ازاي تواسي شخص في شدته

اكتر وقت بيظهر فيه اهميه الناس المقربين مننا وقت دخول شخص في حالة حزن بسبب وفاة حد قريب منه او بسبب ظرف صعب بيمر بيه ، الوقت ده بيبقي اكتر وقت الشخص محتاج فيه دعم من اللي حواليه ، عدم وجود مواساة او اهتمام من المقربين في الوقت ده بيسبب للشخص ضيق اكتر وممكن بعدها يحاول يبعد عنهم كلهم بسبب احساسه بعدم الاهتمام او ان مفيش حد بيدعمه .

واسيه من قلبك

عشان تواسي حد بجد وتقدر تخفف عنه لازم يحس انك حاسس بيه ومتعاطف معاه ، مش رايح بدافع معين انك بتعمل واجب او لمجرد انك تحسسه انك واقف جمبه ..الخ احساسك الحقيقي بالتعاطف معاه وانك بتتقاسم معاه نفس المشاعر وحاسس بيه من الحاجات اللي ممكن تخفف عنه بشكل كبير لكن لو بشكل طبيعي او حقيقي غير مبتذلكواقف

اسمع ليه

كتير من الاوقات الشخص بيبقي بيحكي ومش محتاج اجابه او ان حد يديله حلول في الفتره دي هو بيبقي محتاج يتكلم ويعبر عن مشاعره ويحكي مواقف واحداث كتير جدا ، في الوقت ده مطلوب منك غير انك تبقي مستمع جيد وعندك صبر وتهون عليه لان هو في الوقت ده الافضل انو يحكي ويطلع كل المشاعر اللي جواه ويرتاح افضل من كتمها .

حاول متقاطعهوش في وسط كلامه وتقوله كلمات تحسسه انك متفهم موقفه زي فعلا عندك حقك ، او كلامك صح ،او انا حاسس بيك الخ..

حسسه انك انت كمان بتحب تتكلم معاه وبترتاح لما بتتكلم معاه وانه لو عايز يكلمك في اي وقت انت هتبقي مبسوط لان في الوقت دا الشخص بيبقي حاسس انو حمل تقيل علي اللي حواليه او انه مسسب لهم مشاكل ملهومش دخل فيها ، حاول تقوله انه ميترددش لو احتاجك في اي وقت .

احكيله مواقف مشابهه

بعد ما يتكلم ويطلع كل اللي جواه حاول تحكيله مواقف مشابهه مريت بيها وتحكيله احساسك ساعتها وكل الظروف الصعبه اللي مريت بيها وبعدها تقوله ازاي قدرت تخرج من المحنه دي والاحداث اللي حصلت بعدها خرجتك من حزنك ومحنتك لكن في البداية سيبه يحكي هو الاول كل اللي عنده .

ضحكه

بعد ما يكون اتكلم عن كل اللي حاسس بيه وبقي الوقت مناسب حاول تخليه يبتسم عن طريق انك تفكره باسلوب هادي في وسط كلامكوا بحاجات حلوه مريتوا بيها مع بعض او ذكريات جميله عدت عليكوا احداث حلوه حصلتلكوا في حياتكوا ، ذكرياتكوا وانتوا صغيرين ..الخ

بعدين حاول تضحكه ان امكن هزر معاه ، قوله خبر حلو ، ده هيديله دعم بشكل كبير وهيخرجه ولو بشكل مؤقت من حالة الاكتئاب والحزن مع الوقت والايام هيبدا مجرد اما يشوفك يحس ان ده بيخفف عنه كتير وهيحس براحه نفسيه .

فاجئه بحاجات بيحبها

حاول تجيبله هديه بس يكون حاجه بيحبها او كان عاوز يشتريها او ليها علاقه بحاجه كان بيفكر فيها ده بشكل كبير هيخليه يحس انك مهتم بيه ومهتم تشوفه مبسوط وفرحان وفعلا ده هيبسطه ويفرحه بشكل كبير .

فجأه بخروجه زي انك تحجز تكت سينما لفيلم بيحبه او لمكان هو بيحب يقعد فيه هيرفض الفكره في الاول بشكل كبير بسبب انو مضايق ومش قادر يخرج وتعبان لكن حاول تقنعه و تقوله انه لازم يخرج وان خروجك معاه هيفرق معاك بشكل كبير وانك خلاص حجزت المكان ، الخروج من الحاجات اللي هتخليه يخرج من حالة العزلة والافكار السيئه المستمره ووجودك جمبه باستمرار ودعمه هيفرق معاه جدا.

