لو إنتي من عشاق البروفيترول هنقدملك النهاردة أسهل طريقة تقدميه بيها ، و لو متعرفيش إيه هو البروفيترول جربيه معانا و هتدوقي أحلي حاجة حلوة شكل و طعم مش ممكن تقاوميه ، البروفيترول بيتعمل بطرق كتيرة ، ممكن يتحشي بكريم الباستري ، كريمة القهوة ، القشطة ، و حاجات تانية كتير ، بس النهاردة هنقدمهولك بالآيس كريم و صوص الشوكولاتة ، جربي معانا بروفيترول بالآيس كريم و صوص الشوكولاتة بطريقة سهلة و مش هتاخد منك أكتر من 20 دقيقة.
جهزي مقادير البروفيترول
½ فنجان ميه ، ¼ فنجان زبدة (مش مملحة) ، ½ معلقة صغيرة سكر ، ¼ معلقة صغيرة ملح ، ½ فنجان دقيق ، 2 بيضة ، ، قالب شوكولاتة خام ، فنجان فانيلا آيس كريم
سيحي الزبدة
في حلة صغيرة علي نار هادية ، حطي ½ فنجان ميه ، ¼ فنجان زبدة ، ¼ معلقة ملح ، ½ معلقة سكر و سيبيهم لحد ما الزبدة تسيح .
ضيفي الدقيق
بعد ما الزبدة ساحت شيلي الحلة من علي النار ، و ضيفي ½ فنجان دقيق و قلبي كويس قوي ، بعد كده رجعي الحلة تاني علي نار هادية و قلبي لمدة دقيقتين لحد ما تحسي إن العجينة طرية و مش بتلزق في الحلة .
ضيفي البيض
شيلي الحلة مرة تانية من علي النار و ضيفي بيضة و قلبي و بعدين ضيفي البيضة التانية و قلبي كويس قوي .
شكلي البروفيترول
بمعلقة طعام خدي جزء صغير من العجينة و حطيه في الصينية و سيبي مساحة كبيرة و حطي جزء تاني لحد ما تخلصي كل العجينة
إخبزي البروفيترول
سخني الفرن لدرجة حرارة عالية و حطي صينية الباستري فيها لمدة عشر دقايق و من غير ما تفتحي الفرن قللي درجة الحرارة شوية و سيبي الصينية فيها لمدة 25 دقيقة كمان ، لحد ما يتحول البروفيترول للون الذهبي الجميل .
سيحي الشوكولاتة
دلوقتي عندك إختيارين ممكن تسيحي الشوكولاتة في الميكروويف ، و ده طريقة سريعة لكن لازم تكوني حريصة علشان لو زودتي فترة التسخين ممكن الشوكولاتة تتحرق ، إبدأي ب30 ثانية و شوفي التأثير و زودي كل مرة 30 ثانية لحد ما تسيحي الشوكولاتة، و الطريقة التانية علي حمام مائي و طريقة الحمام المائي سهلة، كل اللي تعمليه ، إنك تقطعي الشوكولاتة قطع صغيرة ، و تحطيها في حلة صغيرة و تحطي الحلة الصغيرة في حلة كبيرة فيها ميه سخنة و تسبيها من 5 ل 10 دقايق لحد ما تسيح ، و في الحالتين ممكن تضيفي معلقة صغيرة زبدة للشوكولاتة السابحة علشان تدبها طعم و لمعة حلوة .
زوقي البروفيترول
بعد ما تخرجي الصينية من الفرن خرجي البروفيترول علي طبق ، و لما يبرد تماما إفتحيه من غير ما تقطعيه خالص و إحشي البروفيترول بالآيس كريم و زوقيه بصوص الشوكولاتة .
نصائــــح
المقادير اللي فاتت تعمل 8 قطع لو عاوزة أكتر أو أقل غيري المقادير حسب عدد الأفراد.
تعليقات
إرسال تعليق