القائمة الرئيسية

الصفحات

ازاى أخلى ابنى يعتمد على نفسه







كتير من الامهات بتستعجل علي اعتماد الطفل على نفسه وبتبدا تسيبه يعمل اشياء بدون معرفة فبتكون النتيجة انها بتؤدي لنتائج عكسية لانها بتكون قبل أوانها عشان نعود الطفل علي الاستقلال ونخليه يعتمد على نفسه اتبعي الخطوات التالية :-

 سيبيه للوقت المناسب


كل حاجة بيتعود عليها الطفل لو اتعود عليها بالغصب أو في غير أوانها بتأدي لنتيجة عكسية يعني مينفعش نوقف الطفل غصب عنه من غير اي مساعدة وهو لسه معندوش رغبة في المشي لأن بتكون عضلات رجله وعضلات الحوض وعضلات مخه منمتش بشكل يخليه يقف بشكل سليم

وممكن نيجي نوقفه ونسيبه يصاب الطفل بالإحباط والخوف ويتاخر فعلا في المشي والطريقة الصح اننا نهيأله الجو المناسب عشان يعرف يمشي لما عضلاته تكتمل بالشكل اللي يساعده يمشي زي اننا نحطله حاجات يسند عليها

ونفس الطريقة لما يجي يقعد نساعده بااننا نحطله سنادات تسنده وهو قاعد لحد مايعرف يسند نفسه ويقعد لوحده وطول مالطفل محتاج مساعدة مينفعش نسيبه لوحده بحجة أنه يعتمد على نفسه

وطول مالطفل خايف ينام لوحده مينفعش اسيبه ينام في اوضة لوحده لانها هتربي عنده الخوف وتخلق له ذكريات سيئة وكره لاوضته وهيتمسك اكتر بأنه مينمش لوحده والحل اننا نعمل للطفل اوضة ونعرفه ان دي اوضه مخصصه ليه ونعرفه ان دي اوضته وانه ممكن ينام فيها ونسيبه ينام معانا لحد مايطلب لوحده لان الطفل عامة بيبقي جواه حاجة طبيعية بتدفعه دايما انه يطور ويحسن من نفسه وطول ماهو مبيتغصبش علي حاجة يعملها هنلاقيه في وقت من الأوقات بيطلب انه يعملها

 قطعي الأكل قطع صغيرة


في وقت معين هنلاقي الطفل بيطلب انه يمسك المعلقة وياكل في الوقت ده لازم نساعده بأننا منزعقلوش لو وقع علي هدومه اكل او معرفش يوصل المعلقة لحد فمه ونسيبه لوحده يوقع مرة في مرة لحد مايعرف يمسكها كويس ونقدر نساعده عن طريق انك تقطعيلة الأكل مكعبات صغيرة عشان يقدر يمسكها وياكل لوحده

وتلبسي الطفل لبس مش مهم انه يتوسخ قبل ماياكل ولازم تعرفي انك لما تعمليله ساندوتش ويبدا ياكل فيه وهو صغير انه لازم هيوقع علي نفسه وهيبهدلها مينفعش تحبطي الطفل وتفضلي تديله تعليمات كتير عشان ميزهقش ويحبط وكمان هو لما يتعود ياكل لوحده هياخد ثقة في نفسه وهيتطور اكتر وبسرعة

 شجعيه يشيل طبقه بعد الاكل


كتير من الاطفال بيبقوا عايزين يشيلوا الأطباق ويساعدوا امهاتهم لكن الام بتخاف علي الطبق انه يتكسر خصوصا لو غالي وده اكبر غلط في حق الطفل ,وعشان تخليه يعتمد على نفسه لازم تشجعيه انه يشيل طبقه ولو اتكسر مش مشكلة اكيد خسارته مش زي خسارة ان الطفل يكون عنده عيب في شخصيته او ممكن تخصصي للأطفال أطباق رخيصة التكاليف بس المهم متكونش مضرة للاستخدام في حالة ان الاكل يكون سخن

 خليه يساعدك في جلب أدوات الاستحمام




لو عايزه تعودي طفلك يستحم لوحده بشرط انه ميكونش قبل ال6 سنين ويكون تحت اشرافك خليه يساعدك في جلب أدوات الاستخدام وهو هيكون مبسوط انه بيساعدك خليه يجبلك هدومه او الشامبو او الليفه

وتبدأي وانتي بتحميه تقوليله خطوات الاستحمام وتخليه يساعدك زي انه يمسك الدش او انتي تمسكي الدش وهو يغسل جسمه عشان تشجعيه يستحمي لوحده وده هيساعده علي الاستقلال

 اشتريله جزمه من غير رباط


لما يكون لبس وقلع الجزمه سهل هتساعدي الطفل أنه يستقل ويعتمد علي نفسه علي عكس ان الجزمه تكون برباط وصعب تتقلع وتتلبس هيفضل الطفل معتمد عليكي وياخد علي كده

 متسيبهوش اول يوم في الحضانة وتمشي


الطفل بيكون مستغرب الجو الجديد اللي هيتحط فيه والصح انك تقضي معاه اول يوم عشان ياخد ع الجو وانتي معاه ويبدأ يعرف المدرسة بتاعته وأصحابه ويتطمن وتاني يوم ممكن تقضي معاه نص يوم وتالت يوم تقضي معاه ساعتين و بالتدريج لحد ما تسيبيه لوحده و بالطريقة دي هيحب الحضانة ومش هيخاف وهيعرف يعتمد علي نفسه بطريقة صح

نصائــــح
عدم الغصب علي الاستقلالية مهم جدا في حياة الشخص لأنه بيترتب عليها كوارث لما يكبر لانه بيكره المسؤولية ويرميها علي شريك حياته
الطفل بطبيعته بيحب انه يستقل لكن في الوقت المناسب والحاجة الوحيدة اللي بتخليه ميعرفش يستقل هي أسلوب التربية الخاطئ ودورنا الوحيد بيكون إننا نشجعه نوفر له البيئة المناسبة للاستقلال


هل اعجبك الموضوع :

تعليقات