اول فترة بنرجع نذاكر فيها من تاني سواء في بداية الترم او مع بداية دخول الامتحانات بيبقي في حاجز نفسي كبير بينا وبين المذاكرة وبنبقي عايزين نذاكر بس مكسلين او مستصعبين الموضوع وبنحس اننا خلاص كنا نسينا المذاكره
عشان كده من المهم جدا انك تعرف ان في بعض الخطوات والطرق اللي لو استخدمتها هتخليك تذاكر بشكل اسرع وهتحتاج في المذاكره عدد مرات اقل لان الخطوات دي هتساعدك ان المعلومه تثبت في دماغك وتبقي مراجعتها اسهل بالنسبالك
إبدأ بالعناوين
متبدأش مذاكرة بانك تمسك جزئيه معينه وتفضل قاعد فيها فترة طويلة عشان تفهمها وتضيع وقت كبير وتحس انك مقدرش تنجز حاجه ، خلي بداية المذاكرة انك تجمع افكار ومعلومات عن المنهج كله وتبدا تعرف هو بيتكلم عن ايه وايه الحاجات المهمه اللي محتاج تركز عليها وايه اللي مش هتحتاج مجهود كبير فممكن تذاكرها فى أى وقت .
في اول مرحله هتقسم الكتاب لأقسام وهتاخد قسم قسم تبدأ تقراه قراءة سريعه عن طريق انك تاخد العناوين وتفهم محتواها او السياق العام بتاعها بيتكلم عن ايه ولو مفيش عناوين والشابتر مكتوب كله ورا بعضه ومش متقسم ابدء قسمه انت وحط لكل فقرة او جزئية عنوان وافهم فكرته العامه او مضمونه .
تحت كل عنوان اكتب خمس او ست كلمات او جملة علي بعضها تفكرك بمحتوي العنوان ده او افكار اللي بيتكلم عنها العنوان
قسم العنوان لخطوات او نقط
لو عندك عناوين كبيره واخده صفح كامله صفحتين او تلاته علي سبيل المثال ، قسم كل عنوان لخطوات او نقط ،وحط جمب كل خطوة دايرة او رقم واكتب جمب كل نقطه كلة تدل علي محتواها ، فلما تيجي تراجع الجزئيه دي مرة تانيه من اول ما تقرا العنوان وتشوف تقسيمة النقط والكلمات اللي جمب كل نقطه هتفتكر مضمون العنوان .
علم بالهايليتر
في اقلام تحديد هيلايتر تقدر تشتريها من اي مكتبه ، بتمشي بيها علي اي نص او جمله بتديها لون فسفوري بيوضحها ، الاقلام دي هتساعدك بشكل كبير جدا في لمذاكرة وفي مراجعة المعلومة علي سبيل المثال اشتري اللون الاحمر خليه للعناوين الرئيسية واللون الاصفر للكلمات المهمه جوا كل عنوان رئيسي ، لك حاول متفرطش في استخدامه وتعلم بيه علي معظم الاسطر عشان هو وظيفته انه يشد انتباهك لكمات معينه مهمه ، فلو استخدمته علي كل السطور هيفقد اهميته وهيزعج العين .
استخدم الخريطة الذهنية
بتنفيذ الخطوات اللي فاتت هيبقي عندك عنواين كل فقرة والافكار اللي جوا كل عنوان ، عن طريق الخريطة الذهنية هتبدا ترسم زي شجرة خارج منها العنوان الرئيسي والعنوان ده خارج منه العنوانين اللي جوا الشبتر وخارج منها الافكار الرئيسية اللي بتكلم عنها كل عنوان ، بكده هيكون عندك تلخيص كامل لكل شابتر مجرد ما تبص فيه هتفتكر اهم العناصر.
سجل بصوتك
ابدء وانت بتذاكر تشغل ريكورد الموبايل ، وسجل شرحك بصوتك للمنهج وبردو محدد فيه العناوين الرئيسيه وبتشرح الافكار بصوتك بشكل سريع ده ممكن يخليك تعمل مراجعه سريعه وانت في اي مكان وانت في المواصلات او في الشارع او لو عندك امتحان وتعبت من القراءه بالشكل التقليدي وزهقت من المذاكرة فتقدر تسمعه ، مع تكرار سماعه هيبدا يثبت في ذهنك زي الاغنية ، وكمان لو بتفهم في الابلكيشنز بتاعت الموبايل ممكن تنزل اي ابلكيشن يضيف مؤثرات صوته او زي لحن بسيط هيخليك فعلا تحس انها زي الاغنيه سهله الفهم والحفظ .
اشرح لاصحابك
هات جروب من اصحابك في نفس تخصصك او نفس دراستك وابدؤا اشرحوا لبعض كل واحد يشرح اكتر جزء هو فاهمه بشكل كبير لو قدرتوا فعلا تلتزموا وتعملوا ده مش هتحسوا بوقت المذاكرة ولا صعوبتها وهتلاقوا نفسكوا حصلتوا بشكل كبير كمية كبيره من المعلومات وكمان كل واحد فيكوا ممكن التاني يقوله علي حاجه مهمه في جزئيه معينه فبيدا تحصيلكوا يبقي اكبر
بسطوا الافكار مع بعض وكل نقطة صعبه حاولوا تبدؤا تفكوا صعوبتها لحاجات ابسط بكده بشكل كبير المعلومات هتثبت لفترة طويلة ومع المراجعه هتبقي ملم بكل اجزاء المنهج .
نصائــــح
المذاكرة مش معقدة احنا بس اللي بنذاكر بطريقة روتينية
جرب كل طرق المذاكرة وانت اللي هتقدر تحدد ايه انسب طريقة ليك
الكليات او المواد العلمية زي الرياضة والفيزيا في الغالب المذاكرة الفردية فيها افضل
المواد النظرية المذاكرة الجماعية فيها افضل
تعليقات
إرسال تعليق