الفلفل الألوان شكله و ألوانه بتعمل بهجة علي أي سفرة ، ممكن تدخليه في السلطة أو في أي أكلة تخلي طعمها ألذ و شكلها أجمل . طبعاً كلنا متعودين ندخل الفلفل الملون في معظم أكلنا ، لكن النهاردة هندي الفلفل الملون دور أكبر و هنعمل منه بطل لطبقنا . هنقدمه كطبق رئيسي موفر علشان بيتعمل بربع كيلو لحمة بس و جنبه بطاطس محمرة و سلطة . ممكن كمان تقدميه في العزومات كطبق جانبي مع أطباق اللحوم كلها و ده هيدي لسفرتك جمال و طعامة ، يلا مع بعض نشوف مكونات طبق النهارده و نعرف في خطوات بسيطة إزاي نعمل قارب الفلفل باللحم المفروم و الرز و الجبنة الشيدر .
جهزي المقادير
3 حبات فلفل ألوان (أخضر و أصفر و أحمر) متوسطة الحجم ، ¼ كيلو لحم مفروم ، معلقة صغيرة ملح ، معلقة صغيرة فلفل إسود ، معلقة صغيرة بهارات ، فنجان جبنة شيدر مبشورة أو مقطعة قطع صغيرة ، فنجان رز مستوي ¾ سوي ( هيكمل سوي في الخطوات الجاية) ، 2 فنجان طماطم معصورة و مسبكة ، 3 معلقة كبيرة زبدة ، 2 معلقة كبيرة بقدونس مقطع .
قطعي الفلفل
قطعي كل حبة فلفل لنصين بشكل القارب ، إغسليها و نضفيها كويس من البذر .
جهزي اللحمة المفرومة
حطي 2 معلقة زبدة في طاسة و ضيفي ¼ كيلو لحمة مفرومة و عصجيها علي نار هادية لحد ما تستوي (تتحول من اللون الأحمر لللون البني الجميل اللي ريحته متتقاومش ) و تبليها بالملح و الفلفل الإسود و البهارات .
ضيفي الرز
بعد اللحمة ما تتعصج ضيفي عليها في الطاسة فنجان رز و فنجان صلصة طماطم و قلبي لمدة دقيقة علي النار و شيليها .
إحشي الفلفل
في صينية فرن مدهونة بمعلقة زبدة ، رصي قوارب الفلفل الألوان ، و إحشيها بالخلطة اللي عملتيها في الخطوة 4 ، رشي علي الوش فنجان صلصة طماطم و ½ فنجان جبنة شيدر .
إخبزي قارب الفلفل باللحم المفروم
حطي الصينية في الفرن لمدة 30 دقيقة و لما تخرجيها حطي علي الوش ½ فنجان جبنة شيدر .
قدمي و استمتعي
في طبق تقديم رصي بحرص قارب الفلفل باللحم المفروم و الرز و الجبنة الشيدر و زوقيه بالبقدونس المقطع .
نصائــــح
ممكن تستبدلي الجبنة الشيدر بالجبنة الموتزاريلا أو الجبنة البارميزان .
ممكن تستبدلي اللحم المفروم بالفراخ المفرومة و تطبقي نفس الخطوات .
علشان تخلي شكل الطبق أحلي ممكن تقطعي فلفل ألوان مكعبات صغيرة و تضيفيه لخلطة اللحمة و الرز و الطماطم و تحشي بيه قوارب الفلفل .
تعليقات
إرسال تعليق