في الشهر اللي قبل الامتحانات او في بداية الدراسه بنبقي عايزين نذاكر ومش عارفين بسبب اننا قاعدنا فتره منذاكرش وبسبب الكسل ومبيبقوش عارفين يبدؤا منين او يعملوا ايه ؟ انك تبقي مهيئ نفسيا ومستعد انك تبدا وتبداا بالفعل دي اهم خطوة عشان تذاكر جديا .
اعمل حسابك فى 10 ايام
خلي في 10 ايام اعتبرهم تمهيدين ، تبدا تتهئ فيهم لجو الدراسه والمذاكره هتبدا تفتح مقرر من المقررات اللي عليك يوميا وتقراه قراءة سريعه ، كانك بتقرا جورنال او خبر ،مجرد هترجع تعود نفسك علي القراءه يومياً من تاني هتكون بتاخد فكرة عامه عن المنهج.
وبالفعل هتقدر تكون الصوره دي وتعرف المنهج بيتكلم عن ايه وهتكون جمعت معلومات عن كل فرع او ماده عندك هتسهل عليك عملية المذاكره او هتكسر عندك الحاجز النفسي للمذاكره وهتخليك لما تيجي تذاكرها فعلا كمذاكره للمره التانيه هتكون اسهل وابسط .
مينفعش فجاه ننتقل من حالة عدم المذاكره اطلاقا والخمول والكسل ،لمذاكره قوية طول اليوم لان عقلك وجسمك هيحتاجوا علي الاقل 10 ايام تتعود فيهم علي النظام الجديد .
ذاكر مع صحابك
حاول تعمل جو يشجعك على المذاكرة من اول وجديد متحاولش تنتقل سريعا من الخروج يوميا وعدم المذاكره علي الاطلاق للعزله المفاجاه وانك عايز تحصل اكبر قدر ممكن من المعلومات فى أقل وقت ، هتصاب بالاحباط والملل ومش هتقدر تنجز حاجه
ابدأ إتجمع انت ومجموعة من أصحابك وابدأو مع بعض مش هتشعر ان انت لوحدك اللي عندك مشكله وعايز تذاكر لكن الأفضل انكوا تذاكروا مع بعض وحاولوا في النص تفتحوا مناقشه عن كل واحد قدر يفهم ايه من الجزئيه اللي قرئها دي
هتبدؤا تعمل اوقات بريك في النص وتهزروا وتضحكوا والجو ده نفسه حلو عشان يخليك تتشجع وتكمل وبمعني اصح تبدا تتفتح نفسك علي المذاكره
إبدأ بالأسهل دايماً
حاول تبدأ بالمواد الاكتر سهوله بالنسبالك او المواد اللي بتحبها ، لان ده هيخليك تنجز قدر من المعلومات وتحصل كويس وهيديك دفعه وحافز انك تكمل فى مذاكرة باقى المواد الأصعب .
ابدأ اعمل جدول بالمواد اللي عندك و عدد المواد وعدد الأجزاء في كل ماده ، خد اول جزء من كل ماده وحاول تاخد فكره سريعه عنها .
نظم وقتك
نظم اوقات النوم، حاول تخلي في اوقات ثابته بتصحي فيها واوقات ثابته بتنام فيها ويفضل تنام بدري وتصحى بدرى وقت الشروق . حاول توفر مناخ مريح ليك زي إنك تحضر مشروب معين بتحب تشربه الصبح أو إنك تسمع موسيقي من غير كلمات هاديه تخليك تركز وتقدر تبدأ يومك بطاقة تساعدك على المذاكر بشكل أفضل .
متأجلش لحد ما تضطر تبدأ
متقعدش تقول هبدا بكره هخلص ده وابدأ هلعب وابدأ وفي الاخر اليوم بيخلص ومبتبدأش ابدأ دلوقتي حالا وخلص اللي تقدر عليه ،وسيب الباقي لبكره بس علي الاقل هتبقي بدأت وهتبقي كسرت نقطة انك عندك حاجات كتير اوي .
حفز نفسك
حط حافز قوي قدامك علي مدي الترم عايز توصله وتحققه واربطه بنتيجه هتتحقق فى المستقبل واوعد نفسك بمكافاة معينه هتكافئ نفسك بيها لو وصلت للتقدير ده
على سبيل المثال حط هدف قدامك انك عايز تجيب جيد جدا ، وتربطه بانك لما تجيب جيد جدا التراكمي بتاعك هيبقي كويس وبالتالي هيبقي افضل في السي في عن لما تكون جايب مقبول وهكذا او اربطها باي نتيجه او هدف تاني تحبه وحط اهداف قريبه عايز تحققها انك تخلص جزء من مادة معينه وبكده هتكون عديت او قطعت جزء من المسافه
نصائــــح
في البدايه اعمل جو يشجعك بعد كده انت هتتشجع لوحدك
في طرق للمذاكره مسليه مش لازم تذاكر برتم واحد حاول تغير الأماكن اللى بتذاكر فيها وتغير الأسلوب اللى بتذاكر فيه
تعليقات
إرسال تعليق