ازاى اعرف ان ابني بيسنن

فترة التسنين اللي بتبدا من 4 شهور فيما فوق بتكون من اصعب الفترات علي الطفل وعلي الام بسبب الوجع اللي بيتعرضله الطفل اثناء فترة التسنين ، لكن من المهم ان الام يبقي عندها علم بعلامات مرحلة التسنين عشان تقدر تتعامل صح مع الطفل اثناء المرحلة دي وتساعده علي تخفيف المه وعشان كده في المقالة ديه هنقولك اهم العلامات اللي تعرفي من خلالها ان طفلك بيسنن .

 بيعيط باستمرار

اعرف ان ابني بيسنن
من اول علامات التسنين انه يكون بيعيط لفترات طويلة وبيزن بصوت زي الانين بدون وجود سبب معين ملحوظ ، انه يكون بيبكي باستمرار لفترات طويله ، هتبقي مغيراله ومرضعاه ونضيف وهتلاقيه بيعيط بدون سبب واضح ودي من اولي علامات التسنين .

 عصبي وسريع الغضب

هيبقي مصاحب دايما لعياطه المستمر انه عصبي وبيتشنج وبيحمر وشه من كتر العياط ، هتلاقه حساس جدا لابسط سبب وعصبي بسبب وبدون .

 نومه مضطرب

من علامات التسنين كمان انه يكون مبينامش او بينام فترات بسيطه جدا وعنده مشاكل واضطرابات في النوم بسبب الالم والارهاق اللي بيكون الطفل فيه مخليه مش عارف ينام .

 هتلاقي عنده اعراض مشابهه للبرد

هتلاحظي ان درجة حرارته مرتفعه وعنده زي سخونية ، وعنده اسهال وهتلاحظي ده من خلال حفاضته وهيكون عنده جفاف نتيجة للاسهال واحيانا هيكون عنده حكه ونفسه مسدود الي حد ما ، كل دي اعراض شبهه اعراض البرد مرتبطة بالتسنين .

 احتياج الطفل للعض علي الاشياء

هتلاحظي في الفترة دي ان الطفل بيحط ايده او صوابعه كتير في فمه وبيعض عليها طول الوقت وكمان بيعض علي اي شئ يقع تحت ايده ودي بتبقي حيلة لتخفيف حدة الالم اللي في اللثة .

 الم اثناء الرضاعة

وده عرض هتحس بيه الام ، بالالام اثناء الرضاعة نتيجة لعض الطفل بعنف علي ثدي الام او عض الطفل علي الببرونة اللي بياخدها بديل للرضاعة الطبيعة .

 زيادة التصاق الطفل بالام

في الفترة دي الطفل بيكون ملاصق جدا لامه ومش عايز يسيبها طول الوقت ومش عايز يروح لاي حد تاني غيرها حتي الاخوات او الاب وده كمان عرض من ضمن اعراض التسنين عند الطفل .

 فقدان الشهيه

في الفتره دي الطفل بيكون عنده فقدان للشيهه بشكل كبير وبيمتنع عن الرضاعه او بعض الماكولات خصوصا الماكولات السخنة لانها بتزود من التهاب اللثة اللي بسبب له الم اكتر فبيحاول يتجنب اي شئ ممكن يسبب له الالم ، وكمان هتلاقيه بيميل لماكولات معينه عن غيرها خصوصا الاكل البارد والطري والسهل العض عليه زي الجرز البارد او الجيلي الخ ..

 احمرار اللثة

كمان من ضمن اعراض التسنين تورم واحمرار اللثة بسبب ان السنان بتكون في محاولة للخروج من اللثة عن طريق شقها وده بيسبب الاحمرار والتورم للثة .

 زيادة لعاب الطفل

هتلاحظي ان الطفل بيسيل لعابة بشكل كبير جدا عن الطبيعي من فمه وده من نتيجته انه بيسبب احيانا احمرار والتهاب تحت الفم او الشفه بسبب زيادة سيلان اللعاب .