الشوربة علي أي سفرة بتزينها و بتديها جمال ، و محدش يقدر يقاومها صغير و لا كبير و خصوصاً في فصل الشتا ، اللي خلاص كلها أيام و ندخل عليه . الحلو في الشوربة إنها ممكن تكون وجبة لوحدها جنب شوية عيش محمص و سلطة أو تاكليها كطبق جانبي فاتح للشهية مع أي أكلة تقريباً . طيب إيه رأيك لو قدمنالك الشوربة النهارده بطريقة جديدة و غير تقليدية ؟ يعني مش شوربة لسان عصفور و لا خضار زي ما متعودين نعمل علطول . تعالي معانا نشوف إزاي نعمل شوربة الذرة باللحم ، شوربة كل مكوناتها مغذية و شكلها يفتح النفس و ممكن تقدميها لعيلتك في أول أيام الشتا و نوعدك انهم هيحبوها. يلا بينا نشوف الخطوات .
جهزي مقادير شوربة الذرة باللحم
4 قطع لحم ، 2 فنجان ذرة حلوة مسلوقة ، 3 معالق كبيرة زبدة ، فنجان بصل مقطع صغير ، ¼ فنجان دقيق ، 2 فص ثوم مقطع ، فنجان بطاطس مقطع مكعبات ، ½ معلقة صغيرة زعتر ، معلقة صغيرة ملح ، معلقة صغيرة فلفل إسود ، معلقة كبيرة عسل ، فنجان جبنة شيدر مبشورة .
اسلقي اللحمة
اسلقي اللحمة و إنشليها من الشوربة و قطعيها مكعبات صغيرة ، و جهزي 5 فناجين شوربة علشان تستخدميها و تعملي شوربة الذرة باللحم .
جهزي الشوربة
حطي 3 معالق زبدة في حلة و علي نار هادية قلبي فنجان البصل المقطع لحد ما يصفر ، و ضيفي 2 فص ثوم مقطع و ¼ فنجان دقيق ، و بعد كده ضيفي 5 فنجان شوربة ( من الخطوة 2 ) و قلبي كويس .
ضيفي بقية مكونات شوربة الذرة باللحم
حطي علي الشوربة 2 فنجان ذرة حلوة مسلوقة ، فنجان بطاطس مقطع مكعبات ، معلقة صغيرة ملح ، معلقة صغيرة فلفل إسود ، ¼ معلقة زعتر ، و سيبي الشوربة علي النار لحد ما المكونات تستوي .
قسمي شوربة الذرة باللحم نصين
دلوقتي الشوربة بقت جاهزة و ممكن تقسميها نصين ، النص الأول إضربيه في المضرب لحد ما يبقي شبه سايل و بعدين ضيفيه علي النص التاني و حطي معلقة عسل و مكعبات اللحمة المسلوقة و قلبي علي النار لمدة 5 دقايق .
قدمي الشوربة و استمتعي
في طبق عميق إغرفي شوربة الذرة و رشي علي الوش فنجان جبنة شيدر مبشورة .
نصائــــح
علشان الشوربة متكلكعش ضيفي الشوربة و هي باردة علي الدقيق و قلبي كويس
علشان اللحمة تستوي أسرع ، متضيفيش الملح إلا في أخر دقايق من عملية السلق
ممكن تستبدلي الجبنة الشيدر بالجبنة الرومي المبشورة أو أي نوع جبنة متوفر عندك و ممكن كمان تستغني عن الجبنة خالص
لو ضيفتي بقدونس أو كزبرة مقطعة علي وش الشوربة هتديها شكل أجمل
#شوربة الذرة الحلوة, #شوربة الذرة الصينية, #شوربة الذرة بالحليب, #شوربة الذرة بالدجاج, #شوربة الذرة بدون دجاج, #شوربة ذرة بالكريمة, #شوربة ذرة سهلة, #طريقة عمل شوربة الذرة بالنشا
تعليقات
إرسال تعليق