التشيز كيك من الحلويات اللي ليها شعبية كبيرة جداً و ناس كتير بتحبها . بس المشكلة في التشيز كيك إن مش كل الناس بتعرف تعملها صح . حتي في المطاعم ، مش كل المطاعم بتعرف تظبطها . و إحنا كمحبين تشيز كيك بنجرب وصفات كتير و مطاعم أكتر علشان نعرف نظبطها و نستمتع بيها . لو إنتي مننا من محبين التشيز كيك ، هنوفر مجهودك و وقتك و فلوسك و هنقولك على وصفة سهلة و لذيذة للتشيزكيك المثالية . الوصفة دي هتاخد من وقتك 20 دقيقة بس و مش هتحتاجي فرن علشان تعمليها و تستمتعي بيها . هنعمل النهارده التشيز كيك بالشوكولاتة و الفراولة . بس لو ملكيش في الشوكولاته أو الفراولة ممكن تستبدليهم بأي مكونات زي الخوخ ، التوت ، أو الكراميل . يلا بينا نشوف المكونات و الخطوات .
جهزي مقادير التشيز كيك
5 باكو بسكويت سادة (حوالي 125 جرام ) ، 2 معلقة كبيرة زبدة ، ربع كيلو شوكولاتة بيضة مقطعة ، ربع كيلو جبنة كريمي ، كوباية زبادي ، فراولة ، 2 كيس كريمة خفق .
جهزي البسكويت
حطي البسكويت في الفود بروسيسور و اطحنيه كويس ، و لو معندكيش الجهاز ده ممكن تحطي البسكويت في كيس نظيف و بأي حاجة تقيلة ممكن تطحني البسكويت .
سيحي الزبدة
علي نار هادية سيحي الزبدة و ضيفيها للبسكويت المطحون و اعجنيهم في بعض كويس علشان تساعدنا نشكل البسكوت المطحون .
جهزي الشوكولاتة
سيحي الشوكولاتة البيضة علي حمام مائي (حطي الشوكولاتة في حلة صغيرة جوة حلة كبيرة فيها ميه سخنة و قلبي الشوكولاتة كويس لحد ما تسيح ) .
حضري الصينية
في صينية تقديم حطي خليط البسكويت و الزبدة و خليه ياخد شكل قاعدة الكيك و سيبي الصينية في الثلاجة لمدة ساعة .
إضربي التوبنج
جهزي كريمة الخفق حسب التعليمات علي الكيس (عادة يضاف فنجان ميه أو لبن لكل كيس) و اضربي كويس بالمضرب و بعدين ضيفي الزبادي ، الجبنة ، الشوكولاتة البيضة ، و أخيرا ربع كمية الفراولة ، و استمري في الضرب .
رصي الصينية
بعد ما تخرجي الصينية من الثلاجة رصي فيها ربع كمية الفراولة بعد ما تقطعيها حلقات ، و بعدين حطي التوبنج ، و غطيه ببقية الفراولة .
حطي الصينية في التلاجة
دلوقتي رجعي الصينية في التلاجة و لكن لمدة من 6 ل 8 ساعات .
استمتعي بالطعم
بعد ما تخرجي الصينية من الثلاجة ممكن دلوقتي تقطعيها و تستمتعي بطعم تشيز كيك زي اللي بتاكليه في أكبر المطاعم و من غير مجهود ولا تكاليف كبيرة. قدمي التشيز كيك مع مشروب سخن زي الهوت شوكلت ، الشاي و النسكافية أو مشروب ساقع زي المشروبات الغازية ، أو أي حاجة تاني بتفضليها .
#تشيز كيك الفراولة بالفرن, #تشيز كيك بالجيلي الفراوله, #طريقة عمل تشيز كيك بالفراولة بالصور
تعليقات
إرسال تعليق