ازاى أحمى ابنى من أضرار التلفزيون

كتير من الأمهات بتسيب أطفالهم قدام التلفزيون عشان تسليهم ويقدروا يخلصوا الشغل اللي وراهم وفي ناس تانية بتسيبهم قدام اغاني بلغات تانية عشان الطفل يتعلم منها اللغة الإنجليزية

والحقيقة أن في دراسة اتعملت تابعة للأكاديمية الأمريكية لطب الأطفال بتقول ان الطفل الأصغر من سنتين مش مسموح ليه بمشاهدة التليفزيون اطلاقا وبعد سن السنتين مسموح حد أقصى نصف ساعة في اليوم وده لأن التليفزيون بيقلل قدرة الطفل على التعليم والتفاعل وبياخر اللغة وحركات ايده واضرار تانية كتير زى إنك مبتقدريش تخلى ابنك يسمع الكلام

 خصصي ليه مساحة عمل
عشان تساعدي ابنك انه يتسلى ويستغني عن التليفزيون وفي نفس الوقت يستفاد وينمي مهاراته ساعديه علي التركيز من خلال تخصيص مساحة عمل عن طريق سجادة صغيرة تكون مخصصة للطفل يلعب عليها الطفل

ودي هتساعده يركز في المنطقة اللي بيلعب عليها وهتخليه مستمتع باللعب اكتر وتديله لعبة واحدة يلعب بيها عليها عشان متشتتيش انتباهه وتبعدي اي حاجة تانية عن السجادة

 اعمليله نشاط للتخيل


بعد ماتجيبي للطفل سجادة اللعب الخاصة بيه هتساعديه علي التخيل والابتكار من خلال نشاط بسيط هتعمليه معاه هتجيبي للطفل طبق او صندوق صغير من اطباق اللعب بتاعته وتحطيله فيها مجموعة من الحجارة او تقدري تستبدليها بأي حاجة تانية يكون مرسوم عليها رسومات تقدري منها تكوني قصة “مثلا بنت وتفاحة وجزمة وقطة وتعلب وشجرة وبيت وورد ” أي مجموعة رسومات نقدر من خلالها نكون قصة

ونبدأ نجيب الطفل ونقولة اي الرسومات اللي علي الحجارة دي ونبدا نتعرف عليهم ونتكلم عنهم ولو الطفل مستوعب شوية هيساعدك انكوا ترصوا اللعبة علي الارض وتبداوا مع بعض تألفوا حكاية وتبدأي بنفسك تحكي حكاية من خلال الادوات اللي قدامك وتطلبي منه يعمل زيك او يكمل الحكاية ويتخيل نهايتها او احداث دخل القصة

غيري في احداث القصة


وطبعا متاح تغيري في أحداث القصة كل مرة لان اللعبة دي معمولة عشان تساعدي الطفل علي التخيل وابتكار احداث جديدة من خلال نفس الأدوات

واللعبة دي أدواتها بسيطة جدا وتقدري تعمليها بنفسك من خلال زلط ابيض وتوديه لحد بيعرف يرسم كويس عشان الطفل يكون مستمتع أو ترسميها بنفسك لو بتعرفي ترسمي كويس او تلزقي عليه استيكرز للصور اللي انتي عايزاها ومتنسيش ان بمجرد ماتنتهي من اللعبة لميها في العلبة الخاصة بيها عشان مينساش التنظيم وترتيب اغراضة

 عرفية علي النشاطات اليدوية والحرف


تاني نشاط تقدري تبعدي بيه طفلك عن التليفزيون هو انك تعرفيه علي الصناعات اليدوية والحرف من خلال صور مرسوم عليها العامل بالحرفة وهو في وسط الشغل بتاعه وتكون مرسومة بطريقة تشد الاطفال زي انها تكون صور كرتونية

والصور دي متوفرة في اماكن كتير وبتستخدم في المطاعم والكافيهات بيتقدم عليها المشروبات وتبدأي تحكي للطفل حكاية الحرفة دي او الصناعة واتعملت امتي وفين ازاي والادوات اللي بتستخدم فيها بالطريقة دي هتكوني نميتي ثقافة الطفل ومهاراته وخلتيه يلعب من غير ملل ويبعد عن التليفزيون

 اعمليله لوحة المجموعة الشمسية


بدل من انك تسيبي الطفل قدام كارتون بيتكلم عن الأقمار والكواكب او تديله التليفون يتفرج عليها تقدري تعمليله تالت نشاط وهو من النشاطات المفيدة جدا والممتعة للطفل واللي تقدري تعمليها بنفسك وهي هتكون عبارة عن لوحة مرسوم عليها المجموعة الشمسية

وتقدري تشتريها من اي مكتبة او تنزلي الصورة اللي تعجبك من علي النت وتروحي اي مكتبة تغلفيها عشان الطفل يقدر يستخدمها وجبيله حجارة شكلها مناسب للاطفال مرسوم عليها الأقمار والكواكب والشمس او تلزقي عليها استيكر

والطفل هيلعب عن طريق انه هيرص كل حجارة في مكانها علي اللوحة ومع الوقت هيعرف من خلال اللعبة اسم كل كوكب ومكانة الصح حولين الشمس

 احكيله حكايات من خلال الأشكال المجسمة


ومن الألعاب الجميلة جدا اللي بيحبها الطفل هي حكاية القصص من خلال الأشكال وتغير الأشكال والقصص مهم جدا عشان الطفل ميملش ويزهق والقصص والأشكال بتتغير على حسب قدرة استيعاب الطفل وسنه واهتمامه وتقدري تستغلي اللعبة دي انك تجيبله اشكال حيوانات وأثناء حكاية القصة تقوليله اسم الحيوان وبيعيش فين وبياكل أي ومعلومات ميكنش يعرفها

نصائــــح
عشان تعوضي ابنك عن التلفزيون لازم يكون البديل قوي وعلشان تقدري تحققي ده من خلال الانشطة اللي اتكلمنا عنها لازم تهتمي باشكال الادوات لان اول حاجة بتشد الطفل هي شكل الحاجة اللي عايزاه يعملها
التنويع بين الالعاب والادوات مهم جدا للطفل عشان ميحسش بالملل وده ويتجه للتليفزيون بسرعة
أي محاولة عشان تلهي الطفل عنك سواء كانت تليفزيون او موبايل اول 3 سنين ب كلها هتعود بالسلب علي طفلك ,ممكن من بداية 3 سنين تقدري تتعرفي علي أدوات معينة ونشاطات يلعب بيها طفلك بشكل منفصل