ناس كتير بترجح تمشي بدون رخصة شخصية بسبب انها لما بتروح تطلعها بتوه في الأجراءات وده لانهم بيكونوا فاكرين انهم بمجرد ما يروحوا هيطلعوها من اول مرة، لكن لو عرفت اجراءات الحصول عليها من خلال الخطوات دي هتكون اسهل بكتير :-
اتعلم السواقة كويس
لازم تكون بتسوق من 3 او 4 اسابيع علي الاقل عشان تروح تعمل الرخصة ، في ناس كتير بتكون عايزة تطلع رخصة شخصية بمجرد ما تتعلم سواقة وده بيتسبب انهم بيعيدوا الاختبارات العملية اكتر من مرة ولازم يعدي بين الاختبار والتاني مش اقل من شهر عشان الادارة تديلك فرصة تتدرب تاني عشان تدخل الامتحان
وفي حالة عدم اجتيازك للامتحان 3 مرات بيتلغي امتحانك وتبدا في الاشتراك من اول وجديد
وفر وقتك من الاول واتاكد انك بتعرف تسوق قبل ما تبدأ في الاجراءات ده كمان حفاظا علي سلامتك وسلامة الاخرين
اعرف الاجراءات بالترتيب
وعشان تتجنب ضياع الوقت والمجهود اعرف الاجراءات بالترتيب كالتالي
يوم مخصص للاشتراك(الاشارات او السواقة)
وده بيكون اي يوم في الاسبوع في المواعيد المخصصة للعمل من 8 او 9:30 في بعض الادارات لـ1:30 لان في الأغلب الخرنة بتقفل قبل الساعه 2 وخلي بالك محافظتك بتدي اجازة السبت ولا لأ عشان في محافظات بتدي اجازة السبت ومحافظات تانية بتشتغل فيستحسن تختار يوم تاني لو انت متعرفش النظام في محافظك
والاشتراك عبارة عن مبلغ من المال تقريبا 200 ج الاشتراك في الاشارات و350 لو بتشترك في مدرسة السواقة
وبتجهز معاك صورة للبطاقة وتتأكد انها سارية المدة (البطاقه بتكون سارية لمدة 7 سنين من تاريخ صدورها) وصورة شخصية حديثة
ملاحظه:
اشتراك الاشارات: اقل لانك بتتعلم اشارات بس لو انت بتعرف تسوق
اشتراك المدرسة : بتشترك فيه عشان تتعلم السواقة تبع مدرسة ادارة المرور
يوم للتقديم علي الامتحان
اغلب ادارات المرور بتخصص ايام محددة ووقت محدد للتقديم في الامتحانات عشان بيكتفوا بعدد معين و اسال عليه في محافظتك في اول يوم وانت بتشترك
وغالبا بيكون تقديم الامتحان في يوم والامتحان في اليوم اللي بعده
يوم الامتحان
اولا امتحان الاشارات واغلب المحافظات مبتعملوش
ثانيا امتحان السواقة و بيكون عبارة عن عدد معين من الاقماع مرصوصة علي الجانبين بطريقة معينة تقريبا 8 اقماع والمطلوب منك تعدي منهم ذهاب وعودة للخلف من غير ماتخبط او تدوس علي قمع منهم
في اغلب المحافظات بتمتحن في يوم وتخرج الرخصة في اليوم اللي بعده ومحافظات تانية بتخرجها في نفس يوم الامتحان بس لو هتخرجها في نفس اليوم لازم تكون مجهز الاوراق المطلوبة منك
جهز اوراقك المطلوبة بشكل صحيح
بعد نجاحك في امتحان السواقة متروحش تطلع الرخصة قبل ماتتاكد ان اوراقك سليمة وكاملة والاوراق دي بتكون :
1-شهادتين صحيتين باطنة ونظرمعتمدة بختم النسر من اي مستشفي حكومية
(الشهادات بتكون سارية من تاريخ صدورها لمدة 3 شهور فقط) ولو الـ3 شهور انتهوا هتعمل شهادات جديدة بتاريخ جديد
وخلي بالك وانت رايح تعمل الشهادات لازم يكون معاك صورتين شخصيتين
والشهادات دي عشان يتاكدوا من صحتك الجسدية قبل اخراج الرخصة
صورتين للبطاقة
والمطلوب في البطاقة انها تكون سارية وتكون ثابت فيها المؤهل الدراسي بتاعك او الوظيفة اللي ثابتها تكون بتتدل علي انك متعلم زي (دكتور _ مهندس_ مدرس)
وفي حالة اذا كنت طالب لازم تكون معدي سن الـ18سنة وهتحضر معاك صورة لأخر مؤهل حصلت عليه او اثبات قيد من المدرسة او بيان نجاح من ادارة التربية والتعليم التابعة للمركز الخاص بيك (اغلب الادارات بتستعلم 15 يوم عن بيان النجاح عشان يتاكدوا من صحته) او صورة لكارنيه الجامعة لو انت طالب جامعي
ولو مكتوب في البطاقه بدون عمل او عامل زراعي او وظيفة بشركة خاصة هتجهز معاك اصل للمؤهل الدراسي ،ودة عشان يتاكدوا انك بتعرف تقرأ عشان الاشارات
وفي حاله اذا كانت الشهادة اللي حصلت عليها هي محو الامية فبعض الادارات بتستعلم عن صحة الشهادة لمدة 3 شهور قبل ماتطلعلك الرخصة
نصائــــح
متفكرش توكل حد يقدملك علي الرخصة لان الادارة لازم تتاكد وتعاين الشخص بنفسها ومش مسموح بالتوكيل في الرخصه الشخصية
لازم تكون عارف ان مينفعش تطلع رخصة من مركز تاني داخل المحافظة غير المركز اللي انت تابع ليه ومثبوت في بطاقتك الشخصية واكيد مينفعش تطلعها من محافظة تانية
لو مصاب في ايدك او رجلك هتتحول قومسيون طبي تبع الادارة عشان يتاكدوا انها مش هتكون عائق في السواقه وبناء علي نتيجة القومسيون هيقرروا اذا كنت هتطلع رخصة عادية ولا رخصة مجهزة والرخصة المجهزة بتكون ليها اجراءات تختلف عن الرخصة العادية
لو حابب تطلع الرخصة بسهولة وتتجنب الزحمة طلعها في رمضان لان الشغل فيه بيكون خفيف جدا
تعليقات
إرسال تعليق