أيام كتير بنكون محتاجين حاجة بسيطة تغير من مودنا، ترفع من معنوياتنا ، تحسسنا بالسعادة و تكسر الروتين. الحاجة دي ممكن تكون خروجه حلوة على النيل مع حد بنحبه، مسلسل كوميدي يضحكنا شوية، كتاب جديد نبدأ فيه، أو أغنية قديمة كنا بنحبها ومسمعنهاش من زمان. الحاجات البسيطة اللي زي كده ممكن تشكل يومنا و تغير تفاصيله الجاية للأحسن، أكيد جربتي الإحساس ده قبل كده. و علشان إحنا مصدقين في قوة الحاجات البسيطة دي، قررنا نديكي فكرة جديدة تضيفيها لقايمة “مسببات السعادة” بتاعتك.
مسبب السعادة النهارده عبارة عن مشروب (زي ما خمنتوا ليه علاقة بالأكل و الشرب). المشروب ده اسمه لوحده هيخليكي سعيدة، أما ألوانه بقي ده موضوع تاني. هنقدملكم النهارده ال “يوني كورن هوت شوكلت”. زي ما معظمنا يعرف، اليوني كورن ده حيوان خرافي موجود في الأساطير عبارة عن حصان بقرن واحد. الحيوان ده هو رمز السحر و الجمال في العالم و خصوصا عند البنات اللي تقريبا كلهم بيحلموا يكون عندهم واحد منه في البيت أو يكونوا هما نفسهم “يوني كورن”.
دلوقتي خليكي معانا خطوة بخطوة عشان نحضر مشروب ” اليوني كورن هوت شوكلت ” اللي بيجمع بين أحلي حاجتين في عالم البنات و هما الشوكولاتة و “اليوني كورن”.
جهزي المكونات
ممكن تكون المكونات مش متوفرة في كل بيت بس سهل جدا تنزلي تجيبيها من أي سوبر ماركت و محل لوازم حلويات. المكونات عبارة عن كوبايتين كريمه خفق ، معلقة كبيرة سكر، ألوان طعام صحية بينك، ألوان طعام صحية أزرق ، 4 كوبايات لبن ، معلقة صغيرة مستخرج فانيلا ، شوكولاته بيضه ، و مارشميلو و سبرينكلز للتزيين.
إعملي الهوت شوكلت
ضيفي اللبن ، الفانيلا ، و الشكولاته البيضه على نار متوسطة و قلبي من وقت للتاني لحد لما الشكولاته تسيح ، ضيفي نقطتين ألوان طعام بينك و نقطتين أزرق (ممكن تزودي او تقللي لحد ما توصلي للون البنفسجي اللي بتحبيه).
إعملي الكريمة الملونة
إضربي الكريمة مع السكر لمده دقيقتين أو تلاتة لحد لما قوامهم ينعم. دلوقتي قسمي خليط الكريمه على أربع أطباق، في أول طبق إخلطي الكريمة بنقطتين لون بينك ، تاني طبق إخلطيها بنقطتين ازرق ، تالت طبق إخلطيه مع نقطتين ازرق و نقطتين بينك ، سيبي اخر طبق بلونه الأبيض الأصلي.
زيني و قدمي
قسمي الهوت شوكلت على كوبايات التقديم و طبعاً لازم تكون كوبايات شفافة علشان تظهر جمال الألوان. إستخدمي معلقة علشان تحطي جزء من كل لون كريمة بطريقة دائرية فوق الهوت شوكلت. و صلنا دلوقتي لأخر خطوة و هيا التزيين، ممكن تستخدمي مارشميلو ، سبرينكلز ، بشر شوكولاته بيضه أو أي حاجة متوفرة عندك للتزيين. دلوقتي المشروب جاهز عشان تستمتعي بيه مع كتاب جديد و موسيقي هادية أو مع الناس اللي بتحبيهم .
نصائــــح
ممكن تعكسي الخطوة 2 و الخطوة 3 علشان الهوت شوكلت تفضل سخنة و متبردش.
ممكن تستخدمي معلقة غرف الأيس كريم علشان تحطي بيها الكريمة الملونة و بكده تديكي شكل مختلف .
مش لازم تلتزمي بطريقة تزيين واحدة، قدمي كل كوباية بشكل غير التاني للتجديد
#شوكولاته نسكويك, #طريقة عمل النسكويك, #طريقة عمل الهوت شوكلت, #طريقة عمل الهوت شوكليت الجاهز, #طريقة عمل هوت شوكليت سالي فؤاد, #طريقه عمل نسكويك بالحليب, #طريقه نسكويك ساخن
تعليقات
إرسال تعليق