اقعد معاه في وقت سكوته

حاول تقعد معاه حتي لو مش بتتكلموا او مش حابب يتكلم او تعبان ، ممكن تجيب حاجه تقرئها او تعملها وتاخدها تعملها عنده في بيته من غير ما تحاول تضغط عليه او تحسسه بوجودك ، ده هيحسسه انك مهتم براحته وانك مهتم تتطمن عليه طول الوقت، وجودك جمبه معظم الوقت حتي في الاوقات اللي مش حابب يتكلم فيها هيساعده بشكل كبير انو ميفكرش في الحدث او الظرف الصعب ده ويتخطاه وانه مش لوحده وفي ناس معاه ومهتمه براحته .

سيبه ينفس عن حزنه

التعبير عن الحزن والبكاء احيانا بيكون مفيد ومريح مش شرط يكون مضر لانه بيعمله حاله من التنفيس عن غضبه وحزنه لكن لفترات محددة ، لان الدخول في حالة من البكاء الهستيري المتواصل كمان مضرة ، سيبه يعبر عن حزنه لفترهمن الوقت وكل اللي عليك انك بس تحضنه .

غيرله طريقة تفكيره

في الفتره دي بيكون الشخص كل اللي افكار اللي بتدور في دماغه عن الحياه والناس افكار سيئه و تشاؤميه بسبب حالة الحزن اللي الشخص بيكون فيها حاول تناقش معاه الافكار دي وتوضحله الجانب التاني منها اللي هو مش شايفه ، ايه الجانب الايجابي اللي في ازمته …

علي سبيل المثال لو قالك ان الانسان كل ما بيحب حاجه بتروح منه الخ .. قوله عندك حق احيانا في حاجات كبيره بتروح مننا وبنبقي حابين وجودها بس ربنا بعدها بيعوضنا عن حاجات اكتر وبيرزقنا الصبر وبيخلي في طريقنا ناس تساعدنا مناقشتك معاه للافكار السيئة دي هيساعده كتير انه يفكر بطريقة تانيه وتقلل من حدة حزنه …

طبق الطريقه دي علي جميع الافكار السيئه اللي بتحاول تستحوذ عليه طول الوقت ، لان في الفتره دي الشخص ممكن يتغير تغير كلي بسبب اقتناعه بالافكار السيئة دي .

متستعجلش النتايج لمواساة اي حد

احيانا الظروف اللي بتحصل بتبقي اصعب من ان الشخص يتخطاها بسهوله وبيبقي الشخص في حالة من الالم ورفض وعدم تقبل اللي حصل ، مسببله حاله من الحزن بيبقي صعب الخروج منها والتاقلم علي الوضع الجديد .

متستعجلش النتايج واعرف ان هيبدا ينسي ويتاقلم بالوقت وده هياخد فتره طويله او علي الاقل مش قصيرة ، ومش شرط تعمل الخطوات دي وتجيب تاثير من اول مره فحاول تكررها وتصبر وتعرف ان هو مش حابب حالة الحزن اللي هو فيها لكن دهشئ خارج عن ارادته هيتحل مع الوقت .

متستغربش لما تعمل الخطوات اللي فاتت دي وتبقي سايبه كويس ومبسوط وترجع تزوره تاني تلاقيه رجع لحالته الاولي ، كل ده شئ طبيعي انه بيفتكر الاحداث او الموقف اللي مر بيها وبيرجع يدخل في حالة حزن من جديد ، فحاول تتفهم ده وتساعده انو يتخطاه .

نصائــــح عند مواساة شخص

كلنا بنمر بظروف صعبه وكلنا بنحتاج اللي يقف جمبنا في الوقت ده .

انك تحاول تساعد شخص من غير هدف ده هيخليك سعيد انت كمان .

ساعد غيرك تجد من يساعدك .

من الطبيعي اننا نكون جمب بعض وقت الفرح لكن الفرض اننا نستحمل بعض وقت الشده .

 #فن المواساة, #كلام مواساة الحزين, #كلمات تواسي المتضايق, #كلمات لاسعاد شخص, #كيف اسعد شخص بالكلام, #كيف تواسي حبيبك, #كيف تواسي شخص يبكي, #مواساة شخص فقد غالي، #كيف اواسي شخص متضايف، #كيف تواسي شخص فقد غالي, #كيف أساعد شخص مهموم,