ازاي تعملى صوص البشاميل

صوص الباشميل او الصوص الابيض مش بس بيستخدم في المكرونه بالباشميل بيستخدم في اكلات كتير جدا منها اللازنيه والمكرونه بالصوص الابيض وشوربة الكريمه وهي تعبر من اسهل المكونات في التحضير واسرعها ومن اكتر المكونات اللي بتاثر في طعم الاكله وبتخليها تنجح او لا ؟ ورغم سهولتها وقلة مدة تحضيرها من 10 ل 15 دقيقه الا ان في ستات كتير خصوصا اللي لسه مقلبين علي الجواز بتشتكوا انهم مبيقدروش يظبطوا الباشميل زي ما هما عايزين سواء تطلعه بالقوام اللي بتحبه متماسك او خفيف او انه يطلع مفهوش كلاكيع رغم انها بتكون مطبقة كل الخطوات اللي كتباها او سمعتها من الشيف وده بسبب بعض الاخطاء البسيطه اللي بتاثر علي قوام الباشميل بشكل مباشر

 اظبطي المقادير
في ناس بتحب الباشميل تقيل وفي ناس بتحبه متوسط كانه صوص شوربه وفي ناس بتحبه خفيف وعشان تظبطي صوص الباشميل زي ما بتحبيه او خطوة هتكون عامل رئيسي في طعمه وسمكه وهي المكونات والمقادير

المكونات سمنه او زبده و دقيق ولبن وملح وفلفل اسود و جوزة الطيب وجبنه موزيرلا او مبشوره (حسب الرغبه) .

اول حاجه هتحتاجيها ان السمنه او الزبده تكون نفس مقدار الدقيق او اقل بمقدار الثلث يعني لو هتحطي معلقتين سمنه هتحطي معلقتين من الدقيق او تلت معالق سمنه ومعلقتين دقيق .

هتبدئي تحمري الدقيق مع السمنه وتستمري في التقليب لحد ما يوصل للون الذهبي او الابيض المايل للذهبي او الأشقر بعدين تبدئي تضيفي الحليب تدريجيا علي نار هاديه مع التقليب المستمر تفضلي تقلبي لحد ما يكون الباشميل بقوام متماسك ابدئي ضيفي الملح والجبنه المبشوره .

 استمري في التقليب
الباشميل عشان يطلع مظبوط محتاج انك تفضلي تقلبيه طول الوقت لحد ما توصلي للقوام المتناسب معاكي متسبيهوش علي النار بدن تقليب مستمر عشان هيبدا يقطع ويبوظ منك .

اللبن يكون ساقع
حاولي يكون اللبن ساقع عشان لو سخن في الغالب هيبدا الدقيق يكلكع ويكون كور صغيره في الباشميل ومش هيبقي صوص متماسك ،زودي اللبن بالتدرج علي مراحل واستمري في التقليب كل ما تزودي لبن .

هدي النار
وانتي بتضيفي اللبن بالتدريج علي الدقيق المتحمر هدي النار خالص او ممكن كمان تشيلي الحلة لمدة دقيقتين علي العين المطفيه لغاية ما تقلبي وتظبطي الصوص وترجعي تحطيها علي النار مره تانيه

 اضربيهم في الخلاط
لو مبتعرفيش تظبطيه بنفسك عن طريق التقليب تقدري تحطي كل المكونات في الخلاط العادي وتضربيهم مع بعض هيطلعلك الخليط من غير كلاكيع او مشاكل وهيطلعلك قوام كريمي متماسك ، هتحطي الخليط علي نار هاديه وتسمري في تقلبيه لغاية اما توصلي للقوام اللي هتحتاجيه .

حطي الفلفل الاسود علي اللبن
الافضل تضيفي الفلفل الاسود والملح علي اللبن قبل اضافته للعجين او الدقيق المتحمر ، عشان الفلفل الاسود ميكلكعش ويبدا يديكي شكل مش محبب .

خلي قوامها حسب رغبتك
لو حابه تعمليها كشوربة وطلعت تقيله شويه زودي شوية شوربه او لبن واستمري في التقليب هتلاقي قوامها بقي اخف ، ولو حابه تخففيها اكتر زودي لبن اكتر وهكذا ، لكن زودي زيادة تدريجيه بسيطه عشان ميخفش اكتر من اللازم وترجعي تتضطري تتقليه مره تانيه .

لو حباها كباشميل متماسك او كثيف وطلعت خفيفه وحابه تزودي سمكها استمري في تقليبها علي النار لحد لما تتقل ولو تقلت بس مش بالقدر المرغوب ، ابدئي جيبي حله جديده وحمري فيها معلقتين دقيق مع السمنه زي الخطوه السابقه لغاية لما توصل للون الاشقر او الدهبي وضيفي عليها الباشميل اللي كنتي عملاه من الاول وحابه تتقليه تدريجيا .

خلي اللبن ضعف الدقيق
يعني لو هتحطي 2 معلقه دقيق حطي 4 اكواب من اللبن لو هتحطي 4 معالق من الدقيق حطي 8 اكواب من اللبن ، هتقدري تعمليها بسهوله وفي نفس الوقت تقدري بعد كده تخفيفها او تكثفيها زي ما تحبي .

نصائــــح
تقدري تخلطي علي اللبن شوربه هيخلي طعم الباشميل افضل .
تقدري تضيفي معلقه اومعلقتين من القشطه علي وش الباشميل قبل ما تدخل الفرن .
لو حابه تضيفي جبنه موزيريلا علي الوش فيفضل تطلعيها وهي نص سوي وتضيفي علي وشها الموزيريلا .
تقدري تضيفي بيضه بعد ما تعملي الباشميل وتخلطيهم معاه جيدا او توزعيها علي وش الباشميل عشان تظهر باللون المايل للاحمر .