ازاي تخلي ابنك يسمع الكلام

جزء كبير جدا من التربية أن الأم والأب يتكلموا مع الأطفال والأطفال يسمعوا الكلام. الطريقة الي بتتكلمي بيها مع طفلك مش بس هتعمله ازاي يتكلم مع الناس التانية لا دي كمان ممكن تأثر علي مدي استجابته للمطلوب منه هل هيسمع الكلام وينفذه ولا لا. وعشان تخلي ابنك يسمع الكلام اتبعي الخطوات التالية:

اصلاح العلاقة قبل تصحيح السلوك


مش ممكن أبدا أبنك يستجيب لك وانتي بتحاولي توجهيه اذا كانت العلاقة بينكوا مش علاقة طيبة مبنية علي الحب. اهتمي وخلي تركيزك الأول علي اصلاح العلاقة مع ابنك وخلي تاني أولوية لتصحيح سلوكه.

أبدئي باسمه


الخبراء بينصحوا انك لما تطلبي طلب من ابنك ابدئي الطلب باسمه زي: “أحمد، ممكن تجيب كذا من المطبخ؟” وان الطريقة البسيطة دي ممكن تخاليه متعاون معاكي أكتر.

كوني مختصرة


حاول تطلبي طلب واحد أو اتنين بالكتير في نفس الوقت. بلاش تطلبي طلبات كتير من الطفل مع بعض لأن الطفل ممكن يحس أنه مش هيقدر يعمل كل ده وبالتالي ممكن جدا يرفض يستجيبلك كليا.

ادعمي الطلب بسبب


لما تطلبي طلب من أولادك حاولي تكملي بقية الجملة بالسبب وراء الطلب ده. زي مثلا “محمد، خلص الواجب لأن المدرسة هتطلب تشوفه بكرة”. ده هيساعد الطفل أنه يتقبل المطلوب منه ويتعاون معاكي أكتر وينفذه.

استخدمي الكلام الإيجابي


الخبراء بيقولوا أن الأطفال لحد سن ٤ سنوات مش بيفهموا كلمه “لا” أو بمعني أدق لما بتقولي للطفل “لا” علي حاجة مش بيبقي عارف يتصرف ازاي زي مثلا “لا لا الكهربا لا” لكن الأفضل أنك تستخدمي الأسلوب الإيجابي أنك تقوليله يعمل ايه بدل ما بتقوليله ميعملش ايه زي “موسي، هاتلي اللعبة دي من فضلك” بدلا من “متمريش اللعبة علي الأرض”.

استخدمي طريقة “لما/يبقي”


من أفضل الطرق الي بتخالي الأطفال تنجز الأعمل الي مطلوبة منها هي الطريقة دي ببساطة هتقولي لابنك “لما تخلص أكل يبقي نتفرج علي الكارتون” أو “لما تخلص الواجب يبقي ممكن تقوم تلعب” ومن غير ما تجبري الطفل هو هيبقي عنده حرية الاختيار أنه ياكل أو يخلص الواجب أو لا بس هو مش هيقدر لا يشوف الكارتون ولا يلعب بالألعاب الا لما ياكل ويخلص الواجب.

اعطي اختيارات


الدراسات والتجربة اثبتوا أن الأطفال والبشر عموما بيكونوا أكثر تعاونا أما يحسوا أنهم بيختاروا زي مثلا “تحب تستحمي مع الكورة بتاعتك ولا مع الديناصور بتاعك” فالاختيار هو هيختار اي لعبة يستحم معها لكن مش في هل هيستحم ولا لا من الأساس.

نصائــــح
في طرق كتيرة تانية للتعامل مع الأطفال لكن أهم طريقة هي أنك تسيطري علي أعصابك وتحبي طفلك