القائمة الرئيسية

الصفحات

إزاي تعملي سلطة المكرونة بالبيض


النهاردة هندخل معاكي عالم جميل ، ملون و لذيذ هو عالم السلطات ، عالم معظمنا بيقف عند بابه و كل يوم نعمل سلطة خضرا و لما نحب نغير نعمل سلطة طحينة ، مع إنه عالم كبير فيه الآف الوصفات ، إيه رأيك نجرب مع بعض النهاردة سلطة المكرونة بالبيض ، طبق سهل و مغذي و الأهم من كده إنك ممكن تكتفي بيه مع حاجة خفيفة زي بطاطس محمرة ، و تكون سفرتك متكاملة و مش محتاجة تتعبي نفسك في طبق تاني .

دلوقتي نبدأ الخطوات اللي مش هتاخد من وقتك أكتر من 20 دقيقة و يكون بعدها الطبق جاهز .

جهزي مكونات السلطة
½ كيلو مكرونة ، ½ فنجان مايونيز ، ½ فنجان زبادي ، ½ معلقة كبيرة خل ، 2 معلقة صغيرة مستردة ، 2 معلقة صغيرة عسل ، 2 بيضة مسلوقة و مقطعة قطع صغيرة ، معلقة صغيرة ملح ، معلقة صغيرة فلفل إسود ، فنجان فلفل ألوان أحمر مقطع ، فنجان فلفل ألوان أصفر مقطع ، فنجان جزر مقطع عيدان صغيرة ، ¾ فنجان كرفس مقطع ، ¼ فنجان بصل أحمر مقطع ، معلقة كبيرة بقدونس مقطع .

إسلقي المكرونة
إسلقي المكرونة في ميه و متنسيش تضيفي معلفة ملح و نقطة زيت علشان المكرونة تسلق من غير ما تعجن ، و بعد السلق صفيها واشطفيها بميه باردة و سيبيها تنشف من الميه كويس .

إخلطي بقية المكونات
إخلطي في طبق عميق ، المابونيز ، الزبادي ، الخل ، المستردة ، العسل ، الملح و الفلفل الإسود و قلبي كويس ، و بكده تكوني عملتي الدريسنج اللي هيدي للمكرونة طعمها المميز .

ضيفي المكرونة
بعد ما تتأكدي إن المكرونة نشفت كويس من الميه ضيفيها لطبق الدريسنج و قلبي علشان المكرونة تاخد طعم الخليط ، ضيفي بعد كده البيض المسلوق ، الجزر ، الفلفل الألوان ، الكرفس ، البصل الأحمر و البقدونس .

زيني الطبق و استمتعي
صبي المكرونة في طبق التقديم و ممكن تزيني الطبق بورق النعناع الأخضر .

نصائــــح
علشان تكون الوصفة ناحجة متسلقيش المكرونة أوي و خليها محتفظة بقوامها .
سيبي الطبق في الثلاجة لمدة ساعة علشان المكرونة تتشرب كلها بطعم الدريسنج و الخضار .
المقادير تكفي 4 أفراد ممكن تقللي أو تزودي حسب العدد
الطبق مناسب جدا و مميز للحفلات أو العزومات ، ممكن يتقدم مع جميع أنواع أطباق اللحوم و الأسماك و الفراخ .
لو حبيتي تضيفي للطبق قيمة غذائية أكبر و يكون طبق رئيسي ممكن تضيفي قطع الفراخ البانيه المشوية أو شرايح اللحم المشوية أو جمبري مسلوق .
لو مش بتحبي طعم البيض المسلوق في السلطة ممكن تستغني عنه و تكتفي بالخضار و الدريسنج بس .
جربي طبق سلطة المكرونة بالبيض و استمتعي بطعم سلطة مش ممكن تنسيه


هل اعجبك الموضوع :

تعليقات