التاكو أكلة مكسيكية ممكن تتقدم بقطع الفراخ ، قطع اللحمة ، اللحمة المفرومة ، الجمبري ، الهوت دوج ، و النهاردة هنقدملك التاكو المكسيكي بلحم الديك الرومي ، بطعم جديد و شكل مختلف ، أكيد هيعجبك و كمان هتبهري بجمال ألوانه و طريقة تقديمه لضيوفك في العزومات و الحفلات .
هنبدأ دلوقتي الخطوات اللي بنوعدك دايما إنها تكون سريعة وسهلة و خصوصاً على سنة أولي مطبخ .
جهزي المقادير
4 قطع لحم ديك رومي مخلي، معلقة كبيرة زيت زيتون ، ¾ فنجان بصل أبيض مقطع ، ¾ فنجان بصل أحمرمقطع ، 2 فص ثوم مقطع ،معلقة صغيرة ملح ،معلقة صغيرة فلفل إسود ، معلقة صغيرة شطة ، معلقة صغيرة كمون ، معلقة صغيرة بابريكا ، ½ فنجان صلصة طماطم ، أوراق خس عريضة للتقديم ، ½ فنجان كزبرة مقطعة ، ¾ فنجان طماطم مقطعة ، ½ فنجان أفوكادو ، فنجان كريمة طبخ .
قطعي شرايح لحم الديك الرومي
حطي كل شريحة من شرايح التركي علي لوح التقطيع الخاص بالفراخ و قطعيها قطع صغيرة
سوي قطع لحم الديك الرومي
حطي زيت الزيتون في طاسة تيفال علي نار متوسطة ، ضيفي البصل الأبيض و قلبيه في الزيت ثواني ، و بعدين ضيفي قطع لحم الديك الرومي و الثوم ،و تبلي الخليط بالملح و الفلفل الإسود و سيبيه علي نار هادية لمدة خمس دقايق .
ضيفي بقية المكونات
ضيفي للخليط اللي فات الكمون ، الشطة ، البابريكا و صلصة الطماطم ، و سيبيهم علي نار هادية لحد ما الصلصة تتشرب وقطع لحم الديك الرومي تستوي .
صبي الخليط في ورق الخس
في طبق مسطح إفرشي ورق الخس و صبي فيه الخليط بشكل ديكوري جميل .
زيني الطبق و استمتعي
دلوقتي جه وقت إبداعك ، زيني الطبق بقطع الطماطم ، البصل الأحمر ، الكزبرة الخضرا ، قطع الأفوكادو و كريمة الطبخ
نصائــــح
إستعملي لوحة تقطيع خاصة بالفراخ ، و تكون مختلفة عن لوحة الخضار أو اللحوم علشان سلامتك .
ممكن تقدمي الطبق مع شرايح الشيبسي أو مع خبز التورتيلا (هتلاقيه في الهايبر ماركت ) و سلطة ، و بكده تكون الوجبة متكاملة .
لو لحم الديك الرومي مش متوفر عندك أو سعره غالي ممكن تستبدليه بشرايح الفراخ البانيه و تعملي نفس الخطوات اللي فاتت.
عندك إختيارات كتيرة علشان تزيني الطبق مثلا ، الذرة الحلوة المسلوقة ، فلفل الألوان ، الفاصوليا الحمرا المسلوقة ، جبنة شيدر، جبنة بارميزان , طماطم تشيري و غيرها حسب ذوقك .
الكمية تكفي شخصين و ممكن تزودي حسب عدد الأفراد
ممكن تستغني عن الأفوكادو لو مش موجود أو غالي
مدة تحضير الطبق تقريبا 30 دقيقة
جربي الوصفة و أكيد هتعجبك و هتضيفيها لقايمتك المفضلة اللي بتعمليها علي طول
تعليقات
إرسال تعليق