القائمة الرئيسية

الصفحات


تدبير مصروف البيت فتكات

فتكات تدبير مصروف البيت

في ظل الاحداث الحالية مع الغلاء المستمر في اسعار المنتجات والخدمات بقي المرتب او مصروف البيت مش مكفي احتياجات البيت الاساسية اللي في تزايد مستمر في المقال ده هنقولك اهم الخطوات اللي هتساعدك توفري من مصروف البيت بنسبة كبيرة لكن الاهم هو التنفيذ .

اشتري من وسط البلد

اعملي قايمة شهرية بطلباتك وطلبات اولادك وزوجك والبيت وانزلي اشتريها بجملتها من اماكن كتير في وسط البلد زي حارة اليهود او محمد نجيب او الرويعي الخ .. اسالي هتلاقي هناك كل شئ بتحتاجيه من الابرة للصاروخ ، كلها اماكن ممكن تشتري منها احتياجاتك واحتياجات بيتك واولادك بنص او ربع السعر اللي بتشريه من المحلات العادية ، مش هتصدقي كم المبالغ اللي هتوفريها عن السابق .

اشتري الخضار والفاكهه من السوق

الخضار والفاكهة من الحاجات اللي اسعارها مبالغ فيها في المولات ومحلات الخضروات ، جمعي طلبات بيتك واشتريها من السوق حتي لو كانت مسافته بعيده عنك ،هتوفري مبالغ كتيره وهتقدري تشتريها صابحة وطازجة .

 اشتري من الهايبر

اعملي قايمة باصناف الاكل اللي بتحتاجيها شهريا او اسبوعيا واشتريها من اقرب فروع لمحلات الجمله او الهايبر ماركت اللي بتنزل خصومات باستمرار ، لكن الافضل بدل ما تشتري اكتر من الحاجات اللي محتاجها .

اكتبي ورقة بالطلبات والتزمي بيها واحسبي سعرهم وخدي مبلغ علي اد الحاجات اللي محدده تشتريها ، والافضل كمان هو انك تنزلي للتسوق عموما وانتي شبعانه عشان ده بيقلل من السلوك الشرائي ليكي ، لان الجوع من المسببات الرئيسية لزيادة الشرا .

اشتري من محلات مستحضرات التجميل

اشتري مستحضرات العناية الخاصة بالجسم سواء الكريمات او الشامبوهات والشاور جيل او بامبرز الاطفال من محلات مستخضرات التجميل بدلا من الصيدلة ، هتكتشفي انك اشتريتي نفس المنتجات ولكن بسعر ارخص .

حضري لانش بوكس

اللانش بوكس من الحاجات اللي هتساعدك انك تحضري لاولادك وزوجك اكل ليهم اثناء الشغل او المدارس او الدروس يخليهم يقللوا من الاكل برة البيت والوجبات السريعة .

حاولي كمان تديلهم عصاير في ازايز تكون معاهم برة هتخليهم يقللوا من المشروبات الغازية وبكدة هتكوني ضمنتي لاولادك اكل صحي واوفر .

كمان ممكن تجهيزيلهم باستمرار كيك بالبيت او ايس كريم وحلويات زي البسبوسة والكنافه وغيره وتحطيه ليهم بالانش بوكس بدل الاكل لو كان مشوار سريع ده هيخليهم يقللوا من استخدام الكافيهات والمحلات اللي بتدفعهم اضعاف التمن .

قللي من الاكل الجاهز

حاولي تقللي من الاكل الجاهز علي قد ما تقدري وتجهزي وجبات من السريعة في البيت وخفيفة في الايام اللي بتكوني مرهقة فيها او تكوني مجهزي اكل بالفريزيز جاهز للتسوية ده هيخليكي توفري مبالغ كبيرة جدا من مصروف البيت الشهري .

قللي من الخروج في الكافيهات

الخروج للكافيهات والمولات من الحاجات اللي بتكلف الاسرة مصاريف شهرية اضافية كبيرة في غني عنها ، الافضل هو انك تقترحي علي اصحابك واصحاب اولادك بانكوا تتجمعوا في بيتكوا او في جناين او الاماكن المفتوحة عموما وخلي خروجكوا في الكفيهات في اوقات محددة .

جهزي ركن في شقتك سواء البلكونة او ركنة بالبيت او السطح مهيئة للتجمعات واللمة .

اتعلمي خياطة

زمان الخياطة كانت من الحاجات الاساسية في اي بيت ، وكانت كل ام بتقدر تعمل لاولادها لبسهم باقل التكاليف بمكنة الخياطة الخاصة بيها ، الخياطة من الحاجات السهل تعلميها استعيني بحد من قرايبك او اصحابك يعلمك او حتي كورس او عن طريق اليوتيوب هتوفرلك جزء كبير جدا من المصاريف في بند اللبس بعد الزيادة الكبيرة في اللبس علي القطعه الواحده ، في البيت هتقدري تعمليهم قطع مختلفة شهريا بسعر ارخص .

اعملي جدول لمصروفاتك

من المهم جدا انك تكتبي شهريا بالورقة والقلم المصروفات وايه الحاجات اللي اتصرفت فيها عشان تقدري تحددي ايه البند اللي فيه خلل او بينفق فيه مصروفات كبيرة تقدري تستغني عنه او تقللي استخدامه .

كمان الجدول مهم في انك تعملي ترتبي اولوياتك ، من المهم ان كل اول شهر يتحدد اولويات البيت واحتياجاته الاساسية اللي لا غنها عنها بعد كده نبدا نحط المصاريف الاضافية .

