ازاى أقدم على عداد كهرباء جديد بالكارت

بسبب كثرة السرقة في الكهرباء وعدم ترشيد الاستهلاك قررت وزارة الكهرباء في البدء في توصيل وتركيب عداد الكهرباء الكودي الجديد مسبوق الدفع في عدد من المحافظات وقريبا في جميع المحافظات ,وعشان تقدم علي عداد كهرباء جديد ومتضيعش وقتك يبقى لازم تبقي عارف إجراءات التركيب وإجراءات شحن العداد وعلشان تعرف الاجراءات اتبع الخطوات التالية :-

جهز الاوراق المطلوبة

عشان تقدم علي عداد كهرباء كودي جديد بتقوم بتقديم الأوراق التالية بتجهز طلب تركيب عداد ووصل ب 50 جنيه واللي بيتم دفعه قبل كده مع عقد ملكية العقار ,صورة البطاقة ,وصل مياه أو تليفون أو غاز حديث ومع استكمال الأوراق بيتم تركيب العداد الجديد خلال 3 أشهر من تاريخ التقديم

مع ملاحظة ان إبرام التعاقد بين شركة الكهرباء والمواطن في المناطق العشوائية يكون بدون اسم عشان ميديهوش الحق او يكون سند قانوني ليه في المنطقة العشوائية .

 اعرف خطوات شحن العداد

1- بتروح شركة الكهرباء التابع ليها وتقدم علي طلب تركيب عداد كودي
2- بعد كده بتقوم الشركة بعمل مقايسة للعداد واللي بيتم تحديدها وفقا لمساحة المنزل
3- بتقوم بتركيب عداد الكهرباء مع اخطار شركة الكهرباء ووضع علبة العداد خارج الشقة
4- يتم تركيب عداد الكهرباء الالكتروني وتقوم بشحن العداد من خلال شركة الكهرباء حسب الاستهلاك اللي انت عايزه

 طريقة شحن كارت عداد الكهرباء

قيمة كروت الشحن الجديد بالكيلوات

تبدأ قيمة كروت شحن الكهرباء الجديدة للعداد الالكتروني مسبق الدفع من 20 جنيها وحتى 5000 جنيه، وتصل قيمة الكيلو وات التي تعطيها لك الـ 100 جنيه إلى 424 كيلووات ، عند قرب انتهاء الرصيد ينبهك العداد عن اقتراب انتهاء الرصيد بصوت خافت وإضاءة ، ينقطع التيار الكهربائي عند انتهاء الرصيد نهارًا، ولا ينقطع إذا انتهى الرصيد مساءًا لحد صباح اليوم التالي، و في أيام الإجازات الرسمية والأعياد.

و ممكن يتم الدفع عن طريق شركات التحصيل ومنها “فوري” و”Efinance”، وهيتم تطوير عدد تطبيقات على الهاتف المحمول لشحن العدادات الكودية “مسبقة الدفع” ، وهيكون شحن العدادات الكودية عن طريق “الشحن على الهواء .. فلو كان المواطن في محافظة ومنزله في محافظة أخرى فيستطيع شحن عداده على الطاير”.

اعرف المصاريف المطلوبة

حددت وزارة الكهرباء، ان قيمة تركيب العداد الكودى المؤقت للوحدة السكنية فى الريف والمناطق العشوائية للعداد الأحادى بـ 1542 جنيها، و ثمن المقايسة 450 جنيها طبقا للمساحة، بينما تبلغ القيمة للمدن وباقى الأماكن بـ 1872 جنيها.

وتبلغ قيمة تركيب العداد الثلاثى فى جميع الاماكن بلا تفرقة 2406 جنيهات، وللوحدات التجارية قيمة العداد الأحادي فى الريف والمناطق العشوائية بـ 2031 جنيها وللمدن وباقي الاماكن 2811 جنيه، وتبلغ قيمة تركيب العداد الثلاثي لجميع الاماكن 4585 جنيها والمقايسة 700 جنيه.

نصائــــح

تركيب العداد الكودى لا يضمن أية حقوق قانونية للمخالفين ولا يعتبر سندا للملكية أو الحيازة ولا يعد سندا لتقنين الأوضاع.المشترك
بلاش اي تلاعب أو فك روزتة العداد أو عكس اطراف التوصيل الخاصة بالعداد الذكي لانة هيؤدي إلى فصل الكهرباء نهائيا عن العميل، ولا يعمل العداد مرة أخرى إلا بعد الرجوع به للهندسة أو الرجوع إلى المهندس المشرف على عملية البرمجة للعدادات الذكية ، وهيتم عمل محضر سرقه