لو دايما في مشاكل في حياتك الاسرية خصوصا مع الاب بسبب رفضه الدائم لطلباتك واحتياجاتك مع احيانا قسوة في التعامل وفي صراعات دايما ما بينكوا بسبب حرصه الدائم علي توفير المصروفات والاحتفاظ بيها في المقال ده هنقولك عن خطوات عملية تخليك تقدر تقلل من المشكلة مع الوقت وهنقولك ازاي تتعامل مع الاب البخيل .
خطط لحياتك
مبدايا لازم تبقي عارف ان البخل من الطباع اللي غالبا بتكون ملازمة للشخص طول فترة حياته مش مستحيل تغيرها ولكن من الصعب تغيرها بنسبة كبيرة ولازم يكون التغير نابع من الشخص نفسه صاحب المشكلة …
من اهم الخطوات عشان تقدر تتعامل مع الاب البخيل انك تتأقلم وتتجنب قدر الاستطاعه الدخول معاه في خلافات ، لو كنت لسه في سن صغير ومضطر يكون مصدر دخلك كله من الاب حاول تعمل خطة لحياتك تقدر تدخل بيها دخل لنفسك خلال السنين المقبلة ، فكر في ايه الطرق اللي ممكن تدخل بيها مصادر دخل وابدء اتعلم المهارات اللي محتاج تتعلمها عشان تقدر مع الوقت تعمل مصدر دخل بناءا علي الخطة اللي حطتها .
لو مش في استطاعتك الحالية انك توجد مصدر دخل حاليا ، الخطة اللي هتحطها للسنين الجاية من حياتك علي الاقل هتقدر تمنع بيها اثر المشكلة عليك مستقبليا في وقت قصير ، لان عدم وجود خطة هيخليك تضطر تفضل لاطول فترة ممكنة تكون بتتعامل تعاملات مادية مع الاب وده هيزود الضغط عليك والخلافات ما بينكوا لفترة اطول .
حاول ايجاد مصدرا للدخل
حاول الا تعتمد علي والدك كمصدر رئيسي للدخل لان ده دايما هيزود من الخلافات والمشاحنات ما بينكوا حاول تتطور دايما من نفسك حتي لو كنت لسه طالب بتدرس ممكن تشتغل اعمال إضافية توفرلك دخل اثناء الدراسة .
اتعلم لغة جديدة واتقنها كويس ، اتعلم لغة زي الانجلش او الفرنساوي والألماني هي من اكتر اللغات المستخدمة عالميا ، اتعلم لغة منهم واتقنها جيدا وعن طريقها تقدر تترجم مقالات للشركات او الافراد عن طريق مواقع العمل الحر ، او اتعلم أي مهارة بتحبها زي التفصيل او عمل الأدوات اللي بتستخدم في الافراح وتسويقها من خلال مواقع التواصل الاجتماعي او العمل بدوام جزئي لبعض الساعات في اليوم في أي وظيفة متاحة امامك .
بالطريقة دي هتقدر تكون حليت معظم المشكلة جذريا لانك هتكون معتمد علي نفسك بشكل كبير وكمان هتكون اكتسبت مهارة جديدة هتنفعك مستقبليا في اي وظيفة هتقرر تكمل فيها .
اطلب مصروفاتك من الام
حاول تطلب مصروفاتك الأساسية من الاب والرفاهيه من الام لو كانت الام عاملة ومتوفر معاها مصدر للدخل لان الشخص البخيل بيحاول مينفقش فلوسه الا للضروريات الأساسية زي الاكل او المرض او مصاريف المدرسة …
اطلب في بعض الوقت مصروفات من الام وبكده هتقدر تقلل عدد المرات اللي هتضطر فيها تاخد مصروفاتك من والدك ، لو كانت الام ليس متوفر لها أي دخل فحاول تجعلها الوسيط ما بينك وبين الاب عشان متبقاش متصدر للمشهد طول الوقت وتزيد الخلافات ما بينكوا وتوصل للقطيعة .
خده معاك للتسوق
غالبا الشخص البخيل مش بيبقي دايما عنده علم بالاسعار المرتفعة للاشياء لانه بيبقي غالبا بينفق في الضروريات الأساسية فقط ، خذه برفقتك اثناء تسوقك لشراء بعض الملابس ده هيخلي دايما عنده علم بالأسعار وهيساعدك فيما بعد …
بالطريقة دي هتلاقي نفسك اشتريت حاجات اكتر من المبلغ اللي كنت هتحاول تاخده منه لان الشخص البخيل بيحب يدفع بنفسه في الأشياء اللي تستحق من وجهة نظره وبيحب يحس باثر او بفضل الشئ دا مباشرة علي الشخض اللي بيشتريله .
اشعره بالثقة والأمان
حاول تحسسه بالامان وبالحب والثقة لان البخل في الاساس مصدره شعور نفسي بعدم الامان والثقة والشعور بان المال هو المصدر الوحيد للامان ولمواجهة اي ظرف ، وغالبا الشخص البخيل بيكون مفتقد للحب من اللي حواليه لان دائما طباعه بتعرضه للنبذ من الاخرين خصوصا ان البخل في كثير من الأحيان مرتبط بسوء الخلق والغلظة اللي بتخلي معظم علاقاته سيئة .
مارس أنشطة بتحبها
غالبا البيت اللي بيكون الاب فيه بخيل بيكون فيه مشاكل اسرية بشكل متكرر سواء مع الزوجة او الأولاد بسبب المتطلبات والمصاريف اللي بتفرضها الحياة اليومية علي جميع افراد الاسرة …
حاول تتجنب الضغوطات والمشكلات علي قدر المستطاع عشان تقلل من تاثيرها عليك بالسلب ،مارس نشاط او رياضة او أي هواية بتحبها تخليك تقضي جزء من يومك بره البيت ،في بعض الأنشطة تقدر تعملها من غير ما تحتاج اشتراك شهري زي الجري او لعب الكورة او الدخول في أنشطة تطوعية .
حسسه بأهميتة في قضاء حوائج الناس
غالبا بيعاني الشخص البخيل من الإحساس بعدم القيمة وان قيمته الحقيقية في المال ، تعمد دائما الثناء عليه امام الاخرين و ركز دائما علي أهمية دوره في شيء ما اشتراه او ساعدكم في شرائه لان التركيز علي السلوك الإيجابي يزيد من تكراره ، كثرة التذمر من بخله لا تاتي بجديد غير مزيد من البخل .
تعليقات
إرسال تعليق