اعملي ميزانية للحوم

من المهم انك تعملي ميزانية شهرية للحوم والدواجن والاسماك وحددي الكمية اللي هتحتاجيها شهريا وتحاولي تقللي منها او تجيبي بدلها بدايل وتتعملي وجبات متنوعة ومكونتها بسيطة ، التنويع في الاكل مش بيحتاج لامكانيات كبيرة لكن بيحتاج لمهارة كويسة .

ابحثي عن العروض بالانترنت

لو محتاجة تشتري جهاز معين زي غسالة او تلاجة الخ .. فانسب حل انك تدوري علي العروض بالانترنت والخصومات هتلاقي حاجات كتير تناسبك ارخص او عليها عرض او بالقسط او مستعمله استعمال بسيط ، دوري هتلاقي حاجات كتير .

اعملي بند للطوارئ

من الضروري جدا ان يكون في ظرف كل شهر فيه جزء او بند من المرتب للطوارئ يشمل الطوارئ الطبية او العزومات والهدايا والمجاملات والسفر بيتحوش علي جمب في حالة حصل ظرف مرضي مفاجئ او اي ظرف ميحصلش اضطراب مفاجئ في المصروف واحتياج لمبلغ كبير فجاة .

نصائــــح
كتري من الصدقات والزكاة لانها هتساعد علي البركة في مالك وبيتك .

 #التحويش من مصروف البيت, #جدول تدبير مصروف البيت, #جدول مصروف البيت الشهري, #كيف اوفر من مصروف البيت فتكات, #مصروف البيت 1500, #مصروف البيت 500 جنيه, #مصروف البيت 600, #مصروف البيت بالاسبوع

هل اعجبك الموضوع :

تعليقات

تعليق واحد
إرسال تعليق
  1. نصائح للتوفير و ضبط ميزانية البيت��
    _________
    1-الطماطم اللي عندها ديب فريزر تشتري كميات و تغليها و تضربها فالخلاط و تسبك جزء و تتقسم فاكياس على اد الطبخة و البقية برضو قسموها فاكياس للمكرونة و اي حاجة محتاجة صلصة ������
    __________
    2-السمك هتشتريه حجم متوسط و بعدد افراد الاسرة علشان الهدر ������
    __________
    3-اشتري فرختين اخلي صدر فرخة و اعمليه بانيه تبلي و شيليه و الوراك يتقسم اتنين ممكن تعمليها مع صينية بطاطس الفرخة التانية قطعيها 8 قسميها جزء تبليه و اعمليه كنتاكي و جزء اعمليه مسلوق و محمر مع مكرونة مثلا و هيكل الصدر مع الكبد و القوانص هتسلقي الهيكل تعملي شوربة و تعملي رز بالبسلة و تقطعي الكبد و القوانص عليه اكلة خفيفة و سهلة ����
    ________
    4- اشتري كيلو لحمة صحيحة و كيلو مفروم انصاف الصحيحة قطعي نص قطع صغيرة و سويها مع فلفل و بصل و طماطم مقطعه و حمري مكعبات بطاطس و حطيهم فطاجن و دخليهم الفرن ياخدو وش و اعملي رز جنبها هتعملك اكلة محترمة مع طبق سلطة بسيط او حتى خس بس المفرومة مرة تعملي مكرونة بالبشاميل و مرة تطبخي خضار باللحمة المفرومة زي البسلة و السبانخ مش لازم كل مرة لحمة صحيحة ☺
    ________
    5-بالنسبة للرز و المكرونة كل ست عارفة اد ايه بياكلو ولادها و جوزها فهنعمل بالكوب على اد الاكلة علشان منرميش الرز و المكرونة غاليين ��
    _________
    6-طبعا غالبنا معاه بطاقة التموين و بيصرف عيش و كدا العيش تشتريه على الاد و تقطعيه ارباع يادوب يكفي الاكل و الباقي تحطيه فالفريزر الي هيتبقالك من نقط العيش تجيبي بيه شوية سلع تساعدك ������
    ________
    7-اشتري نص كيلو كبدة و نص سجق علشان تنوعي فأكلاتك مرة تعمليهم مع مكرونة و مرة مع بطاطس و سلطة مرة مع رز و هكذا
    ________
    8-وفري فاستهلاك الكهربا علشان الفاتورة متجيش بالشيء الفولاني غيري لمباتك و حطي لمبات موفرة و متخليش نور البيت كله شغال كفاية اوضة او اتنين بالكتير اعتمدي فالتدفئة على اللبس و بلاش الدفاية بتسحب كهربا كتيييير ✨
    ________
    9-الي عندها سخان بالكهربا تشغله بس عند الحاجة
    ________
    10-فالشتا بنحتاج كريمات للبشرة علشان الجفاف و التشققات فبدل ما تشتري كريم غالي هاتي يا قمر فازلين و نتيجته احلى من الكريم مليوووون مرة حطيه للوش و الايدين و الرجلين يستعملوه كل افراد الاسرة و تحفة
    ________
    11-بالنسبة للمنظفات طبعا غالية هتشتري من بتاع المنظفات كلور سايب للغسيل و للحمام علشان دهون اللي بتلزق عالسيراميك فالمطبخ و ملح ليمون و جركن صابون سائل الحاجات دي بتقعد فترة طويلة
    ________
    12-البيض اشتري الطبق على بعضه من محل الجملة هيوقف ارخص و هيقعد معاكي الشهر ������
    _________
    13-خضار الشتا احلى و اكتر من الصيف خزني منه للاوقات الي بتروحي تشتري فيها خضار مجمد و اي خضار زيادة عن طبختك اغليه غلوتين ف مية و شوية ملح و حطيه ف الفريزر هينفع ف وقت تاني ����
    ��������������������������

    ردحذف

إرسال تعليق