رمضان مش مجرد شهر للصيام، رمضان فرصة بتيجي مرة واحدة في السنة ومختلف في كل حاجه فيه ” في وقت وطريقة الاكل وفي نظام النوم ووقت الشغل والتعبد، فرصة للتغير الكلي الشامل لشخصيتك ونظام حياتك بأكثر من طريقة ،وعشان تقدر تستفيد من رمضان باقصي درجة ممكنة اتبع الخطوات التالية :-
استغل الصيام وظبط جسمك
لما بتقرر تعمل رجيم في الأيام العادية بيكون صعب جدا لان الاكل قدامك 24 ساعة فالرجيم أقصاه معاك مبيعديش اكتر من 3 ايام ،وشهر رمضان فرصة حلوة جدا عشان تخس لانك بتصوم 16 ساعة تقريبا عن الاكل ومفيش أشخاص قدامك بتاكل وتضايقك
استغل الفرصة دي وحاول تتجنب انك تاكل كتير في الفطار عشان تعوض الجوع لانك هتوسع معدتك بسبب الاكل الكتير ووزنك هيزيد جدا ،وبعد رمضان مش هتقدر بسهولة تقلل نسبة اكلك تاني لان المعدة بتنكمش بسبب الصيام لفترة طويلة فدي فرصة كويسة جدا لتقليل الأكل وتقليل الوزن عن طريق
شرب ميه قبل وأثناء الأكل عشان المعدة تتملي وتحس بالشبع بنسبة اكل قليلة
الأكل على فترات لأن الأكل على فترات بيزيد نسبة الحرق
الابتعاد عن الدهون والمقليات عشان متتعبش المعدة وفي نفس الوقت بتبوظ اي معدل للدهون بيتحرق في جسمك
غير شخصيتك للافضل
“حاول متخرجش من رمضان بالجوع بس” بمعني ان في كل الاحوال انت هتكون صايم فاستغل صيامك بكل الطرق الممكنة واي عادة سلبية أو أي عادة عايز تكتسبها بتضايقك في شخصيتك تقدر تغيرها عن طريق
خلى الصيام بنية تغير العادة دي سواء كانت كذب أو نفاق أو عصبية أو غرور أو تردد أو تسرع في اتخاذ القرارات والشهر كفيل يحولك الفكرة لعادة مستمرة
خلي عندك بديل للعادة السلبية بعادة إيجابية تتدرب عليها أثناء رمضان وهتاخد اجرين، اجر انك بتطور من نفسك وعايز تحسنها بالعادة الإيجابية واجر تغير العادة السلبية
رمضان شهر استجابة للدعوات ادعي كتير لو مش قادر تغير نفسك وخلي عبادتك تساعدك لان دي من اكتر العبادات اللي ربنا بيحبها
اكتساب أو ترك أي عادة مش صعب لكن محتاج تعود ورمضان 30 يوم متواصلين هيساعدك على ده
غير روتين حياتك
وقت رمضان ونظام اليوم فيه والنوم مختلف عن بقية السنة وفرصة كبيرة لتغير الروتين الدائم والملل عن طريق:
تغير مواعيد النوم
في العادي والاغلب من الناس اما انه بينام الساعة 12 أو بعد كده لو معندوش حاجة الصبح بدري ،و رمضان 30 يوم ،استغلهم في كسر الروتين ده وجرب تنام من بعد العشا وتصحي الساعه 1 او 2 تقريبا هتكون نمت 5 ساعات ع الاقل وتصلي قيام الليل وتتسحر وتقرا قران وتنام ساعة أو ساعتين
وبكده هتقدر تبدأ يومك وانت فايق ونشيط هتحس بتغير هيفيدك لان ده افضل وقت للنوم بيتستفيد منه الجسم والعقل وبيخليك مركز و هتكون جربت حاجة جديدة لو عجبتك واخدت عليها هتفضل تعملها ولو حبيت تغيرها تاني هتكون مخسرتش حاجة
تنظيم الوقت
ولو عندك مشكلة مع تنظيم الوقت تقدر في شهر رمضان تعود نفسك وتظبط وقتك لان اغلب اليوم بيكون متنظم لوحده ، الإفطار في وقت ، والسحور في وقت ، والعبادة في وقت”صلاة التراويح” باقي عليك باقي اليوم هيكون سهل انك تنظمه ما بين نومك و عبادتك و دراستك او شغلك و قرايبك او بيتك واصحابك وهيكون سهل عليك تنظم وقتك بعد رمضان لانها هتكون عادة بالنسبالك
استغل العزومات في الخير
رمضان بيلم الاهل والقرايب بحكم الفطار والعزومات وده ممكن يحصل في الأيام العادية لكن لو عملته في رمضان بنية صلة الرحم حسناتك هتضاعف لمجرد تغيير النية والفعل واحد
نصائــــح
قبل رمضان لازم تمهد لنفسك وتعرف ان رمضان مش الغرض من تشريع الجوع ،رمضان فرصة للتغير فااستغلها صح
حاول تكون نفسك بمعنى انك متحاولش تعمل عبادة زيادة لمجرد انك شفت حد بيعملها وعايز تسبقة فيها وتتحول عبادتك لمجرد رقم قياسي عايز تتخطاه زي انك تشوف حد بيختم القرآن 3 مرات فأنت عايز توصل للرقم ده بكل الطرق الممكنة
وافتكر دايما ان “احب الاعمال الي الله ادومها وان قلت” يعني قبل رمضان نظم وقتك بحيث تقدر تعرف هتقدر تخصص لعبادتك كام ساعة ومتضايقش لو وقتك مش هيسمع بكتير لانك تقدر تحول كل اعمالك لعباده في رمضان لمجرد تغيير النية في كل أفعالك لانك بتعملها ارضاءا لله
#المفرطون في رمضان, #خطبة كيف نستفيد من رمضان, #كيف استفيد من وقتي في رمضان, #كيف استفيد من يومي في رمضان, #كيف نستفيد من رمضان, #ماذا استفدت من رمضان, #ماذا افعل في رمضان
تعليقات
إرسال تعليق