ازاي اصاحب اولادي

انك تكوني مصاحبه اولادك تعتبر اول خطوة في طريق بناء الثقة ما بينكوا عشان علاقتكوا تكون قوية وهي طريقك الاول عشان تقدري تربي اولادك ويسمعوا كلامك وعشان علاقة الصداقة مش بتتكون من يوم وليلة من المهم ان الام تحاول تبني علاقة الصداقة دي من الصغر ،في المقاله دي هنقولك ازاي تقدري تصاحبي اولادك وتكوني معاهم علاقة قوية .

 احكيله حدوته قبل النوم

علي الرغم من انها حاجه تكاد تكون قديمة بالنسبة لبعض الناس الا انها من الحاجات اللي بتساعدك انك تبني علاقة قوية مع ابنك وانك تزرعي فيه قيم معينة زي الامانة والصدق والشجاعه عن طريق انك تحكيله قصص يكون بطلها بيمر بمواقف بيتصرف فيها بصدق او بشجاعه وامانة وهكذا .

الحواديت والحكايات من الحاجات اللي بتشكل جزء كبير في تكوين الطفل وشخصيته لانه بيبدا يتعلم سلوكه عن طريق الحاجات اللي بيسمعها وبيشوفها وبالتالي بيبدا يتصرف بناءا علي خبراته اللي اخدها عن طريق القصص او الكرتون او السلوكيات اللي شافها من الاب والام والمحيط بيه ،وعشان كده القصص هتساعدك كتير في تشكيل سلوكيات طفلك وفي توطيد علاقته بيكي .

 ماتستخدميش الضرب ، ناقشيه

الضرب اول حاجة بتكون فجوة بينك وبين طفلك خصوصا الضرب بعنف ، لان الضرب بيخليكي بالنسباله مصدر للالم ليه بالتالي بيتجنب يحكيلك اي حاجه تخصه مع الوقت لانه عارف النتيجة سواء بالضرب او بالتوبيخ .

اسمعيه وحاولي تفهمي تفكيره وتوجهيه بالنقاش لحد لما تقدري تقنعيه وتوصلي معاه لحل ، لان الضرب نتيجته عمرها ما كانت ايجابيه بالعكس الضرب نتيجته طفل عصبي وعنيد واحيانا فاقد الثقة بنفسه .

علي الرغم من ضرورة سماع الطفل والنقاش والتفاهم معاه لكن من الضروري ايضا ان الام والاب يكونوا بيتمتعوا بالحزم خصوصا في مواقف معينة عشان الطفل يقدر يفرق بين الغلط والصح ويتعلم ، لان التدليل الزائد وعدم مراجعه الطفل عند الغلط والصح بيكون سلبي علي الطفل زي التشديد في عقاب الطفل ،التشديد والتدليل ليهم اثار سلبية علي الطفل .

 عامليه كانك صديقته

عاملي ابنك كانك صديقته وفي سنه ، اسمعي حكاياته وقصصه وتخلي في بعض الاوقات عن كونك امه مصدر الارشاد والنصح والتربية ، اسمعي كل اللي بيقوله وتناقشي معاه كانك صديقه ليه في سنه وابدئي افهمي بيفكر ازاي لان ده هيكون ثقه ما بينكوا وهيخليه بيحب يحكيلك ويتكلم معاكي دايما وهيخليكي تقدري تفهميه اكتر وبالتالي تقدري تتعاملي معاه .

اخرجي معاه وشجعيه دايما ، قوليله دايما كلمات محفزه وايجابية عن نفسه ، خليه يجرب دايما عشان يقدر يكتشف كل حاجه عن نفسه ، زرعك لثقته بنفسه وتشجيعك ليه هيخلق عنده احساس انك مصدر للثقة يقدر يعتمد عليه .

اشركيهم في قرارتك وخد رايهم ، احساس اولادك ان هما جزء من البيت وان رايهم مهم وانك مهتمه لرأيهم ، هيخليهم هما كمان يهتموا برايك ويكون عندهم رؤية خاصه بيهم ويبني عندهم الثقه بالنفس .

 عاملي اصحابه بود

حاولي دايما تكوني علاقه طيبه مع اصحابه وتقابليهم بابتسامه ، وتجمعيهم ايام في الاسبوع ولو يوم واحد اسبوعيا يلعبوا فيه ويرسموا ويلونوا ويغنوا ونظمي لهم مسابقات وجوايز صغيره وكمان ممكن امهات اصحاب اولادك يشاركوا فيها وتعملوا مسابقات بينكوا وبين اولادكوا ، ده هيخلق ارتباط كبير ما بينكوا وهيقوي علاقتكوا ببعض ، وهتكوني مصدر من مصادر السعاده والطاقه لابنك او بنتك .