ازاي تتغلب علي ضغوط واعباء الحياة اليومية

ازاي تتغلب علي ضغوط واعباء الحياة اليومية ؟
يوميا كل واحد فينا بيصحي وبيدا يستعد ليومه بنشاط بس تدريجيا بيفضل يحصل سلسلة من الاحداث والمواقف اللي بتخلي عليه كم كبير جدا من الضغوط وحاسس بالقلق والتوتر والخنقة والعجز احيانا لو كانت الضغوط دي يومية بشكل مستمر ، بيبقي من عارف المشكلة فين او ايه السبب او الحل ايه ؟

1 اسال نفسك
ازاي تتغلب علي ضغوط واعباء الحياة اليومية ؟ اول حاجة لازم تعملها عشان تقدر تقلل من الضغوط دي تسال نفسك هل الضغوط دي مستمره ؟ هل انا يوميا حاسس بان عليا ضغوط كتير وعبئ مش قادر اتحمله ؟ ولا الضغوط دي مؤقته بقالها فترة صغيرة يومين او حتي شهر ؟
وهنا السؤال دا اجابتة هي نص الحل لان الضغوط دي لو كانت مستمرة بشكل يومي فده يدل علي وجود مشكلة /مشاكل ما موجودة بصفة مستمرة والشخص بيتعامل معاها غلط او مبيحلهاش من الاساس ، لو كان الاحساس بالضغط لفترة مؤقته فده في الغالب بيبقي بسبب ظرف معين بيمر بيه الشخص بمجرد اما يتغير الظرف ده يتحسن هيبدا يختفي الضغط معاه .

استخدم حلول جديدة ، لان الضغوط في الغالب بتبقي جرس انذار بينبهك لمشاكلك او الحاجات اللي بتؤرقك واللي محتاجة لحلول غير الحلول التقليدية اللي ماظهرتش اي نتايج ايجابية .

2 حط خطة محددة
عدم اتباع الشخص لخطة وانه يمشي الحياة عشوائيا هو الاختيار السهل لكن هو الاختيار اللي هيخليه دايما بيلف في دايرة ضغوضات الحياه اللي بتزيد كل يوم عن اللي قبله لانه مبياخدش خطوة جديدة لتغير الوضع السئ او المشكله.

حدد ايه هي المشاكل اللي مسببالك ضغوط وحط خطط وطرق لحلها ولنفترض انك اكتشفت انك مضغوط بشكل يومي سواء بسبب المصاريف اللي عليك محتاج توفرها شهريا لاسرتك ومش قادر تغطيها او بسبب انك مش حابب شغلك او شايف انه مبيقدملكش المقابل اللي تستاهله ، او شايف انك محتاج تتجوز ومش معاك المصاريف الكافية للجواز الخ .. دي كلها مشاكل ممكن تعملها خطة تحلها و كل الحاجات دي من ضمن الحاجات اللي ممكن تخليك دايما حاسس ان عليك عبئ او ضغط او فيه حاجة عايز تنجزها ومش قادر وبالتالي عملالك توتر واحباط ، فالحل الامثل انك تنظم حياتك وتعملها خطوات محددة السنه دي هكون بدرس مجال كذا عشان السنه اللي بعدها اقدر اتنقل لشغل افضل بحبه ويزود من دخلي
خدها كمراحل يعني انك تبدا تحط خطة للمستقبل مكونه من مراحل وتمشي عليها علي سبيل المثال ضغط المصاريف اللي محتاجها شهريا ومش قادر توفرها يبقي الخطة كالاتي اللي مفروض تحطها انك تشوف ايه الكورسات اللي في مجالك اللي لو اتعلمتها هتفرق معاك حتي لو كانت هتضغطك اكتر في المصاريف ولو لفترة لانك بالطريقة دي بتسثمر في نفسك وده اللي هيخليك بعد كده تقدر تحقق اللي بتحلم بيه و تحاول تطور من نفسك وامكانياتك وتنقل لشغل افضل مستقبليا بيوفرلك راتب اكبر وده هيخليك يوميا ان في جديد بتعمله عشان تغير من وضعك وده في حد ذاته هيحسسك انك قادر تتخطي المشكله وبالتالي هيقلل احساسك بالضغط او تحط خطة تانية انك تدرس مشروع كويس لفترة طويلة وتبدا تخطط له وتحط خطوات تمشي عليها يوميا عشان تقدر تنفذه او الوضع هيفضل سئ والضغوط بتفضل تزيد كل ما الشخص مفكرش يحسن من وضعه بكل الطرق ولو جربت طريقه او طريقتين وفشلوا ففي الف طريقة تانيه ممكن تنجح.

