معظم شغلك او دراستك بتطلب انك تقعد فترات طويلة متتحركش من مكانك وبعد فترة بيجيلك شعور بفقدان الاحساس او بتنميل في اطراف ايدك او رجلك وبتبقي مش قادر تمشي عليهم او تحركهم ، في المقال ده هنقولك طرق تتجنب بيها التنميل وتعالجه والاسباب اللي مفروض تتجنبها عشان تقدر تتغلب علي مشكلة تنميل الاطراف .
اتحرك كل فترة
الجلوس لفترة طويلة من غير ما الشخص يتحرك خصوصا لو كان طريقة الجلوس علي احد الاطراف او النوم علي جمب او جزء واحد من الجسم لفترة طويلة ، او عدم تحريك طرف معين فترة طويلة كلها من الاسباب الريئسية للشعور بالتنميل والوخز بسبب صعوبة تدفق الدم للعضو .
حرك اطرافك من وقت للتاني ، وقوم من علي الكرسي واتحرك من مكانك من وقت للتاني لو كانت طبيعية شغلك او حياتك فيها نوع من عدم الحركة لفترات طويلة ، عشان الدم يكون بيتدفق في كل الجسم باستمرار ويجنبك من الاساس الشعور بالتنميل .
متسندش او تقعد علي جزء معين من جسمك لفترة زي تني الرجل والجلوس عليها لفترة طويلة لان ده بياثر علي حركة الدم في الشرايين وبالتالي بيسبب تنميل للاطراف .
متقعدش بوضعية “رجل علي رجل” لفترة طويلة لانها من ضمن الوضعيات اللي بتسبب تنميل الاطراف .
تخلص من الوزن الزائد
الوزن الزائد وزيادة الدهون بكمية كبيرة في الجسم بتقلل من كفاءة عمل الشرايين وتدفق الدم وتوصيله للاطراف ، قلل من زونك الزائد سواء بالرياضة او النظام الغذائي الصحي عشان تتجنب مشاكل اكبر نتيجة لاستمرار قلة وصول الدم للاطراف .
تابع مستوي السكر في الدم
قيس مستوي السكر في الدم باستمرار كل 3 شهور واتبع تعليمات الدكتور وحاول تحافظ علي مستواه مظبوط لان مرض السكر من ضمن الاسباب الرئسية لتنميل الاطراف لانه بيسبب التهاب في الاعصاب اللي بتسبب الشعور بالالم والوخذ في الاطراف .
عالج الانيميا
تابع مستويات الفيتامينات في جسمك زي الكالسيوم والحديد وفيتامين B12 والبوتاسيوم والصوديوم عن طريق بعض التحاليل اللي بيحددهالك الدكتور ، لان الجسم لو في نقص من بعض الفيتامينات مش بس هيكون نتيجته تنميل الاطراف لكن هيكون تنميل الاطراف بداية لمشاكل صحية كتير زي تساقط الشعر ومشاكل بالبشرة والشعور بالدوخة والتشتت والاحساس بالخمول…
اعمل التحليلات اللازمة لنسبة الفيتامينات في جسمك واستشر طبيبك وتابع علي اخد الفيتامين او العلاج المناسب .
كل يوميا خضراوات وفاكهة وحبوب كاملة
واظب علي تناول الماكولات اللي بتحوي الحبوب الكاملة، والبيض، والأفوكادو، والموز، واللحوم، والفول، والأسماك، والشوفان والحليب والجبنة واللبن والمكسرات، والبذور، والفواكه ،كلها من الاطعمة الغنية بفيتامين B6 و B12 .
الخضروات الداكنة، والمكسرات، والبذور، والشوفان، وزبدة الفول السوداني، والاسماك وفول الصويا، والأفوكادو، والموز، والشوكولاته الداكنة ، والزبادي كلها من الأطعمة الغنية بالماغنيسيوم واظب علي اكلهم باستمرار .
اعمل كمادات دافيه
حط قطعه من القماش في ماية دافية مايلة للسخونة ومررها علي الاطراف ، او عن طريق تمرير قربة مملؤه بالمايه الدافيه علي الاطراف ،الماية الدافية من الحاجات اللي هتساعد علي تدفق الدم في الاطراف .
اعمل مساج بانتظام
اعمل تدليك منتظم للجسم سواء المساج اليدوي او باجهزة المساج المتوفره في المحلات ، المساج والجاكوزي من الحاجات اللي بتنشط الدورة الدموية في الجسم كله وبيحسن من اداء العضلات وبالتالي بيمنع الاحساس بالتنميل .
العب رياضة
مارس اي نوع من انواع الرياضة يوميا باستمرار سواء المشي او الجري او السباحة والكورة ، مارس اي نوع من الرياضة لمدة نص ساعة يوميا ، الرياضة بتحسن من تدفق ووصول الدم والاكسجين للجسم كله باستمرار ، خلي الرياضة روتين يومي بالنسبالك .
استخدم الكركم والقرفة باستمرار
ضيف نسبة من الكركم لماكولاتك اليومية ، او ضيف معلقة من الكركم علي الحليب والعسل واشربها كمشروب يومي ، لان الكركم من الحاجات اللي بتحسن تدفق الدم لجميع اجزاء الجسم .
اشرب كوباية من مشروب القرفة يوميا محلاه بالعسل الابيض ، لان القرفة من المشروبات الغنية بالمعادن والفيتامينات اللي بدورها بيقلل من الاحساس بالتنميل .
نصائــــح
قلل من شرب المنبهات زي الشاي والقهوة والنسكافيه الخ..
قلل من التدخين ، لان التدخين من ضمن الاسباب الرئيسية لامراض الشرايين اللي بتسبب تنميل في الاطراف .
اشرب كمية كبيرة من الماية يوميا .
كتر من اكل الفواكهة والخضراوات خصوصا الخضراوات الداكنة.
تعليقات
إرسال تعليق