الكباب أكلة محدش يقدر يقاومها ريحتها تجنن و شكلها علي السفرة يفتح نفسك حتي و لو شبعانة ، النهاردة هنعمل كباب الفراخ بصوص الثوم و الليمون بطريقة تقديم جديدة بعصيان الشوي ، في خطوات بسيطة و في دقايق معدودة هنعمل أحلي طبق كباب فراخ ممكن تدوقيه و تقدميه في العزومات و الحفلات و يدي لسفرتك شكل جديد ، يلا بينا نبدأ نعرف المقادير و الخطوات .
جهزي المقادير
4 قطع صدور فراخ ، ¾ فنجان زيت زيتون ، معلقة زيت (لدهن الشواية) ، معلقة عصير ليمون ، ليمونة لتزيين الطبق ، معلقة ثوم مبشور ، ½ معلقة ملح ، ½ معلقة فلفل إسود ، ½ معلقة بهارات ، 2 معلقة بقدونس مقطع قطع صغيرة ، خضار سوتيه لتزيين الطبق .
جهزي الفراخ
إغسلي قطع الفراخ كويس و قطعيها شرايح علشان تستوي بسرعة .
حضري الصوص
ضيفي زيت الزيتون ، عصير الليمون ، الثوم ، البهارات ، الملح ، الفلفل الإسود و قلبي كويس لحد ما تختلط المكونات مع بعض .
ضيفي الصوص للفراخ
في طبق عميق ضيفي الصوص لشرايح الفراخ و قلبي لحد ما تتغطي الشرايح كلها بالصوص و حطي الطبق في الثلاجة لمدة 6 ساعات علشان النتيجة تكون أحسن بكتير .
جهزي عصيان الشوي
إنقعي عصيان الشوي في الميه لمدة 20 دقيقة علشان تدخل بسهولة في شرايح الفراخ و إبدأي دخلي عصيان الشوي في شرايح الفراخ بحرص .
إشوي الفراخ
إدهني الشواية بالزيت علشان الفراخ متلزقش و سخنيها و بعدين رصي شرايح الفراخ و قلبيها علي الجانبين ، لحد ما تتحول لللون الذهبي الجميل .
قدمي و استمتعي
بعد ما كباب الفراخ يستوي خرجيه في طبق التقديم و زينيه بالبقدونس و الخضار السوتيه و شرايح الليمون .
نصائــــح
علشان تخلي ريحة كباب الفراخ بالثوم و الليمون فعلا زي ريحة الشوي الجاهز، سخني فحمة و حطيها في ورقة الومنيوم في طبق التقديم و حطي عليها معلقة زيت أو زبدة سايحة و غطي الطبق كويس 10 دقايق و بعدين شيلي الفحمة و استمتعي بريحة الكباب .
ممكن تشوي مع كباب الفراخ بصل و فلفل ألوان و تزيني بيهم الطبق و كمان هتزودي القيمة الغذائية .
قدمي مع طبق كباب الفراخ الخضار المشوي و بطاطس محمرة أو مكرونة و بكده هتكون الوجبة متكاملة .
علشان أنسجة شرايح الفراخ تطري و تستوي بسهولة ممكن تحطي مع الصوص معلقة صغيرة خل .
الكمية فردين و يمكن زيادة الكمية حسب عدد الأفراد .
ممكن تزودي كمية الصوص شوية و ترشي منه علي شرايح الفراخ و هي بتشوي ، و تستمتعي بكباب الفراخ بصوص الثوم و الليمون .
#دجاج بالثوم والليمون والكزبرة, #دجاج بالليمون والثوم والزعتر, #دجاج بصوص الليمون والثوم, #فراخ كباب حله بالبطاطس, #كباب حلة بالفراخ والبطاطس, #كباب حله بصدور الفراخ
تعليقات
إرسال تعليق