ومهما كان السب سواء كان الظروف او الكسل بس وقت الاجازة عندك فرصة كبيرة عشان تنمي موهبتك او حتي تكتشفها لو لسه متعرفش هي ايه ودلوقتي تقدر بسهولة جدا تنميها من مكانك من خلال الكورسات الاون لاين اللي موجودة علي الانترنت
جرب تتعلم تصوير
تتعلم تعزف على ألة موسيقية
او تتعلم الرسم وانواعة
او تقرا في مجال جديد متكنش بتعرف عنه حاجة
او تتعلم فن النحت
او لو بتحب الشعر ممكن تسمع شعر عربي بيتنطق صح للناس اللي بتحب الفصحى ونفسها تطور فيها.. القناة دي على اليوتيوب عليها حاجات كتير حلوة
https://goo.gl/1LCP8S
اتعلم مهارة جديدة
خلي الاجازة وقت تخرج منه بمهارة اكتسبتها تقدر تستقبل بيها السنة الدراسية الجديدة بشكل مختلف زي الخط العربي_والهاند ميد_او لغة جديدة _مهارات التعامل مع الاشخاص او اي مهارة تكون كنت حابب تكتسبها بس مكنش عندك الوقت ليها وبعد كده تقدر تخلي المهارة دي تكسر روتين يومك وانت بتزاكر لو خصصت نص ساعة في يومك ليها
جمع صحابك وجرب تسمع فلم وثائقي
الافلام الوثائقية بتزيد مخزونك اللغوي .. وتقدر تستفيد منها في المناقشات الحوارية اللي بتكون في الفلم ده غير كمية المعلومات المهولة اللي بتطلع منها لو انت مبتحبش القراءة وعايز تستفيد بشكل ممتع
اتعلمي طبخة جديدة
جربي تعزمي اهلك او صحابك علي اكلة جديدة من ايدك ومهما كانت النتيجة بس هتستمعي جدا وهتتعلمي حاجة جديدة
اكتشف اماكن جديدة
جرب تروح الواحات او الاقصر واسوان او الفيوم واتعرف علي عادات جديدة للناس وجرب تعمل زيهم وتتعود عليها وبعدين ترجع لحياتك الطبيعية من تاني هتحس انك قادر تستقبل السنة الجديدة بشكل مختلف
علم طفل حاجة مفيدة
لو بتحب تفيد غيرك وخصوصا لو بتحب الأطفال ممكن تعمل كورس خفيف كدة ساعه في اليوم وتعلمهم حاجة مثلا “مادة تكون عليهم السنة اللي بعدها او مهارة بتعرف تعملها لو بتعرف ترسم او تقرالهم كتاب او لوحتي هتتعلم حاجة مخصوص وتشرحهالهم او تحفظهم قران او احاديث وممكن تقرالهم قصة مفيدة وتحاول تكون قصة حقيقية او تقرالهم حاجه من التاريخ وتشرحهالهم ” هتفرح جدا انك كنت سبب في توصيل معلومة لطفل هتفضل معاه طول عمره وكمان هتنمي مهاراتك بسرعة جدا
ساعد غيرك
ممكن تخصص جزء من يومك وتزور فيه دار ايتام او دار مسنين وتقضي معاهم جزء من وقتك او تروح مستشفي زي 57357 وممكن تعمل مبادرة وتنزل مع صحابك تنضفوا الشوارع وممكن تنزل قرية وتبدا تعلم ناس امية القراءة والكتابة او تتطوع في جمعية خيرية
تعليقات
إرسال تعليق