ازاي تعلمي ابنك المشي

امهات كتير بتقلق بمجرد ما تلاحظ طفل في عمر ابنها ابتدى يمشى وطفلها مازال في مرحلة الحبو ، وده اكبر غلط بترتكبه الأم وبيقلقها بدون اي داعي وعشان تتغلبي علي القلق ده
لازم تعرفي ان لكل طفل قدرات تختلف عن الطفل التاني اللي في نفس عمره ،وعشان تساعدي ابنك علي المشي اتبعي الخطوات الاتية :-

عدم المقارنة باطفال اخرين
الاطفال بتختلف في مراحل تكوينها ممكن طفل يمشى او يسنن قبل طفل تاني ده طبيعي جدا ومبيأثرش عليه،و الطبيعي ان الطفل بيبدا يمشي اول مايقرب لعيد ميلاده الاول ” من 11 شهر ل15 شهر “ممكن يبدا يمشى فى بداية الشهر الـ 11 أو فى نهاية الشهر الـ 15 وده شئ طبيعي جدا ميخلكيش تقلقى

والطفل عادة بيبدا يمشي اعتمادا علي حاجتين :-
1- قوة ارادته
قوة ارادة الطفل بتكون عنده بالفطرة لكن انتي ممكن تشتغلى عليها وتقويها عنده باكتر من حيله واكتر من طريقة على سبيل المثال :-

تحطي لعبه بيحبها علي كنبة في مستواه وهو واقف او تقعدي بعيد عنه وتشاوريله يجي او توطي السرير بتاعه شويه وتخلي بالك عشان ميقعش من عليه

2-قوة العضلات
تقدري تقوي قوة عضلات الطفل بانك تركزي في اكل طفلك علي (فيتامين د_الكالسيوم) وفيتامين د موجود في الأطعمة التالية “صفار البيض ، الزبادي ، لبن الام ،واللبن الصناعي واشعة الشمس ولازم تخلي بالك انه ممنوع الطفل ياكل زبادى قبل ما يتم السنة الأولى .

ركزي علي التمارين الرياضية
عشان تساعدي ابنك علي المشي اعمليله تمرين رياضي بسيط وهو عبارة عن رفع ابنك في الهواء يحرك رجله وانتي بتلاعبيه لان دة بيقوي عضلاته وبيساعده في المشي

متستعجليش علي مشي الطفل
لو استعجلي علي ابنك في المشي وبداتي تحاولي توقفيه ممكن تاثري بالسلب عليه لانه ممكن تكون عضلاتة مش قويه بالقدر الكافي اللي تساعده علي الوقوف وده ممكن يسببله تقوسات .

وفريله البيئة المناسبة
عشان تساعدي ابنك علي المشي من غير ما يتأذي لازم تاخدي بالك وتوفريله البيئة المناسبة للمشى وتبدأي في تأمين البيت عن طريق :-

1-تغطية فيش الكهرباء
2-توفير مكان واسع لطفلك يتحرك فيه
3-توفير أشياء مساعدة ( مبطنة ) يقدر يسند عليها

اتركية حافي القدمين
وجود حذاء بيكتف الطفل وبياثر علي اتزانه في مراحله الاولي من المشي لان لازم رجله تكون لامسة الارض عشان يقدر يتزن فحاولي تكون الارض مؤمنة انك تسيبي فيها الطفل حافي القدمين اكبر وقت ممكن

نصائــــح
متقلقيش علي ابنك من عدم المشي قبل السنة ونص
متستخدميش المشاية عشان تساعديه علي المشي لفترات طويله عشان يتعود يعتمد علي نفسه ويستخدم ارادته
ممكن تبداي تقلقي لو ابنك مبتداش المشي بعد السنة ونص وتهتمي بعرضه علي دكتور متخصص
تابعي ابنك بالملاحظه من سن صغير واعرضيه علي دكتور متخصص عشان تتطمني ان نموه ماشي بشكل صحيح