3 متأجلش
اكتب يوميا في مفكره عندك اللي محتاج تعمله في يومك في خطوات و حاول تنظم وقتك وكل حاجة تنفذها تعمل علامه عليها ، ولو اضطريت تاجل حاجه حاول تنفذها اليوم اللي بعده مباشرة متاجلهاش فترة طويلة .

متخليش دايما باستمرار عندك حاجات كتير متراكمه عليك سواء شغل او حاجات محتاجها ضروري وعايز تشتريها ايا كان التسويف بشكل عام بيخليك دايما مضغوط ومحتاج تقوم بحاجات كتير في وقت قصير وبيخلي دايما عندك مشاكل سواء في حياتك او في شغلك ، حاول تقوم بمهامك في وقتها بدل من تاجليها .

4 ابعد عن الاشخاص المزعجين
لو في شخص في حياتك دايما مسببلك ازعاج او ضغط او دايما في بينكوا مشاكل بشكل مستمر وبتحس ان هو من الحاجات اللي مسببالك توتر وقلق طول الوقت حاول تتجنب التعامل او الكلام معاه ولو مضطر للتعامل معاه فحاول تتجنب الدخول معاه في نقاشات طويله غير مثمره ،تعامل في اضيق الحدود

5 نام في مكان مريح نضيف
النوم وراحة الجسم من الحاجات الأساسية اللي بتخفف من ضغط طول اليوم واللي بتخليه يرجع يستعيد نشاطه من تاني خلي المكان اللي بتنام فيه تحديدا مريح سواء المراتب او المخدات ، وحاول توفر جو جميل و هادي علي قد ما تقدر.

حاول علي قد ما تقدر يكون المكان اللي بتقعد فيه معظم يومك هادي ومريح وجميل ، كل فترة جدد فيه تجديدات بسيطة تضيف علي المكان حيوية وجمال لان المكان اللي بنتواجد فيه بشكل مباشر او غير مباشر بياثر علينا وعلي راحتنا النفسية وعلي احساسنا لو متواجدين في مكان جميل وجو حلو بيخلي عندنا هدوء وسلام وبيزود من قدرة الشخص علي الإنتاج او الابداع ، ولو متواجدين في مكان مليان بالفوضي والعشوائية بيخلي عندنا ضغط عصبي وبيخلينا سريعي الانفعال ومتوترين .

6 العب رياضة
الرياضه بشكل عام بكل انواعها من الحاجات اللي بتقلل الضغوطات بشكل مباشر سواء الجري او السباحه او كرة القدم او حتي المشي في الهوا الطلق ، حافظ علي لعب الرياضة اسبوعيا علي الاقل تلت ايام هيفرق معاك بشكل كبير وهيقلل من احساسك بالضغوط وهيفرغها باستمرار .

7 سافر
لو كنت في جو عام كله مليان بالضغوط وحاولت بكل الطرق انك تهيئ الاوضاع حواليك ومقدرتش وحاسس انه يومك كله عبارة عن ضغوط وصراعات ، فحاول تسافر اي مكان تاني الظروف فيه تبقي انسب وتقدر تعيش حياتك من غير ضغوط من جميع الاطراف حواليك ،في الاف الاماكن والبلاد اللي ظوفها مختلفة عن التانية .

idea نصائــــح
اسمع واقرأ قصص ناس ناجحة ده هيديك حماس وطاقة تكمل .
اسمع موسيقي هادية .
زور حد بتحبه واتكلم معاه .
حل مشاكلك المستمره