الزلابية او لقمة القاضي من الحلويات الشرقية الخفيفة اللي ناس كتير بيحبوها ، بس حلوتها بتكون في انها تكون مقرمشة وسكرها متوسط ودي بتبقي احلي حاجة فيها ، في المقال ده هنقولك ازاي تعملي زلابية مقرمشة زي الجاهزه واحسن في البيت بخطوات بسيطة جدا .
اخلطي المكونات علي بعض
اول حاجة هتحتاجيها هي انك تخلطي المكونات علي بعض وهي كوبايتين دقيق مع معلقة خميرة ومعلقتين صغيرين سكر ومعلقتين زيت ورشة ملح وفانليا ونشا واخلطيهم كلهم مع بعض
اعجنيهم بماية دافية
ابدئي ضيفي ماية دافيه عشان الخميرة عشان تبدا تشتغل في العجين ، ضيفيها تدريجيا وقلبي بالمعلقة لحد ما توصلي لقوام وسط مش جامد زي العجينه العاديه ولا سائل زي الكريب ، قومها يكون شبيه بقوام الجبنة النستو السايحة .
سبيها تخمر
غطي العجين وسبيها تخمر لمدة ساعة ونص او ساعتين ، عشان تعرفي انها خمرت هتلاقي حجمها اضاعف ونفشت .
حضري العسل او الشربات
حضري الشربات اللي هتحطي فيه الزلابيه اول ما تطلع من النار ، وهو عبارة عن كوبايتين سكر علي كوباية ماية وتسبيهم يغلوا مع بعض وتقلبي لغاية لما القوام تحسي انو بدا يتقل هتضيفي عليه نص لمونة وفانليا وتطفي النار ، من المهم جدا ان الشربات يكون ساقع لما تحطي فيه الزلابية عشان لو الشربات سخن والزلابية سخنة الزلابية هتطري وهتشرب كل الشربات وهتبوظ منك فمن المهم جدا تسيبي الشربات يسقع شوية .
اقلي الزلابية في الزيت
هتجيبي طاسة قلية عشان تقلي الزلابية ، جيبي فنجان او كوباية فيها زيت خليها جمبك عشان تحطي علي ايدك زيت باستمرار وعلي المعلقة اللي هتنزلي بيها الزلابية في الطاسة، وهتبدئي تحط علي ايدك شوية زيت عشان العجينة متلزقش فيها وتحطي العجينة في ايدك وتقفلي عليها واللي يطلع تاخديه بالمعلقة تحطيه في الزيت هتلاقي عمل شكل كور من المهم ان المعلقة كمان يكون عليها شوية زيت .
قلبي الزلابية باستمرار
قلبي الزلابية باستمرار في الطاسة عشان تستوي كويس من جميع الاتجاهات ومتتحرقش ، واول ما يبقي لونها دهبي طلعيها من الزيت .
حطيها في الشربات وهي سخنة
بعد ما استوت في الزيت خرجيها حطيها في الشربات وهو ساقع والزلابية سخنه وقلبيها في الشربات وطلعيها حطيها في طبق ودلوقتي هي جاهزه للاكل .
نصائــــح
تقدري تضيفي علي وشها نيوتيلا هتخلي طعمها حلو جدا .
ضيفي مكسرات تزينها وتديها طعم حلو .
ضيفي عليها ايس كريم بالطعم اللي بتحبية .
تعليقات
إرسال تعليق