كتير من البنات بيشتكوا ان الميكب بيسيح منهم بسرعة و بيدي مظهر سئ بعد ما تحطه بفتره بسيطه او بمجرد تعرضها لاي عامل من عوامل الجو سواء البروده او الحراره عشان كده في المقالة دي هنقولك الطرق اللي تخليكي تحافظي علي المكياج ثابت لفترة طويلة .
نضفي بشرتك كويس
متستغنيش عن تنضيف البشره يوميا خليه روتينك اليومي الثابت سواء هتحطي ميكب او مش هتحطي ميكب ، قبل ماتحطي اي ميكب نضفي بشرتك كويس سواء بالغسول او الاسكرب و المقشر ، تنضيف البشره وتقشيرها بيشيل الخلايا الميته وبيمنع تراكم البكتريا اللي بتقلل نضارة البشره وبتساعد علي ظهور الحبوب بيقلل او بيمنع ظهور قشور البشره تحت الفونديشين واللي بدوره بيدي مظهر بشرة نقيه صافيه ومشرقة .
رطبي بشرتك
بعد تنظيف البشره ضروري جداً تستخدمي الكريم المرطب للبشرة والكريم المرطب الخاص بالعيون عشان تتفادي تكون القشور علي الجلد اللي بيسبب مظهر سئ للميكب او للوجه عموما وكمان المرطب بيقلل جفاف البشره اللي بيسبب التجيير و عدم ثبات الميكب علي البشره ،وده لكل أنواع البشرة بدون استثناء لكن اختاري المرطب المناسب لنوع بشرتك .
لما تحطي كريم المرطب الخاص بالعيون سبيه فتره ولتن دقايق عشان تقدر البشرة تكون تشربته وتقدري تكرري الخطوه دي اكثر من مره ، الطريقة دي بتخلي منطقة العيون مترطبة جدا وبالتالي هيمنع دخول الكونسيلر في التجاعيد .
متنسيش البريمر
البريمير عبارة عن مستحضر شفاف بيتحط على البشرة قبل وضع كريم الأساس اللي بيساعد علي تثبيت المكياج لفترات اطول عن طريق انو بيقوم بتصغير المسامات وبيقلل من افرازات البشره المزعجه طول اليوم لانه بينظم افرازات زيوت البشره وبيقلل تاثير البروده والحراره ،و كمان بيساعد علي فرد كريم الاساس بسهوله علي البشره وبيساعدك على ملء الخطوط الدقيقة وتشققات البشرة اللي بيسب في عدم ثبات المكياج لتمنحك بشرة ناعمة وسلسه فهو من اكتر الحاجات اللي بتاثر في شكل الميكب وثباته طوال اليوم …
من أهم فوايده أنه بيستخدم كعازل فعّال بين البشرة والميكب ، ودي من الحاجات اللي بتساعد على علاج حب الشباب وحمايتها من التهابات البشرة خصوصا في حالة البشرة الحساسة، حتى الأنواع الصحية من المكياج قد تتسبب في التهابات البشرة وعشان كده من الضروري انك تستخدمي البرايمر على البشرة قبل وضع المكياج عشان تتجنبي حساسية البشرة واحمرارها.
في أنواع من البرايمر الخاصة بالعين، واللي بتعمل نفس وظيفة البرايمر للبشرة. وده بيساعدك على ثبات الايشادو لفترة أطول، مع الحفاظ على لون واضح وجذاب ، وكمان بيساعدك انك تقللي من كمية المكياج اللي بتستخدميها يوميا ، مع استخدام البرايمر هتحتاجي لكميات أقل من كريم الأساس عشان تغطي بشرتك بالكامل.
البريمير الي حد ما سعره غالي لكن ليه بدايل زي كريم نيفيا افتر شيفينج للرجال او يمكنك صنعه بنفسك بالمنزل ، طريقة استخدامه بسيطة حطيه قبل الكونسيلر والفونديشين بدقايق وسيبيه لغاية اما تتشربه البشرة ويجف .
اختاري فونديشن مناسب
حاولي اثناء اختيارك لكريم الاساس انك تختاري كريم ذات تغطيه عاليه وبيدوم لساعات طويله من غير ما تحتاجي لتعديله اثناء اليوم ، هيدوم معاكي لفتره طويله وهيكون ثابت بشكل كبير بس حاولي تستخدميه في المناسبات المهمه مش بصفه دايمه ومستمره لانه بيكون تقيل الي حد ما علي البشرة
ثبتي الميكب باللوس باودر
بعد ما تحطي الكونسيلر والفونديشين فاللوس بورد هي الخطوة الامثل لتثبيت الميكب لفتره طويله لكن احرصي علي وضعها بطريقه سليمه ،عن طريق وضعها بفرشة ميكب وتوزيعها عالوش وسبيها لمدة خمس دقايق بعد ما تكون البشرة خدت المقدار الكافي من الباودر بعدها قومي بشيل زيادات الباودر بالفرشاه مره تانية .
اللوس باودر سعرها غالي الي حد ما فيمنك استخدام باودر جونسون للاطفال كبديل جيد للوس بودر او تقدري تستخدمي اي نوع كويس من البودر العاديه المضغوضه هتساعدك ان الميكب يثبت لفتره طويله .
ثبتي الكحل والماسكرا
عشان تقدري تثبتي الكحل بعد ما تحطيه هتستخدمي فرشاه رفيعه جدا وتعملي شادو (ظل خفيف)فوق الكحل بنفس لون الكحل ،وفي طريقه شائعه لتثبيت الكحل ناجحة جداً باستخدام الولاعه أو حتى كبريت ،مرري قلم الكحل فوق النار لكن مش بطريقة مباشرة لمدة ثواني وبمجرد ما يبرد ارسمي الكحل داخل العين.
عشان تقدري تثبتي الماسكارا وتحافظي عليها فتره طويله بعد ما تحطي الماسكرا بفرشه رفيعه حطي طبقة خفيفه من الباودر الاسود فوق الماسكرا او الرموش بعدين تحطي تاني طبقة ماسكرا خفيفه .
ثبتي الروج
رطبي شفتك باستمرار و قبل ما تحطي ميكب بفتره و وتقدري تستعيني بالقليل من الفازلين علي شفتك هيحافظ علي الشفايف رطبه ومستعده للروج بدون مظهر سئ .
عن طريق قلم حددي بيه الشفه بنفس لون الروج اللي هتستخدميه بعدين قومي بوضع الروج بعدين قومي بوضع بودر نفس لون الروج ثم قومي بوضع روج مره اخري ،او استخدمي انواع الروج المط اللي بتثبت حتي مع الاكل.
الميكب اسبراي
حطي الاسبراي المخصص لتثبيت الميكب بتيرش علي الوجهه من بعد شبر من الوش بعد ما تنتهي من وضع الميكب كامل وهو وظيفته الاساسية تثبيت الميكب من 6 ل 7 ساعات .
نصائــــح
حاولي تتجنبي أنواع المكياج السيئه والرخيصه لانها بتسيح بسرعه وبتاثر علي بشرتك بشكل سلبي .
افتكري ان الميكب وظيفته انو يضيف لمسه جمال واشراق لبشرتك مش لتغطيتها وتغيرها كليا ، عشان كده حاولي تقللي من استخدامه وكمية المكياج اللي بتحطيها عشان تتجنبي شحوبه مع الوقت .
حاولي تستخدمي ماركات معروفة المصدر او علي الاقل مصرح بيها عشان تتجنبي مشاكل البشره و تتجبي انها تعجز بسرعه .
تعليقات
إرسال تعليق