الغسول من الحاجات المهمة والضرورية للاستخدام اليومي لتنضيف البشرة ومنع تراكم الجراثيم ونمو البكتريا وبالتالي ظهور الحبوب او البثور وعشان كمان تقدري تحافظي علي وشك نضر ومشرق ، فالغسول من الحاجات الضرورية للاستخدام اليومي سواء الصبح او بليل او بعد ازالة المكيب ، ونظرا للاسعار المرتفعة لمستحضرات التجميل والعناية بالبشرة عموما وبعض المشاكل اللي بتسببها الغسول التجاري من جفاف البشرة من الزيوت واحتوائها علي المواد الحافظة هنقولك في خطوات بسيطة ازاي تعملي غسول بالبيت بمواد طبيعة وبسيطة وغير مكلفة .
غسول الشوفان
ضيفي معلقتين من الماية علي نص معلقة كبيرة شوفان وقلبيهم مع بعض لمدة دقيقتين لغاية لما يبدا يظهر مادة بيضا بكدة هيكون جاهز انك تستعمليه كغسول ، ابدئي اغسلي بيه الوش بالفرك الخفيف بحركة دائرية بعدين هتبدائي تغسلي الوش بالمايه العادية .
غسول فيتامين E
ابشري ربع صابونة نابلسي او اي صابونة طبية مخصصة للبشرة الدهنية عليها كوباية من ماية الورد او ماية معقمة من الصيدلية واخلطيهم علي بعض وسبيهم مع بعض لمدة نص ساعة وضيفي عليها كابسولة فيتامين e تقدري تشتريه من اي صيدلية زائد نص معلقة زيت ليمون او اعصري نص لمونة ابدئي قلبيهم مع بعض كويس لغاية لما يديكي قوام الغسول ، الغسول ده مناسب جدا للبشرة الدهنية بيمنع الحبوب وبيسد المسام الواسعة وبيساعد علي تفتيح البشرة وتقدري تسبيه علي وشك لخمس دقايق زي الاسكرب .
غسول الكركم بزيت الزيتون
حطي معلقة من زيت زيتون مع معلقة كركم ومعلقة بيكنج بودر ، الكركم من المواد اللي بتساعد علي التخلص من الحبوب وازالة البقع لداكنه وبينضف البشره .
غسول العسل والحليب
معلقتين من الصابون المغربي من عند اي عطار +معلقة عسل+معلقة كبيره حليب+معلقة صغيره ماء ورد اخلطيهم جيدا حتي تحصلي علي قوام مثل الشاور جيل الغسول المنزلي هيكون غير مكلف وخالي من اي مواد كيماويه مضره بالبشرة .
غسول جونسون بجوز الهند
اخلطي كوباية من الماية المعدنية او المعقمة او المغلية مع ربع كوباية من شامبو جونسون للاطفال ، لو البشرة جافة قللي من كمية الشامبو لو البشرة دهنية زودي من كمية الشامبو +معلقة من زيت جوز الهند او اي زيت عموما مناسب للبشرة +معلقتين عسل للبشرة الدهنية والمختلطة لو البشرة جافة تقدري تزودي لخمس معالق عسل لان العسل من الحاجات اللي بتنعم البشرة وبتمنع جفافها +معلقتين زيت لافندر او زيت شجرة الشاي ، وده غسول مفيد جدا ومغذي للبشرة وخالي من الكيماويات .
تعليقات
إرسال تعليق